Read La Bible en Malgache 2Samoela 12 Bible Online

2Samoela 12 - La Bible en Malgache bible

2Samoela 12

¹Ary NY TOMPO naniraka an’i Natana hankao amin’i Davida. Dia tonga tao aminy izy ka niteny taminy hoe: Nisy olona roa lahy tao an-tanàna iray, ny iray mpanankarena ary ny iray mahantra.

²Ilay mpanankarena dia nanana ondry aman’osy sy omby betsaka;

³fa ilay mahantra kosa dia tsy nanana na inona na inona afa-tsy zanak’ondrivavy kely iray monja izay novidiny; nokolokoloiny tsara io ka nitombo teo aminy sy ny zanany; sombiny tamin’ny sakafon-dRalehilahy no nohaniny, ary tamin’ny kapoakany no nisotroany, sady notrotroiny teo an-tratrany izy ka nataony toy ny zanany vavy.

⁴Ary nisy vahiny tonga tao amin’ilay mpanankarena, nefa ny ondry aman’osiny sy ny ombiny dia notsitsiny ka tsy nakany hatao sakafo ho an’ilay vahiny tonga tao aminy, fa ny zanak’ondrivavy izay an’ilay mahantra kosa no nalainy ka nataony sakafo ho an’ilay olona tonga tao aminy.

⁵Dia nirehitra mafy tamin’izany olona izany ny fahatezeran’i Davida ka hoy izy tamin’i Natana: Raha velona koa NY TOMPO, tsy maintsy hovonoina ho faty izay olona nanao izany!

⁶Ary tsy maintsy honerany avo efatra heny ilay zanak’ondrivavy noho ny nanaovany izany zavatra izany sy noho ny tsy namindrany fo.

⁷Dia hoy i Natana tamin’i Davida: Ianao izany! Izao no lazain’NY TOMPO, Andriamanitry ny Israely: Izaho nanosotra anao ho mpanjakan’ny Israely ka namonjy anao ho afaka tamin’ny tanan’i Saoly;

⁸ary nomeko anao ny tranon’ny tomponao sy ny vadin’ny tomponao ho andefimandrinao, ary nomeko anao koa ny firenena Israely sy Joda*; raha mbola tsy ampy anao izany dia ho nomeko bebe kokoa ianao.

⁹Koa nahoana ianao no nanamavo ny tenin’NY TOMPO ka nanao izay ratsy eo imasony? I Oria hetita dia nasianao ny sabatra, ary ny vadiny dia nalainao ho vadinao. Eny, novonoinao tamin’ny sabatry ny taranak’i Amona izy.

¹⁰Noho izany dia tsy hiala amin’ny taranakao mihitsy kosa ny sabatra, satria nanamavo Ahy ianao ka naka ny vadin’i Oria hetita ho vadinao.

¹¹Izao koa no lazain’NY TOMPO: Indro, Izaho efa hahatonga loza aminao avy ao amin’ny ankohonanao ihany; hesoriko eo imasonao ny vadinao ka homeko ny namanao ary handry amin’ny vadinao amin’izao antoandrobenanahary izao izy.

¹²Nanao izany tao amin’ny mangingina ianao, fa Izaho kosa haneho izany zavatra izany eo anatrehan’ny Israely rehetra, amin’izao antoandrobenanahary izao.

¹³Dia hoy i Davida tamin’i Natana: Nanota tamin’NY TOMPO aho. Hoy kosa i Natana tamin’i Davida: NY TOMPO efa nanaisotra ny helokao ka tsy ho faty ianao.

¹⁴Nefa noho ny nampitenenanao ratsy ny fahavalon’NY TOMPO tamin’izany zavatra izany dia ho faty tokoa ny zaza izay haterakao.

¹⁵Dia nody tany an-tranony i Natana. Ary NY TOMPO namely ny zaza izay nateraky ny vadin’i Oria tamin’i Davida ka narary be ny zaza.

¹⁶Dia nifona tamin’Andriamanitra ho an’ny zaza i Davida ka nifady hanina. Nony nody izy dia nandry tamin’ny tany mandritra ny alina.

¹⁷Ary nitsangana nankao aminy hampiarina azy amin’ny tany ny loholona tao an-tranony; nefa tsy nety izy sady tsy nety niara-nihinan-kanina taminy.

¹⁸Nony nandray hafitoana dia maty ny zaza. Ary natahotra hilaza ny nahafatesan’ny zaza taminy ny mpanompon’i Davida. Hoy izy ireo: Indro, fony mbola velona aza ny zaza, raha niteny taminy isika dia tsy nohenoiny ny feontsika, koa hataontsika ahoana no filaza aminy ny fahafatesan’ny zaza? Mety hanimba tena izy.

¹⁹Nony hitan’i Davida anefa fa nitakoritsika ny mpanompony dia fantany fa maty ny zaza ka hoy izy tamin’ny mpanompony: Maty va ny zaza? Ary hoy ireo: Maty.

²⁰Dia niarina tsy nandry tamin’ny tany intsony i Davida ary nandro sy nihosotra diloilo ary nanova ny fitafiany dia nankao amin’ny tranon’NY TOMPO ka niankohoka; ary nody tany an-tranony izy ka niantso mba hisy handroso sakafo eo anoloany; dia nihinana izy.

²¹Ary hoy ny mpanompony taminy: Inona izao zavatra ataonao izao? Fony mbola velona ny zaza dia nifady hanina sy nitomany ianao, fa rehefa maty ny zaza dia niarina sy nihinan-kanina kosa.

²²Hoy izy: Fony mbola velona ny zaza dia nifady hanina sy nitomany tokoa aho, fa hoy aho: Iza moa no mahalala na mba hamindra fo amiko NY TOMPO ka hahavelona ny zaza, na tsia?

²³Kanjo maty izy izao, koa nahoana aho no mbola hifady hanina ihany? Mahay mampiverina azy va aho? Izaho no hankany aminy, fa izy dia tsy hiverina etỳ amiko intsony.

²⁴Nampionona an’i Batseba vadiny i Davida; niditra tao aminy izy ka nandry taminy; ary niteraka zazalahy izy ka ny anarany dia nataony hoe Solomona[8]. Ary tia azy NY TOMPO

²⁵ka naniraka an’i Natana mpaminany hanao ny anaran’ny zaza hoe Jedidia[9], noho ny amin’NY TOMPO.

²⁶Namely an’i Raban’ny taranak’i Amona i Joaba ka nahazo ny tanànan’ny mpanjaka.

²⁷Dia nandefa iraka tany amin’i Davida i Joaba hilaza hoe: Namely an’i Raba aho ka nahazo ny tanàna misy rano.

²⁸Koa ankehitriny, vorio ny olona sisa ka mitobia hamely ny tanàna ary aoka ho azonao izy, fandrao izaho no hahazo ny tanàna; dia hotononina araka ny anarako izy.

²⁹Ary namory ny vahoaka rehetra i Davida dia nankany Raba ka namely azy ary nahazo azy.

³⁰Dia nesoriny ny satroboninahitra teny an-dohan’ilay mpanjaka, talenta* volamena iray no lanjany, sady nisy vatosoa. Nisatrohan’i Davida izany. Ary navoakany avy tao an-tanàna ny babo be dia be azony.

³¹Koa ny olona izay navoakany dia nasainy niasa teo amin’ny tsofa sy ny ragiragy lehibe mbamin’ny famaky vy ary tao amin’ny fandoroam-biriky; toy izany no nataony tamin’ny tanànan’ny taranak’i Amona rehetra. Dia niverina nankany Jerosalema i Davida sy ny vahoaka rehetra.