Read La Bible en Malgache Genesisy 34 Bible Online

Genesisy 34 - La Bible en Malgache bible

Genesisy 34

¹Indray andro dia lasa i Dina, zanakavavin’i Lea naterany tamin’i Jakoba, mba hizaha ny zazavavy tompon-tany.

²Ary nahita azy i Sekema, zanakalahin’i Hamora hivita, andriana tamin’izany tany izany; dia naka azy izy ary nandry taminy ka nampietry azy.

³Raiki-pitia tamin’i Dina, zanakavavin’i Jakoba, ny fony; eny, tia an-dRazazavavy izy ka niteny malefaka taminy.

⁴Ary niteny tamin’i Hamora rainy i Sekema hoe: Alao ho vadiko Razazavavy io.

⁵Ren’i Jakoba fa nandoto an’i Dina zanany vavy izy; nefa mbola niandry ny omby aman’ondriny tany an-tsaha ireo zanany lahy, dia nangina aloha i Jakoba mandra-pahatongan’izy ireo.

⁶Roso nankany amin’i Jakoba ary i Hamora, rain’i Sekema, hidinika taminy.

⁷Rehefa tonga avy tany an-tsaha ireo zanak’i Jakoba ka nandre izany dia nalahelo sady tezitra mafy, satria nahavita izay fahadalana be teo amin’ny Israely i Sekema tamin’ny nandriany tamin’ny zanakavavin’i Jakoba. Zavatra tsy fanao izany.

⁸Ary nidinika tamin’ireo i Hamora hoe: I Sekema zanako lahy dia raiki-pitia amin’ny zanakareo vavy; koa miangavy anareo aho, mba omeo azy ho vadiny izy.

⁹Aoka hifanambady anaka isika: Omeo anay ny zanakareo vavy, ary alao ho anareo kosa ny zanakay vavy.

¹⁰Dia hiara-monina aminay ianareo; ary indro ny tany eo anoloanareo; monena eo ary mivarota ao, dia ho isan’ny tompon-tany ianareo.

¹¹Ary hoy i Sekema tamin’ny rain’i Dina sy ny anadahiny: Aoka mba hahita fitia eto imasonareo aho, ary izay lazainareo amiko dia homeko.

¹²Na dia harena be sy zavatra betsaka aza no asainareo homeko dia homeko ihany araka izay holazainareo amiko; fa omeo ahy Razazavavy ho vadiko!

¹³Ary ireo zanak’i Jakoba dia namaly an’i Sekema sy i Hamora rainy tamin’ny fitaka sy hafetsena noho ny nandotoany an’i Dina anabaviny.

¹⁴Hoy izy ireo taminy: Tsy azonay atao ny hanome ny anabavinay ho an’izay lehilahy tsy voafora; fahavetavetana aminay izany!

¹⁵Izao ihany no azonay hanekena anareo: Raha ho tahaka anay ianareo ka hoforana ny lehilahy rehetra aminareo

¹⁶dia homenay anareo ny zanakay vavy ary ny zanakareo vavy kosa dia halainay ho anay, dia hiara-monina aminareo izahay ka ho firenena iray isika.

¹⁷Fa raha tsy hanaraka ny teninay ianareo ka tsy hoforana dia halainay ny zanakay vavy ka handeha izahay.

¹⁸Nahafaly an’i Hamora sy i Sekema zanany ireo teniny ireo.

¹⁹Tsy nitaredretra ilay zatovo hanatanteraka izany zavatra izany satria naniry loatra ny zanakavavin’i Jakoba izy. Ary izy no nalaza indrindra tamin’izay rehetra tao an-tranon’ny rainy.

²⁰Koa nankeo amin’ny vavahadin’ny tanànany i Hamora sy i Sekema zanany lahy dia niteny tamin’ny mponina tao an-tanànany hoe:

²¹Ireo olona ireo dia mipetraka tsara eto amintsika ka aoka honina eto amin’ny tany sy hivarotra eto izy; fa indro ny tany dia malalaka eo anoloany! Halaintsika ho vady ny zanany vavy ary ny zanatsika vavy kosa dia homentsika azy.

²²Nefa izao ihany no hanaovan’ireo lehilahy ireo fanekena amintsika ka hiarahantsika monina ho firenena iray: Mba hoforana koa, hono, ny lehilahy rehetra eto amintsika tahaka izay namorana azy ireo.

²³Tsy ho antsika va ny omby aman’ondriny sy ny fananany mbamin’ny biby fiompiny rehetra? Aoka hanaiky ny teniny ihany isika, dia hiara-monina amintsika izy.

²⁴Nanaiky ny tenin’i Hamora sy i Sekema zanany izay rehetra nivoaka ny vavahadin’ny tanànany. Noforana ny lehilahy rehetra, dia izay rehetra nivoaka ny vavahadin’ny tanànany.

²⁵Fa tamin’ny andro fahatelo, rehefa ilay nanaintaina mafy iny izy ireo, dia samy nitondra ny sabany ny zanak’i Jakoba roa lahy, dia i Simeona sy i Levy, anadahin’i Dina, ka niakatra mora tao an-tanàna dia namono ny lehilahy rehetra tao.

²⁶Novonoiny tamin’ny lelan-tsabatra koa i Hamora sy i Sekema zanany lahy, dia naka an’i Dina tao an-tranon’i Sekema izy ireo vao lasa nandeha.

²⁷Ary nankeny amin’ny faty ny zanak’i Jakoba ka namabo ny tanàna noho ny nandotoan’i Sekema ny anabaviny.

²⁸Nalainy avokoa ny ondry aman’osiny, ny ombiny sy ny borikiny mbamin’izay rehetra tao an-tanàna sy izay rehetra tany an-tsaha;

²⁹nobaboiny ny fananany rehetra sy ny zanany madinika rehetra ary ny vadiny ka nofaohiny avokoa mbamin’izay rehetra tany an-trano.

³⁰Dia hoy i Jakoba tamin’i Simeona sy i Levy: Nahatonga loza amiko ianareo, fa nomaimboinareo eto amin’ny mponina amin’ny tany aho, dia amin’ny Kananita sy ny Perizita. Olom-bitsy anefa aho, koa hiangona hamely ahy izy ireo ka hamono ahy; ary ho fongotra aho, dia izaho sy ny ankohonako.

³¹Fa hoy kosa ireo: Moa va ny anabavinay havela hatao toy ny vehivavy janga?