Read La Bible en Malgache Genesisy 49 Bible Online

Genesisy 49 - La Bible en Malgache bible

Genesisy 49

¹Ary namory ireo zanany lahy i Jakoba ka niteny hoe: Mivoria ianareo mba hanambarako aminareo izay ho tonga aminareo amin’ny ho avy.

²Miangòna ka mihainoa, ry zanakalahin’i Jakoba, eny, mihainoa an’Israely rainareo:

³Ry Robena, lahimatoako ianao, heriko sy voalohan’ny tanjako; manana tombom-pisandratana, manana tombon-kery.

⁴Mandroadroatra toy ny rano anefa ianao ka tsy hanana tombony intsony, satria niakatra tamin’ny fandrianan’ny rainao ianao, ary tamin’izany no nandotoanao azy[58]. Endre, ny farafarako lahy ka niakarany!

⁵I Simeona sy i Levy dia niray saina; fiadiana mandoza ny sabany[59];

⁶tsy hiditra amin’izay fiokoany aho ary tsy hiray amin’izay fivoriany! Satria tamin’ny fahatezerany no namonoany olona ary tamin’ny fahasahisahiany no nanatraingoany omby.

⁷Ho voaozona anie ny fahatezerany, satria nasiaka izany ary ny fahavinirany, satria loza izany! Hampihahakahaka azy eny amin’i Jakoba aho ary hanely azy eny amin’ny Israely.

⁸Ry Joda[60], hoderain’ny rahalahinao ianao. Ny tananao dia ho ao amin’ny vozon’ny fahavalonao; hiankohoka eo anatrehanao ny zanaky ny rainao.

⁹Zanaka liona i Joda. Avy niremby ianao, anaka! Mamitsaka, mandry toy ny liona izy, toy ny liom-bavy, koa iza no hanaitra azy?

¹⁰Ny tehim-panjakana dia tsy hiala amin’i Joda ary ny tehim-panapahana dia tsy hiala eo anelanelan’ny tongony, mandra-pahatongan’i Silo[61] ka hanoa azy[62] ny firenena maro.

¹¹Mamatotra ny borikiny tanora eo amin’ny tahom-boaloboka izy ary ny zanaky ny borikivaviny eo amin’ny tahom-boaloboka tsara; manasa ny fitafiany amin’ny divay izy ary ny akanjony amin’ny ram-boaloboka.

¹²Mivoaramena ny masony noho ny divay ary fotsy ny nifiny noho ny ronono.

¹³I Zebolona dia honina eo amoron-dranomasina, eny amoron-dranomasina misy ny fitodian-tsambo, ary ny sisintaniny dia hifanolotra amin’i Sidona.

¹⁴Isakara dia boriky henjana mandry eny anelanelan’ny vala.

¹⁵Nony hitany fa tsara ny toeram-pialan-tsasatra sady mahafinaritra ny tany dia nanongilana ny sorony hitondra entana izy ka tonga mpanompo mandoa hetra.

¹⁶I Dana[63] dia hitsara ny olony tahaka ny iray amin’ireo fokon’ny Israely.

¹⁷I Dana dia ho menarana ao amoron-dalana, ho bibilava misy tandroka ao an-dalana izy, manaikitra ny kitrokelin’ny soavaly ka potraka miantsilany ny mpitaingina azy.

¹⁸Ny famonjenao no andrasako, TOMPO ô!

¹⁹I Gada dia misy andian-jiolahy manafika azy fa izy kosa dia hamely am-pitaka.

²⁰Ao amin’i Asera ny sakafo matavy ka izy no hanome sakafo matsiro ny mpanjaka.

²¹I Naftaly dia dieravavy tsy voafehy; mpanome teny mahafinaritra izy.

²²I Josefa dia sampana mahavokatra; eny, sampana mahavokatra eo anilan’ny loharano; ny rantsany dia mananika mihoatra ny fefy.

²³Nampahory azy ny mpitifitra, nitifitra sy nanenjika azy;

²⁴kanefa mateza hery ny tsipìkany ary mailamailaka ny sandriny, noho ny tanan’Ilay Maherin’i Jakoba, noho ny Mpiandry, izay Vatolampin’Israely,

²⁵noho Andriamanitry ny rainao ka Izy no hamonjy anao; noho ny Tsitoha ka Izy no hitahy anao, dia fitahiana avy amin’ny lanitra any ambony sy fitahiana avy amin’ny lalina, izay mamitsaka any ambany, ary fitahiana avy amin’ny nono sy ny kibo.

²⁶Ny tsodranon’ny rainao dia mahery noho ny tsodranon’ireo havoana mandrakizay sy ny zavatra mahafinaritra amin’ny tendrombohitra fahagola; ho eo an-dohan’i Josefa izany, ho eo an-tampon-dohan’ilay nalaza tamin’ny rahalahiny.

²⁷I Benjamina dia amboadia mamiravira; nony maraina izy dia homan-dremby, nony hariva mizara babo.

²⁸Ireo rehetra ireo no fokon’ny Israely roa amby folo. Izany no nolazain’ny rainy taminy sy nitsofany rano azy. Samy araka ny tsodrano izay tokony ho azy ireo avy no nitsofany rano azy ireo.

²⁹Dia nanafatra an’i Josefa i Jakoba ka niteny taminy hoe: Efa madiva hangonina any amin’ny razako aho; aleveno any amin’ny razako aho, dia ao anatin’ilay zohy izay any amin’ny sahan’i Efrona hetita,

³⁰ao anatin’ilay zohy izay any amin’ny saha Makpela, izay tandrifin’i Mamre, any amin’ny tany Kanana, dia ilay novidin’i Abrahama niaraka tamin’ny saha, tamin’i Efrona hetita, ho tany fandevenana.

³¹Tao no nandevenana an’i Abrahama sy i Saraha vadiny; tao koa no nandevenana an’Isaka sy i Rebeka vadiny; tao koa no nandevenako an’i Lea.

³²Ny saha sy ny zohy ao anatiny dia novidina tamin’ny taranak’i Heta.

³³Rehefa vitan’i Jakoba ny hafatra nataony tamin’ny zanany lahy rehetra dia navonkiny teo am-parafara ny tongony, dia niala aina izy ka nangonina any amin’ny razany.