Read La Bible en Malgache Genesisy 35 Bible Online

Genesisy 35 - La Bible en Malgache bible

Genesisy 35

¹Ary hoy Andriamanitra tamin’i Jakoba: Miaingà, miakara any Betela ianao ka monena any; manorena alitara any ho an’Andriamanitra izay niseho taminao, fony ianao nandositra an’i Esao rahalahinao.

²Dia hoy i Jakoba tamin’izay tao an-tranony mbamin’ireo rehetra niaraka taminy: Ario ireo andriamanitra izay ao aminareo dia midiova ary soloy ny fitafianareo.

³Andeha isika hiainga ka hiakatra any Betela; hanao alitara any aho ho an’Andriamanitra izay namaly ny vavaka nataoko tamin’ny andron’ny fahoriako sy nomba ahy tamin’ny lalana izay nalehako.

⁴Dia natolony an’i Jakoba ireo andriamanitra hafa rehetra izay notanany sy ny kavina izay teny an-tsofiny ka nalevin’i Jakoba teo am-pototry ny hazo terebinta* izay tao akaikin’i Sekema.

⁵Dia niainga ireo. Ary nisy tahotra avy amin’Andriamanitra nahazo ny tanàna manodidina azy ka tsy nisy nanenjika ny zanak’i Jakoba.

⁶Ary tonga tany Lozy na Betela, izay any amin’ny tany Kanana, i Jakoba, dia izy sy ny olona rehetra izay nomba azy.

⁷Nanorina alitara teo izy ka nataony hoe El-Betela[49] no anaran’izany toerana izany satria teo no nisehoan’Andriamanitra taminy fony izy nandositra ny rahalahiny.

⁸Ary maty i Debora, mpitaiza an’i Rebeka, dia naleviny tao akaikin’i Betela, teo ambanin’ny hazo oaka iray; nataony hoe Alona-Bakota[50] ny anaran’io.

⁹Ary Andriamanitra niseho indray tamin’i Jakoba rehefa tonga avy tany Padana-Arama izy ka nitahy azy.

¹⁰Hoy Andriamanitra taminy: Jakoba no anaranao, nefa tsy hatao hoe Jakoba intsony ny anaranao fa hatao hoe Israely. Dia nataony hoe Israely ny anarany.

¹¹Hoy ihany Andriamanitra taminy: Izaho no Andriamanitra Tsitoha. Maroa fara sy mihabetsaha. Hisy firenena lehibe sy firenena maro hiseho avy aminao ary hisy mpanjaka maro avy amin’ny haterakao.

¹²Ny tany izay nomeko an’i Abrahama sy Isaka dia homeko anao ary ny taranakao mandimby anao koa no homeko ny tany.

¹³Ary Andriamanitra niakatra niala taminy, teo amin’ilay toerana niresahany taminy.

¹⁴Ary nanorina tsangambato teo amin’io toerana izay niresahany Taminy io i Jakoba ka nandraraka fanatitra aidina teo aminy sady nandraraka diloilo teo aminy koa.

¹⁵Ary ny anaran’ny tany izay niresahan’Andriamanitra taminy dia nataon’i Jakoba hoe Betela.

¹⁶Dia nifindra niala tany Betela izy. Nony efa kely foana sisa tsy nahatongavany tao Efrata dia nihetsi-jaza Rahely ary saro-piterahana.

¹⁷Rehefa narary am-piterahana toy izany izy dia hoy ny mpampivelona taminy: Aza matahotra ianao fa zazalahy ho anao koa ity!

¹⁸Rehefa niala aina Rahely satria ho faty izy dia nataony hoe Beny-Onỳ[51] ny anaran’ny zaza; fa ny rainy kosa dia niantso azy hoe Benjamina[52].

¹⁹Dia maty Rahely ka nalevina teo amin’ny lalana mankany Efrata na Betlehema.

²⁰Ary nanorina tsangambato teo ambonin’ny fasany i Jakoba, dia ilay tsangambato izay mbola ao amin’ny fasan’i Rahely mandraka androany.

²¹Dia lasa nifindra Israely ka nanorina ny tranolainy tany ankoatra an’i Migdala-Edera.

²²Rehefa nonina teo amin’izany tany izany Israely dia avy i Robena ka nandry tamin’i Bila, vady tsindranon’ny rainy; ary ren’Israely izany.

²³Roa amby folo mirahalahy ny zanakalahin’i Jakoba. Ny zanak’i Lea dia i Robena, lahimatoan’i Jakoba, i Simeona, i Levy, i Joda, Isakara ary i Zebolona;

²⁴ny zanak’i Rahely kosa dia i Josefa sy i Benjamina;

²⁵ny zanak’i Bila, mpanompovavin’i Rahely dia i Dana sy i Naftaly;

²⁶ny zanak’i Zilpa, mpanompovavin’i Lea kosa dia i Gada sy i Asera. Ireo no zanakalahin’i Jakoba izay naterany tany Padana-Arama.

²⁷Ary i Jakoba dia nankany amin’Isaka rainy tany Mamre, any Kiriata-Arba na Hebrona, izay nivahinian’i Abrahama sy Isaka.

²⁸Valopolo amby zato taona ny andro niainan’Isaka.

²⁹Dia niala aina Isaka ka maty, ary nangonina any amin’ny razany izy rehefa tratra antitra sady ela niainana; dia nandevina azy i Esao sy i Jakoba zanany lahy.