Read La Bible en Malgache Genesisy 39 Bible Online

Genesisy 39 - La Bible en Malgache bible

Genesisy 39

¹Ary i Josefa dia noentina nidina ho any Ejipta ka i Potifara, lehilahy ejiptiana, tandapan’i Farao sady lehiben’ny mpiambina, no nividy azy tamin’ireo Ismaelita izay nitondra azy nidina tany.

²Ary NY TOMPO nomba an’i Josefa ka nambinina izy; nitoetra tao an-tranon’ilay Ejiptiana tompony izy.

³Dia hitan’ny tompony fa nomban’NY TOMPO izy satria izay rehetra nataony dia nampahombiazin’NY TOMPO.

⁴Ary i Josefa dia nahita fitia teo imason’ny tompony ka nanompo azy. Notendreny ho mpikarakara ny tao an-tranony izy ka izay rehetra nananany dia natolony ho andraikiny.

⁵Ary hatramin’izay nanendren’ny tompony azy ho mpikarakara ny tao an-tranony, mbamin’izay rehetra nananany, dia notahin’NY TOMPO ny tranon’ilay Ejiptiana noho ny amin’i Josefa; ny fitahian’NY TOMPO dia tamin’izay rehetra nananany, na ny tao an-trano, na ny tany an-tsaha.

⁶Dia navelany ho andraikitr’i Josefa izay rehetra nananany; ary satria nanana azy i Potifara dia tsy nihevitra zavatra hafa intsony afa-tsy ny sakafony ihany. Ary i Josefa dia bikana sady tsara tarehy.

⁷Taorianan’izany ny vadin’ny tompony dia nanomboka nijery an’i Josefa ka niteny hoe: Avia handry amiko.

⁸Nandà anefa izy ka niteny tamin’ny vadin’ny tompony hoe: Indro, satria manana ahy ny tompoko, dia tsy mihevitra na inona na inona ato an-trano izy, fa izay rehetra ananany dia natolony ho andraikitro avokoa.

⁹Tsy misy lehibe noho izaho ato amin’ity trano ity, ary tsy misy zavatra narovany amiko afa-tsy ianao ihany satria vadiny ianao. Koa hataoko ahoana no hanao izany heloka lehibe izany ka hanota amin’Andriamanitra?

¹⁰Ary na dia niteny tamin’i Josefa isanandro aza Ravehivavy dia tsy nety nanaiky azy handry aminy izy.

¹¹Indray andro, niditra hanatanteraka ny raharahany tao an-trano i Josefa, sendra tsy nisy mpanompo tao an-trano tamin’izay,

¹²dia nisambotra azy tamin’ny akanjony Ravehivavy ka niteny hoe: Avia handry amiko! Navelan’i Josefa teny an-tanany anefa ny akanjony dia lasa nandositra tany alatrano izy.

¹³Rehefa hitan-dRavehivavy fa navelany teny an-tanany ny akanjony sady lasa nandositra tany alatrano izy

¹⁴dia niantso ireo olona tao an-tranony izy ka nilaza taminy hoe: Indro, nampiditra lehilahy hebreo tato amintsika izy hisangy antsika. Nanatona ahy mba handry amiko iny dia niantso tamin’ny feo mahery aho.

¹⁵Nony reny fa nanandratra ny feoko aho ka niantsoantso dia navelany teto anilako ny akanjony ka lasa nandositra any alatrano izy.

¹⁶Dia napetraky Ravehivavy teo anilany ilay akanjon’i Josefa, mandra-pahatongan’ny tompony tao an-trano.

¹⁷Dia nilaza taminy araka ireo teny ireo izy hoe: Nanatona ahy ilay mpanompolahy hebreo izay noentinao ho eto amintsika mba hisangy ahy.

¹⁸Rehefa nanandratra ny feoko aho ka niantsoantso dia navelany eto anilako ny akanjony ka lasa nandositra any alatrano izy.

¹⁹Rehefa ren’ny tompony ny tenin’ny vadiny izay niteny taminy hoe: Araka izany voalazako izany no nataon’ilay mpanompolahinao tamiko, dia nirehitra ny fahatezerany.

²⁰Dia naka an’i Josefa ny tompony ka nampiditra azy tao amin’ny tranomaizina izay fitoeran’ny mpifatotra diso tamin’ny mpanjaka. Koa nitoetra tao an-tranomaizina izy.

²¹Nomba an’i Josefa anefa NY TOMPO ka namindra fo taminy ary nampahita fitia azy teo imason’ny mpiambina ny tranomaizina.

²²Koa natolotry ny mpiambina ny tranomaizina ho andraikitr’i Josefa ny mpifatotra rehetra izay tao an-tranomaizina ary izy no tomponandraikitra tamin’izay rehetra nataon’ireo tao.

²³Tsy mba nikarakara na inona na inona intsony tamin’izay teo am-pelatanany ny mpiambina ny tranomaizina, satria NY TOMPO nomba an’i Josefa, ary izay nataony dia nambinin’NY TOMPO.