Read La Bible en Malgache 2Samoela 1 Bible Online

2Samoela 1 - La Bible en Malgache bible

2Samoela 1

¹Taorianan’ny nahafatesan’i Saoly, rehefa niverina avy nanafika ny Amalekita i Davida, dia nitoetra roa andro tao Ziklaga izy.

²Tamin’ny andro fahatelo dia indro, nisy lehilahy iray tonga avy tany amin’ny miaramilan’i Saoly, rovidrovitra ny akanjony sady nihosin-tany ny lohany; rehefa tonga teo amin’i Davida izy dia niankohoka tamin’ny tany ka nitsaoka azy.

³Hoy i Davida taminy: Avy taiza moa ianao? Dia hoy izy taminy: Afaka nandositra avy tany amin’ny tobin’ny Israely aho.

⁴Hoy i Davida taminy: Inona no zava-nitranga tany? Miangavy anao aho, ambarao amiko. Dia hoy izy: Nandositra tamin’ny ady ny olona ary be koa ny miampatrampatra sy maty; maty koa i Saoly sy Jonatana zanany.

⁵Ary hoy i Davida tamin’ilay zatovo izay nanambara taminy: Ahoana no nahafantaranao fa maty i Saoly sy i Jonatana zanany?

⁶Dia nanambara taminy ilay zatovo hoe: Sendra tao an-tendrombohitra Gilboa aho no indro i Saoly nitehina tamin’ny lefony; ary indreo, ny kalesy fitondra miady sy ny mpitaingin-tsoavaly nanenjika azy mafy.

⁷Dia niherika izy ka nahita ahy; ary niantso ahy izy ka hoy aho: Inty aho.

⁸Dia hoy izy tamiko: Iza moa ianao? Dia hoy aho taminy: Amalekita aho.

⁹Hoy indray izy tamiko: Miangavy anao aho, manatòna ka vonoy aho fa fanina, nefa mbola ato anatiko ihany ny aiko.

¹⁰Dia nanatona azy aho ka namono azy, satria fantatro fa tsy ho velona intsony izy taorianan’ny nahavoa azy; dia nalaiko ny satroboninahiny teo an-dohany sy ny fehin-tanana teo amin’ny sandriny ka nentiko etỳ amin’ny tompoko izany.

¹¹Dia noraisin’i Davida ny fitafiany ka notriariny; dia mba nanao toy izany koa ny olona rehetra teo aminy.

¹²Nisaona sy nitomany ary nifady hanina izy ireo mandra-paharivan’ny andro noho ny amin’i Saoly sy i Jonatana zanany sy ny olon’NY TOMPO ary ny taranak’Israely satria lavon-tsabatra ireny.

¹³Hoy i Davida tamin’ilay zatovo izay nanao tatitra taminy: Avy aiza ianao? Ary hoy izy: Zanaky ny vahiny amalekita aho.

¹⁴Dia hoy i Davida taminy: Nahoana ianao no tsy natahotra hanainga ny tananao hamono ny voahosotry NY TOMPO?

¹⁵Dia niantso zatovo iray i Davida ka niteny hoe: Manatòna dia vonoy io; dia nasiany izy ka maty.

¹⁶Ary hoy i Davida taminy: Aoka ho eo amin’ny lohanao ny ranao, satria ny vavanao ihany no efa niampanga anao hoe: Izaho no namono ny voahosotry NY TOMPO.

¹⁷Nisaona an’i Saoly sy i Jonatana zanany tamin’izao hira fisaonana izao i Davida,

¹⁸ary nasainy nampianarina ny taranak’i Joda* ny hira atao hoe Tsipìka; indro, voasoratra ao amin’ny bokin’i Jasara[1] izany:

¹⁹Ilay voninahitrao, ry Israely, no voalefona teo amin’ny havoananao! Indrisy! Lavo ny mahery!

²⁰Aza ambaranareo any Gata izany, aza torinareo ho fifaliana any an-dalamben’i Askelona, fandrao mifaly ny zanakavavin’ny Filistina, fandrao miravoravo ny zanakavavin’ny tsy mifora.

²¹Ianareo tendrombohitra Gilboa, aza misy ando aman’orana intsony eny aminareo, na saha mahavokatra! Satria tany no nanariana ny ampingan’ny mahery, dia ny ampingan’i Saoly ka tsy nohosorana diloilo.

²²Ny tsipìkan’i Jonatana dia tsy nihemotra raha tsy nahazo ny ran’ny maty sy ny tavin’ny mahery; ary ny sabatr’i Saoly dia tsy mba niverina foana.

²³I Saoly sy i Jonatana izay tiana sady maha te ho tia fony fahavelony dia tsy nosarahina na tamin’ny nahafatesany aza; haingam-pandeha noho ny voromahery izy ireo ary mahery noho ny liona.

²⁴Ry zanakavavin’Israely, mitomania an’i Saoly, fa nahafinaritra ny nampitafiany lamba jaky anareo sady nasiany firavaka volamena ny fitafianareo.

²⁵Indrisy! Lavo teo amin’ny ady ny mahery! Voalefona teo amin’ny havoananao i Jonatana!

²⁶Ory noho ny aminao aho, ry Jonatana rahalahiko! Nahafinaritra ahy indrindra ianao; nahagaga ny fitiavanao ahy mihoatra noho ny fitiavan’ny vehivavy.

²⁷Indrisy! Lavo ny mahery! Levona ny fiadiana!