Read La Bible en Malgache Genesisy 41 Bible Online

Genesisy 41 - La Bible en Malgache bible

Genesisy 41

¹Rehefa feno roa taona taorianan’izany dia nanonofy i Farao ka indro, hono, nitsangana teo amoron’ny Neily izy.

²Koa indreo, nisy ombivavy fito tsara tarehy sady matavy niakatra avy tao amin’ny Neily ka nihinana teny amin’ny bararata.

³Ary indreo, nisy ombivavy fito hafa kosa ratsy tarehy sady mahia niakatra avy tao amin’ny Neily nanaraka azy, dia nijanona teo anilan’ireo ombivavy teo amoron’ny Neily koa.

⁴Ary ireo ombivavy ratsy tarehy sady mahia dia nihinana ireo ombivavy fito tsara tarehy sady matavy. Dia nahatsiaro i Farao.

⁵Natory indray izy ka nanonofy fanindroany ka indro, hono, nisy salohim-bary fito niakatra tamin’ny tahony iray, sady matavy no tsara.

⁶Ary indreo, nisy salohim-bary fito maivam-boa kosa sady mainan’ny rivotra avy any atsinanana, nitsimoka nanaraka ireny.

⁷Ary ny salohim-bary maivam-boa dia nitelina ny salohim-bary fito matavy sy be voa. Dia nahatsiaro i Farao, koa indro fa nofy ihany izany.

⁸Nony maraina dia nitebiteby izy ka nandefa iraka haka ny ombiasy rehetra tany Ejipta sy ny olon-kendriny rehetra. Nambaran’i Farao azy ireo ny nofiny, nefa tsy nisy na dia iray aza nahalaza izay heviny tamin’i Farao.

⁹Dia niteny tamin’i Farao ilay lehiben’ny mpitondra kapoaka hoe: Tsaroako izao ny hadisoako.

¹⁰Tezitra tamin’ny mpanompony i Farao ka nampiditra ahy tao an-tranomaizina tao anatin’ny tranon’ny lehiben’ny mpiambina, dia izaho sy ilay lehiben’ny mpanao mofo.

¹¹Indray alina, nanonofy izahay, dia izaho sy izy; samy nanana nofy izay samy nanana ny heviny avy izahay.

¹²Ary tao aminay dia nisy zatovo hebreo iray, mpanompon’ny lehiben’ny mpiambina. Nambaranay taminy ny nofinay ka nolazainy taminay ny heviny. Samy nilazany araka ny nofinay avy izahay.

¹³Tanteraka araka izay nolazainy taminay avy izany: Izaho dia nampodìny ho ao amin’ilay nipetrahako fa izy kosa dia nahantony.

¹⁴Dia nandefa iraka haka an’i Josefa i Farao ka nalaina haingana niala tao an-davaka izy. Nanaratra ny volombavany sy niova fitafiana izy ka nankany amin’i Farao.

¹⁵Hoy i Farao tamin’i Josefa: Nanonofy aho fa tsy misy mahalaza ny heviny; nahare nefa aho fa ianao, hono, raha mandre nofy, dia mahalaza ny heviny.

¹⁶Hoy ny navalin’i Josefa an’i Farao hoe: Tsy ahy izany! Andriamanitra no hilaza izay valiny hampiadana an’i Farao!

¹⁷Dia hoy i Farao tamin’i Josefa: Nofiko fa indro, hono, nitsangana teo amoron’ny Neily aho.

¹⁸Koa indreo, nisy ombivavy fito matavy sady tsara tarehy niakatra avy tao amin’ny Neily ary nihinana teny amin’ny bararata ireny.

¹⁹Ary indreo, nisy ombivavy fito hafa indray kosa niakatra nanaraka azy ireny, mangozohozo sady tena ratsy tarehy no mahia, ka tsy mbola hitako izay ratsy toa azy teto amin’ny tany Ejipta rehetra.

²⁰Ary ireo ombivavy fito mahia sady ratsy tarehy dia nihinana ireo ombivavy fito matavy izay nialoha azy.

²¹Rehefa nahahinana an’ireo matavy izy dia tsy fantatra akory fa ao an-kibony ireny, fa mbola ratsy tarehy tahaka ny taloha ihany ireo. Dia nahatsiaro aho.

²²Hitako tamin’ny nofiko indray fa indreo, nisy salohim-bary fito niakatra tamin’ny tahony iray, sady feno no tsara.

²³Ary indreo, nisy salohim-bary fito kosa sady malazo no maivam-boa, mainan’ny rivotra avy any atsinanana, nitsimoka nanaraka ireny.

²⁴Ary ny salohim-bary maivam-boa dia nitelina ny salohim-bary fito tsara. Nolazaiko tamin’ny ombiasy izany nefa tsy nisy nahalaza ny heviny tamiko ireny.

²⁵Dia hoy i Josefa tamin’i Farao: Iray ihany ny nofin’i Farao; izay hataon’Andriamanitra no nambarany tamin’i Farao.

²⁶Ny ombivavy fito tsara tarehy dia taona fito; ary ny salohim-bary fito vokatra koa dia taona fito; iray ihany ny nofy.

²⁷Ny ombivavy fito mahia sady ratsy tarehy, izay niakatra nanaraka ireny, dia taona fito; ary ny salohim-bary fito tsy nisy voa sady mainan’ny rivotra avy any atsinanana dia ho taona fito mosarena.

²⁸Izany dia ilay nolazaiko tamin’i Farao teo hoe: Izay hataon’Andriamanitra no asehony amin’i Farao.

²⁹Indro, hisy fito taona tena zina manerana ny tany Ejipta rehetra.

