Read La Bible en Malgache Genesisy 29 Bible Online

Genesisy 29 - La Bible en Malgache bible

Genesisy 29

¹Dia niainga i Jakoba ka nankany amin’ny tanin’ny zanaky ny Atsinanana.

²Dia nahita lavaka fantsakana iray tany an-tsaha izy; ary indro, nisy ondry aman’osy andiany telo nandry teo anilany, fa teo amin’izany lavaka fantsakana izany no fampisotroan’ny olona ny andian’ondry aman’osy. Nisy vato lehibe teo am-bavan’ny fantsakana.

³Teo no nangonina ny andian’ondry aman’osy rehetra, dia nakodia hiala amin’ny vavan’ny fantsakana ny vato ka nampisotroina ny ondry aman’osy; avy eo dia averina ho amin’ny toerany eo am-bavan’ny fantsakana indray ny vato.

⁴Hoy i Jakoba tamin’ny olona: Ry rahalahiko, avy aiza moa ianareo? Hoy ireo: Avy any Harana izahay.

⁵Dia hoy izy taminy: Moa mba fantatrareo va i Labana, zanakalahin’i Nahora? Hoy ireo: Fantatray izy.

⁶Hoy izy taminy: Tsara ihany va izy? Dia hoy ireo: Tsara ihany izy! Ary indro, tamy Rahely zanany vavy mitondra ny ondry aman’osy.

⁷Hoy indray izy: Mbola antoandrobe ny andro ka tsy mbola fotoana famoriana ny omby aman’ondry izao; ampisotroy ny ondry aman’osy ka mandehana, andraso izy.

⁸Hoy ireo: Tsy azonay atao izany raha tsy efa tafangona avokoa ny andian’ondry aman’osy rehetra ka akodia ny vato hiala amin’ny vavan’ny fantsakana; dia izay vao mampisotro ny ondry aman’osy izahay.

⁹Raha mbola niteny tamin’izy ireo i Jakoba dia indro tamy Rahely nitondra ny ondry aman’osin’ny rainy; fa mpiandry ondry izy.

¹⁰Rehefa hitan’i Jakoba Rahely, zanakavavin’i Labana anadahin-dreniny, sy ny ondry aman’osin’i Labana anadahin-dreniny, dia nanatona izy ka nanakodia ny vato hiala tamin’ny vavan’ny fantsakana, ary nampisotro ny ondry aman’osin’i Labana anadahin-dreniny.

¹¹Ary nanoroka an’i Rahely i Jakoba dia nigogogogo nitomany.

¹²Dia nambaran’i Jakoba tamin’i Rahely fa havan’ny rainy sy zanak’i Rebeka izy. Dia nihazakazaka Rahely nanambara izany tamin’ny rainy.

¹³Rehefa ren’i Labana ny filazany an’i Jakoba, zanak’anabaviny, dia nihazakazaka nitsena azy izy ka namihina azy sy nanoroka azy ary nitondra azy ho any an-tranony. Dia nambaran’i Jakoba tamin’i Labana izany rehetra izany.

¹⁴Ary hoy i Labana taminy: Taolako sy nofoko tokoa ianao. Ary nitoetra tao aminy nandritra ny iray volana i Jakoba.

¹⁵Fa hoy i Labana tamin’i Jakoba: Moa na dia havako aza va ianao dia hanompo ahy maina? Lazao amiko izay tokony ho karamanao.

¹⁶I Labana moa dia nanan-janaka roa vavy: Lea no anaran’ny zokiny ary Rahely ny zandriny.

¹⁷I Lea dia nalefa-pijery fa Rahely kosa dia bikana sady tsara tarehy.

¹⁸Ary i Jakoba dia tia an’i Rahely ka niteny hoe: Aoka aho hanompo anao fito taona noho ny amin’i Rahely, zanakao faravavy.

¹⁹Dia hoy i Labana: Aleoko omena anao izy, toy izay homena lehilahy hafa. Koa mitoera eto amiko.

²⁰Dia nanompo an’i Labana fito taona i Jakoba noho ny amin’i Rahely. Toa andro vitsy foana teo imasony izany noho ny fitiavany azy.

²¹Ary hoy i Jakoba tamin’i Labana: Omeo ahy ny vadiko mba hiarahako aminy, fa efa tapitra ny fe-potoana!

²²Dia nampamory ny tompon-tany rehetra ary i Labana ka nanao fanasana.

²³Kanjo nony hariva dia naka an’i Lea zanany vavy izy ka nitondra azy ho any amin’i Jakoba; dia nanambady azy i Jakoba.

²⁴Tamin’io dia nomen’i Labana an’i Lea zanany vavy i Zilpa mpanompovaviny hanompo azy.

²⁵Nony maraina ny andro, indro, hay i Lea ilay izy! Dia hoy i Jakoba tamin’i Labana: Ahoana izao nataonao tamiko izao? Moa tsy Rahely va no nanompoako anao? Koa nahoana no nofitahinao aho?

²⁶Fa hoy i Labana: Tsy fanao atỳ amin’ny taninay ny mamoaka ny zandriny alohan’ny zokiny.

²⁷Tanteraho ny herinandron’ity iray ity dia homenay anao koa ny iray noho ny fanompoana izay mbola hanompoanao ahy fito taona indray.

²⁸Nataon’i Jakoba izany ka notanterahiny ny herinandrony; dia nomen’i Labana azy koa Rahely zanany vavy ho vadiny.

²⁹Ary nomen’i Labana an’i Rahely zanany vavy kosa i Bila mpanompovaviny hanompo azy.

³⁰Dia novadin’i Jakoba koa Rahely; izy no tiany mihoatra noho i Lea ka nanompo an’i Labana fito taona indray izy.

³¹Rehefa hitan’NY TOMPO fa nankahalaina i Lea dia nampanana anaka azy Izy, fa Rahely kosa dia momba.

³²Dia nanana anaka i Lea ka niteraka zazalahy, ary ny anarany dia nataony hoe Robena[30]; fa hoy izy: Efa nahita ny fahoriako NY TOMPO, fa ankehitriny dia ho tian’ny vadiko aho.

³³Dia nanana anaka indray izy ka niteraka zazalahy. Ary hoy izy: Satria ren’NY TOMPO fa nankahalaina aho ka nomeny ahy koa ity. Dia nataony hoe Simeona[31] ny anarany.

³⁴Dia nanana anaka indray izy ka niteraka zazalahy. Ary hoy izy: Ankehitriny izao dia hifikitra amiko ny vadiko satria niteraka zazalahy telo ho azy aho. Izany no nanaovana ny anarany hoe Levy[32].

³⁵Dia nanana anaka indray izy ka niteraka zazalahy. Ary hoy izy: Ankehitriny, hidera NY TOMPO aho. Izany no nanaovany ny anarany hoe Joda[33]. Dia nitsaha-jaza izy.