Read La Bible en Malgache Genesisy 9 Bible Online

Genesisy 9 - La Bible en Malgache bible

Genesisy 9

¹Nitahy an’i Noa sy ny zanany Andriamanitra ka niteny hoe: Maroa fara sy mihabetsaha ary mamenoa ny tany.

²Hanan-tahotra sy hihorohoro aminareo ny bibidia rehetra sy ny voromanidina rehetra; ireny mbamin’izay rehetra mandady na mikisaka amin’ny tany sy ny hazandrano rehetra ao amin’ny ranomasina dia efa natolotra ho eo an-tananareo.

³Ny biby mihetsiketsika rehetra izay miaina dia ho fihinanareo; omeko anareo toy ny zava-maitso koa izy rehetra.

⁴Kanefa ny nofo izay mbola misy aina, dia ny rany izany, no aza haninareo.

⁵Fa hampamoahiko kosa ny ranareo satria ainareo izany; eo amin’ny tanan’ny mananaina rehetra no hampamoahako azy; ary eo amin’ny tanan’ny olona, dia eo amin’ny tanan’ny olona tsirairay, no hampamoahiko ny ain’ny olona.

⁶Izay mandatsaka ny ran’olona dia mba halatsak’olona kosa ny rany, satria tahaka ny endrik’Andriamanitra no nanaovany ny olona.

⁷Koa ny aminareo dia maroa fara sy mihabetsaha; aoka ho marobe eny ambonin’ny tany ianareo ary mihabetsaha eny.

⁸Ary Andriamanitra mbola niteny tamin’i Noa sy tamin’ireo zanany izay niaraka taminy hoe:

⁹Raha ny Amiko dia indro, manorina ny fanekeko aminareo sy amin’ny taranakareo handimby anareo Aho,

¹⁰ary amin’ny zavamananaina rehetra eo aminareo, na ny vorona na ny biby fiompy na ny bibidia rehetra eo aminareo, izay rehetra nivoaka avy tao anatin’ny sambofiara, dia ny biby samihafa rehetra.

¹¹Dia aoriko ny fanekeko aminareo ka tsy haringako amin’ny safodrano intsony ny nofo rehetra, ary tsy hisy safodrano hanimba ny tany intsony.

¹²Ary hoy ihany Andriamanitra: Izao no famantarana ny fanekena izay ataoko Amiko sy aminareo mbamin’ny zavamananaina rehetra eo aminareo hatramin’ny taranaka fara aman-dimby:

¹³Ny avako dia apetrako eo amin’ny rahona ho famantarana ny fanekena Amiko sy amin’ny tany.

¹⁴Rehefa mampiangona rahona eo ambonin’ny tany Aho ka hita eo amin’ny rahona ny avana

¹⁵dia hotsarovako ny fanekeko izay Amiko sy aminareo mbamin’ny zavamananaina, dia ny nofo rehetra; tsy hisy safodrano handringana ny nofo rehetra intsony.

¹⁶Ho eo amin’ny rahona ny avana; hitsinjo azy Aho mba hahatsiarovako ny fanekena mandrakizay izay amin’Andriamanitra sy amin’ny zavamananaina rehetra, dia ny nofo rehetra ambonin’ny tany.

¹⁷Ary hoy Andriamanitra tamin’i Noa: Izany no famantarana ny fanekena izay naoriko Amiko sy amin’ny nofo rehetra etỳ ambonin’ny tany.

¹⁸Ny zanakalahin’i Noa nivoaka avy tamin’ny sambofiara dia i Sema sy i Hama ary i Jafeta. I Hama no rain’i Kanana.

¹⁹Ireo telo lahy ireo no zanak’i Noa. Avy tamin’ireo no nielezan’ny olona tetỳ ambonin’ny tany rehetra.

²⁰Ary tonga mpamboly i Noa ka namboly voaloboka.

²¹Ary nisotro divay izy ka mamo; dia nanary lamba izy ka nitanjaka tao anatin’ny tranolainy.

²²Ary hitan’i Hama, rain’i Kanana, ny fitanjahan’ny rainy ka nambarany tamin’ny rahalahiny roa lahy teo ivelany izany.

²³Fa naka lamba i Sema sy i Jafeta ka noentin’izy mirahalahy teo an-tsorony io, ary nanao dia mianòtra izy ka nandrakotra ny fitanjahan’ny rainy; ary ny tavany dia tsy nanatrika ka tsy hitany ny fitanjahan’ny rainy.

²⁴Dia nahatsiaro i Noa rehefa afaka ny hamamoany ka nahafantatra izay nataon’ny zanany faralahy taminy.

²⁵Dia hoy izy: Ho voaozona anie i Kanana! Ho tena mpanompon’ny rahalahiny anie izy!

²⁶Ary hoy koa izy: Isaorana anie NY TOMPO, Andriamanitr’i Sema, ary aoka i Kanana ho mpanompony!

²⁷Hataon’Andriamanitra malalaka anie ny toeran’i Jafeta[8], aoka honina ao an-dain’i Sema izy[9]; ary aoka i Kanana ho mpanompony!

²⁸Ny andro niainan’i Noa taorianan’ny safodrano dia dimampolo sy telonjato taona.

²⁹Ary ny andro rehetra niainan’i Noa dia dimampolo sy sivinjato taona; dia maty izy.