Read La Bible en Malgache Genesisy 48 Bible Online

Genesisy 48 - La Bible en Malgache bible

Genesisy 48

¹Rehefa afaka izany dia nisy nilaza tamin’i Josefa hoe: Indro, marary ny rainao. Dia noentiny niaraka taminy i Manase sy i Efraima, zanany mirahalahy.

²Ary nisy nilaza tamin’i Jakoba hoe: Indro, tamy ho etỳ aminao i Josefa zanakao. Dia nanatanja-tena Israely ka niarina teo ambonin’ny farafara.

³Ary hoy i Jakoba tamin’i Josefa: Andriamanitra Tsitoha efa niseho tamiko tany Lozy any amin’ny tany Kanana ary nitahy ahy ka niteny tamiko hoe:

⁴Indro, hahamaro ny taranakao Aho, hampitombo anao sy hahatonga anao ho firenena maro ary homeko ny taranakao mandimby anao ity tany ity ho lovany mandrakizay.

⁵Ankehitriny, ny zanakao mirahalahy, izay naterakao tatỳ amin’ny tany Ejipta fony tsy mbola tonga tatỳ aminao teto Ejipta aho, dia ho Ahy: Eny, ho Ahy i Efraima sy i Manase, tahaka an’i Robena sy i Simeona.

⁶Fa ny zanakao izay haterakao aorianan’izy mirahalahy kosa dia ho anao ary ny anarany dia hatao amin’ny anaran’ny rahalahiny eo amin’ny zarataniny.

⁷Raha niala tany Padana-Arama aho dia maty teo anatrehako Rahely, tany amin’ny tany Kanana, teny an-dalana, rehefa kely foana no tsy nahatongavana tao Efrata ary teo amoron’ny lalana mankany Efrata na Betlehema no nandevenako azy.

⁸Ary rehefa hitan’Israely ny zanak’i Josefa dia hoy izy: Iza moa ireo?

⁹Dia hoy i Josefa tamin’ny rainy: Zanako ireto nomen’Andriamanitra ahy tatỳ. Dia hoy Israely: Ento eto amiko ary izy mba hotsofiko rano.

¹⁰Ary satria efa pahina ny mason’Israely noho ny fahanterany ka tsy nahita intsony izy dia noentin’i Josefa nanatona azy izy mirahalahy; ary nanoroka sy namihina azy ireo Israely.

¹¹Ary hoy izy tamin’i Josefa: Tsy nanampo hahita ny tavanao intsony aho; kanjo, indro Andriamanitra nampahita ahy ny zanakao koa!

¹²Ary nampiala azy mirahalahy teo amin’ny lohalik’Israely i Josefa dia niankohoka tamin’ny tany.

¹³Dia notantanan’i Josefa izy mirahalahy: I Efraima, tamin’ny tanany havanana, ho eo ankavian’Israely, ary i Manase tamin’ny tanany havia, ho eo amin’ny ankavanan’Israely, ka noentiny nanatona azy.

¹⁴Dia natsotran’Israely ny tanany havanana ka napetrany tamin’ny lohan’i Efraima nefa izy no zandriny, fa ny tanany havia kosa no nataony teo amin’ny lohan’i Manase; izany hoe nampifandikainy ny tanany nefa i Manase no lahimatoa.

¹⁵Dia nitsodrano an’i Josefa izy ka niteny hoe: Andriamanitra izay nandehanan’i Abrahama sy Isaka razako teo anatrehany, Andriamanitra Mpiandry ahy hatrizay niainako ka mandraka androany,

¹⁶ary ilay Anjely izay Mpamonjy ahy tamin’ny loza rehetra, Izy anie hitahy ireto zaza ireto! Aoka ny anarako sy ny anaran’i Abrahama sy Isaka raiko no hanononana azy; ary hitombo ho maro dia maro eo amin’ny tany anie izy ireo!

¹⁷Rehefa hitan’i Josefa fa teo amin’ny lohan’i Efraima ny rainy no nametraka ny tanany havanana dia tsy sitrany izany ka noraisiny ny tanan’ny rainy, mba hampiala azy amin’ny lohan’i Efraima ho amin’ny lohan’i Manase,

¹⁸sady hoy i Josefa tamin’ny rainy: Tsy izao no izy, ry Ikaky! Fa ity no lahimatoa ka apetraho eo amin’ny lohany ny tananao havanana.

¹⁹Tsy nety anefa ny rainy ka niteny hoe: Fantatro ihany, anaka! Fantatro ihany! Izy koa ho tonga firenena ary koa ho lehibe; kanefa ny zandriny dia ho lehibe noho izy ary ny taranany dia ho firenena maro.

²⁰Dia nitsodrano azy ireo izy tamin’io andro io ka niteny hoe: Ny anaranareo no hoentin’ny Israely hitsofana rano, hoe: Hataon’Andriamanitra tahaka an’i Efraima sy tahaka an’i Manase anie ianao! Koa i Efraima no nataony alohan’i Manase.

²¹Ary hoy Israely tamin’i Josefa: Indro, ho faty aho. Andriamanitra anefa homba anareo ka hampody anareo indray ho any amin’ny tanindrazanareo.

²²Ary izaho dia manome anao zaratany iray ho tombony amin’ny anjaran’ny rahalahinao; zaratany nalaiko tamin’ny sabatro sy ny tsipìkako teo an-tanan’ny Amorita io.