Read La Bible en Malgache Genesisy 40 Bible Online

Genesisy 40 - La Bible en Malgache bible

Genesisy 40

¹Taorianan’izany dia nahavita fahadisoana tamin’ny mpanjakan’i Ejipta tompony ny mpitondra kapoakan’ny mpanjakan’i Ejipta sy ny mpanao mofony.

²Dia nisafoaka tamin’ireo tandapany roa lahy ireo i Farao, dia tamin’ny lehiben’ny mpitondra kapoaka sy ny lehiben’ny mpanao mofo.

³Nataony tao an-tranomaizina izy roa lahy, tao an-tranon’ny lehiben’ny mpiambina, tao anatin’ilay tranomaizina izay nifatoran’i Josefa.

⁴Notendren’ny lehiben’ny mpiambina ho eo amin’izy roa lahy i Josefa ka nanompo azy ireo izy. Ary nitoetra andro maromaro tao amin’ny tranomaizina izy roa lahy.

⁵Indray alina, nanonofy izy roa lahy, dia ilay mpitondra kapoaka sy ilay mpanao mofon’ny mpanjakan’i Ejipta, izay nifatotra tao an-tranomaizina. Samy nanana ny nofiny izay samy nanana ny heviny avy izy roa lahy ireo.

⁶Nony maraina ny andro dia nankao amin’izy ireo i Josefa ka nahita azy ireo nalahelo tarehy.

⁷Dia nanontanian’i Josefa ireo tandapan’i Farao izay niara-nifatotra taminy tao an-tranon’ny tompony; hoy izy: Nahoana no malahelo tarehy izato ianareo?

⁸Hoy izy roa lahy taminy: Nanonofy izahay ary tsy misy mahalaza ny heviny. Dia hoy i Josefa: Tsy avy amin’Andriamanitra va ny filazana ny hevitry ny nofy? Miangavy anareo aho, lazao amiko izany nofinareo izany!

⁹Dia nambaran’ny lehiben’ny mpitondra kapoaka tamin’i Josefa ny nofiny; hoy izy: Nofiko fa indro, hono, nisy tahom-boaloboka teo anatrehako.

¹⁰Ilay tahom-boaloboka dia nisampana telo. Nony nitsimoka izy dia niposaka ny voniny ary ny sampahony dia nahavanona voaloboka masaka.

¹¹Teny an-tanako ny kapoakan’i Farao. Nalaiko ny voaloboka ka nofiazako ho ao amin’ny kapoakan’i Farao, dia natolotro teo an-tanan’i Farao ny kapoaka.

¹²Dia hoy i Josefa taminy: Izao no hevitr’izany: Ny sampany telo dia hateloana.

¹³Ato anatin’ny hateloana dia hasandratr’i Farao ny lohanao ka hampodiny ho ao amin’ilay nipetrahanao ianao; hanolotra ny kapoakan’i Farao ho eo an-tanany indray ianao, tahaka ilay fanao fahiny fony ianao mpitondra kapoakany.

¹⁴Fa mba tsarovy aho rehefa mahita soa ianao, koa trara antitra ianao, iantrao aho, dia lazao amin’i Farao aho ka avoahy amin’ity trano ity.

¹⁵Fa nangalarina avy tany amin’ny tanin’ny Hebreo aho, nefa ange tsy nanao na inona na inona izay tokony ho nametrahana ahy ato amin’ity lavaka ity.

¹⁶Rehefa hitan’ny lehiben’ny mpanao mofo fa tsara ny fanazavany ny hevitry ny nofy dia hoy izy tamin’i Josefa: Izaho koa dia nanonofy ka indro, hono, niloloha harona telo feno mofo fotsy aho.

¹⁷Tao anatin’ilay harona ambony indrindra dia nisy ny karazana sakafo rehetra nataon’ny mpanao mofo ho an’i Farao. Nefa lanin’ny vorona tao anatin’ny harona izay nololohaviko izany.

¹⁸Dia hoy i Josefa: Izao kosa no hevitr’izany: Ny harona telo dia hateloana.

¹⁹Ato anatin’ny hateloana dia hasandratr’i Farao ho afaka aminao ny lohanao ka hahantony amin’ny hazo ianao dia hohanin’ny vorona ny nofonao.

²⁰Ary tamin’ny andro fahatelo, izay nitsingerenan’ny taona nahaterahany, dia nanao fanasana ho an’ny mpanompony rehetra i Farao, ka nasandrany ny lohan’ny lehiben’ny mpitondra kapoaka sy ny lohan’ny lehiben’ny mpanao mofo teo amin’ny mpanompony.

²¹Ny lehiben’ny mpitondra kapoaka dia nampodiny ho amin’ny fitondrany kapoaka indray ka nanolotra ny kapoaka ho eo an-tanan’i Farao.

²²Fa ny lehiben’ny mpanao mofo kosa dia nahantony, araka izay nolazain’i Josefa tamin’izy roa lahy avy.

²³Kanjo tsy mba nahatsiaro an’i Josefa ilay lehiben’ny mpitondra kapoaka fa nanadino azy.