³⁰Manaraka izany kosa hisy fito taona hisy mosary ka ho hadino ny fahavokarana be rehetra teo amin’ny tany Ejipta fa ho ritran’ny mosary ny tany.

³¹Ilay fahavokarana teo amin’ny tany dia tsy ho fantatra noho izany mosary manaraka azy izany, fa ho mafy indrindra izany.

³²Naverina indroa ny nofin’i Farao satria voatendrin’Andriamanitra ireo zavatra ireo ka hotanterahin’Andriamanitra haingana.

³³Koa ankehitriny, aoka i Farao hizaha lehilahy manan-tsaina sady hendry ka hanendry azy hanapaka ny tany Ejipta.

³⁴Aoka hanatanteraka izany i Farao, ary aoka izy hanendry mpanara-maso amin’ny tany ka hamory ny ampahadimin’ny vokatry ny tany Ejipta amin’ny taon-jina fito ireny.

³⁵Dia aoka izy ireo hanangona ny hanina rehetra amin’ireo taona tsara ho avy ireo ka hamory vary be amin’ny anaran’i Farao, hohanina any amin’ny tanàna maro, ary aoka izy hitahiry ireo.

³⁶Ary aoka ireo hanina ireo hotahirizina ao amin’ny tany ho amin’ny fito taona hisy mosary, izay ho tonga amin’ny tany Ejipta, mba tsy ho simban’ny mosary ny tany.

³⁷Nankasitrahan’i Farao sy ny mpanompony rehetra izany hevitra izany.

³⁸Dia hoy i Farao tamin’ny mpanompony: Moa va isika hahita lehilahy manana ny Fanahin’Andriamanitra ao anatiny tahaka an’io?

³⁹Ary hoy i Farao tamin’i Josefa: Satria nampahafantarin’Andriamanitra anao izany rehetra izany dia tsy misy lehilahy manan-tsaina sady hendry tahaka anao.

⁴⁰Koa ianao no hanapaka ny ato an-tranoko, ary araka ny teninao no hitondrana ny oloko rehetra. Ny sezafiandrianana ihany no hahalehibe ahy noho ianao.

⁴¹Hoy koa i Farao tamin’i Josefa: Indro, manendry anao hanapaka amin’ny tany Ejipta rehetra aho.

⁴²Dia nesorin’i Farao ny peratra fitombo-kase tamin’ny tanany ka nataony tamin’ny tanan’i Josefa, dia nampitafiny akanjo rongony fotsy madinika izy ary nasiany rojo volamena ny vozony.

⁴³Avy eo, nampitaingeniny tamin’ny kalesiny faharoa izy, ary niantso teo alohany ny vahoaka hoe: Abreka[55]! Notendreny ho mpanapaka ny tany Ejipta rehetra izy.

⁴⁴Dia hoy i Farao tamin’i Josefa: Izaho no Farao, kanefa raha tsy teninao dia tsy hisy olona hanetsika ny tanany na ny tongony eto amin’ny tany Ejipta manontolo.

⁴⁵Nataon’i Farao hoe Zafenata-Panea ny anaran’i Josefa. Nomeny azy ho vadiny i Asenata, zanakavavin’i Poty-Fera, mpisorona tao Ona. Ary nandeha nitety ny tany Ejipta i Josefa.

⁴⁶Telopolo taona i Josefa raha niseho teo anatrehan’i Farao, mpanjakan’i Ejipta. Niala teo anatrehan’i Farao i Josefa ka nandeha nitety ny tany Ejipta manontolo.

⁴⁷Nahavokatra be dia be tokoa ny tany tamin’ny taon-jina fito.

⁴⁸Dia namory ny hanina rehetra tamin’izany fito taona izany teo amin’ny tany Ejipta i Josefa ka nitahiry ireo tany amin’ny tanàna rehetra. Notahiriziny tao anatin’ny tanàna ny vokatry ny saha manodidina ny isan-tanàna.

⁴⁹Namory vary tahaka ny fasika any an-dranomasina i Josefa; eny, be dia be izany ka tsy nanisa intsony izy satria tsy hita isa ireo.

⁵⁰Tsy mbola tonga ny taonan’ny mosary fony i Josefa niteraka zazalahy roa tamin’i Asenata, zanakavavin’i Poty-Fera, mpisorona tao Ona.

⁵¹Ny anaran’ny lahimatoa dia nataon’i Josefa hoe Manase[56], fa Andriamanitra, hoy izy, efa nampanadino ahy ny fahoriako rehetra sy izay rehetra tao an-tranon’ny raiko.

⁵²Ny anaran’ny zandriny kosa dia nataony hoe Efraima[57]; fa Andriamanitra, hoy izy, efa nahamaro ahy teto amin’ny tanin’ny fahoriako.

⁵³Ary tapitra ny taon-jina fito teo amin’ny tany Ejipta,

⁵⁴fa niandoha kosa ny fito taona nisy mosary, araka izay efa voalazan’i Josefa. Ary nisy mosary tany amin’ny tany rehetra; nefa nanerana ny tany Ejipta manontolo dia mbola nisy hanina ihany.

⁵⁵Rehefa mosarena ny tany Ejipta manontolo dia nitaraina nangataka hanina tamin’i Farao ny olona. Dia hoy i Farao tamin’ny Ejiptiana rehetra: Mankanesa any amin’i Josefa, koa izay holazainy aminareo dia ataovy.

⁵⁶Tany amin’ny tany rehetra ny mosary, nefa namoha ny trano fitahirizam-bary i Josefa ka nivaro-bary tamin’ny Ejiptiana. Tena mafy ny mosary nanerana ny tany Ejipta.

⁵⁷Ary ny tany rehetra dia nankany Ejipta ho any amin’i Josefa mba hividy vary fa mafy ny mosary tany amin’ny tany rehetra.