Read La Bible en Malgache Genesisy 46 Bible Online

Genesisy 46 - La Bible en Malgache bible

Genesisy 46

¹Ary niainga Israely nitondra izay rehetra nananany ka nankany Bery-Sheba, dia namono zavatra hatao fanatitra ho an’Andriamanitr’Isaka rainy izy.

²Ary Andriamanitra niteny tamin’Israely tamin’ny fahitana nony alina hoe: Ry Jakoba, ry Jakoba ô! Dia hoy Israely: Inty aho!

³Dia hoy Izy: Izaho no Andriamanitra, dia Andriamanitry ny rainao. Aza matahotra ny hidina any Ejipta ianao fa hataoko firenena lehibe any ianao.

⁴Izaho no hiara-midina aminao ho any Ejipta ary Izaho koa no hitondra anao miakatra indray; ary ny tanan’i Josefa no hanirina ny masonao.

⁵Dia niainga i Jakoba ka niala tao Bery-Sheba. Ary ireo zanak’Israely dia nitondra an’i Jakoba rainy sy ny zanany madinika ary ny vadiny tamin’ny sarety izay nalefan’i Farao hitondrana azy.

⁶Noentin’izy ireo ny omby aman’ondriny sy ny fananany izay nohariny tany amin’ny tany Kanana. Tonga tany Ejipta i Jakoba sy ny zanany rehetra niaraka taminy.

⁷Ny zanany lahy sy ny zafiny lahy niaraka taminy, ary ny zanany vavy sy ny zafiny vavy; eny, noentiny niaraka taminy ho any Ejipta avokoa ny zanany rehetra.

⁸Ireto no anaran’ny zanak’Israely izay tonga tany Ejipta, dia Jakoba sy ny zanany lahy:

⁹I Robena, lahimatoan’i Jakoba. Ny zanakalahin’i Robena dia i Hanoka, i Palo, i Hezrona ary i Karmy.

¹⁰Ny zanakalahin’i Simeona dia i Jemoela, i Jamina, i Ohada, i Jakina, i Zohara ary i Saoly, zanakalahin’ny vehivavy Kananita.

¹¹Ny zanakalahin’i Levy dia i Gersona sy i Kehata ary i Merary.

¹²Ny zanakalahin’i Joda dia i Era, i Onana, i Sela, i Fareza ary i Zera. I Era sy i Onana anefa dia maty tany amin’ny tany Kanana. Ny zanakalahin’i Fareza dia i Hezrona sy i Hamola.

¹³Ny zanakalahin’Isakara dia i Tola, i Pova, i Joba ary i Simrona.

¹⁴Ny zanakalahin’i Zebolona dia i Sereda sy i Elona ary i Jahalela.

¹⁵Ireo no zanakalahin’i Lea izay naterany tamin’i Jakoba tany Padana-Arama, ary i Dina no zanany vavy. Ny isan’ny zanany lahy rehetra mbamin’ny zanany vavy dia telo amby telopolo.

¹⁶Ny zanakalahin’i Gada dia i Zifiona, i Hagy, i Sony, i Ezbona, i Ery, i Aroda ary i Arely.

¹⁷Ny zanak’i Asera dia i Jimna, i Jisva, i Jisvy, i Beria ary i Sera, anabavin’ireo. Ny zanakalahin’i Beria dia i Hebera sy i Malkiela.

¹⁸Ireo no zanak’i Zilpa izay nomen’i Labana an’i Lea zanany vavy, ary ireo no naterany tamin’i Jakoba; enina amby folo no isan’izy rehetra.

¹⁹Ny zanakalahin’i Rahely, vadin’i Jakoba, dia i Josefa sy i Benjamina.

²⁰Ny zanakalahin’i Asenata, zanakavavin’i Poty-Fera, mpisorona tao Ona, izay naterak’i Josefa tany amin’ny tany Ejipta, dia i Manase sy i Efraima.

²¹Ny zanakalahin’i Benjamina dia i Bela, i Bekera, i Asbela, i Gera, i Namàna, i Ehy, i Rosy, i Mopima, i Hopima ary i Arda.

²²Ireo no zanakalahin’i Rahely naterany tamin’i Jakoba. Efatra amby folo no isan’izy rehetra.

²³Ary ny zanakalahin’i Dana dia i Hosima.

²⁴Ny zanakalahin’i Naftaly dia i Jaziela, i Gonỳ, i Jezera ary i Silema.

²⁵Ireo no zanakalahin’i Bila, izay nomen’i Labana an’i Rahely zanany vavy, ary ireo no naterak’i Jakoba. Fito no isan’izy rehetra.

²⁶Ny isan’izay rehetra nankany Ejipta niaraka tamin’i Jakoba, dia izay naloaky ny kibony, afa-tsy ny vadin’ny zanakalahin’i Jakoba, dia enina amby enimpolo.

²⁷Ny zanakalahin’i Josefa izay naterany tany Ejipta dia roa lahy. Ny isan’ny terak’i Jakoba rehetra izay tonga tany Ejipta dia fitopolo.

²⁸Ary nirahin’i Jakoba hialoha azy any amin’i Josefa i Joda mba hanoro lalana azy ho any Gosena. Dia tonga tany amin’ny tany Gosena izy.

²⁹Ary nampanamboatra ny kalesiny i Josefa dia niakatra hitsena an’Israely rainy tany Gosena. Raha vao hitan’Israely i Josefa dia namihina ny vozony ka nitomany ela teo.

³⁰Ary hoy Israely tamin’i Josefa: Aoka ho faty amin’izay aho, satria efa hitako ny tavanao, fa mbola velona ihany ianao!

³¹Ary hoy i Josefa tamin’ny rahalahiny sy ny ankohonan’ny rainy: Hiakatra aho hilaza amin’i Farao ka hiteny aminy hoe: Ny rahalahiko sy ny ankohonan’ny raiko, izay tany amin’ny tany Kanana, dia tonga atỳ amiko.

³²Mpiandry ondry ireo lehilahy ireo, mpiompy omby aman’ondry izy ireo. Noentiny avokoa ny ondry aman’osiny sy ny ombiny mbamin’izay rehetra ananany.

³³Koa raha miantso anareo i Farao ka miteny hoe: Inona no raharaha fanaonareo,

³⁴dia valio hoe: Miompy omby aman’ondry no raharaha fanaon’ny mpanomponao. Hatry ny fony vao zaza ka mandraka ankehitriny, dia izahay sy ny razanay. Amin’izay dia hahazo honina ao amin’ny tany Gosena ianareo satria zava-maharikoriko amin’ny Ejiptiana ny mpiandry ondry rehetra.