Read La Bible en Malgache 2Samoela 2 Bible Online

2Samoela 2 - La Bible en Malgache bible

2Samoela 2

¹Rehefa afaka izany dia nanontany NY TOMPO i Davida hoe: Hiakatra ho any amin’ny tanana iray any Joda* va aho? Dia hoy NY TOMPO taminy: Miakara! Hoy i Davida: Aiza no hiakarako? Dia hoy Izy: Any Hebrona.

²Dia niakatra nankany i Davida mbamin’ny vadiny roa, dia i Ahinoama jezirelita sy i Abigaila, ilay novadin’i Nabala karmelita.

³Ny olona izay tao amin’i Davida mbamin’ny ankohonan’ireo koa dia samy noentiny niakatra ary nonina tao amin’ny tanànan’i Hebrona izy ireo.

⁴Dia avy ny lehilahin’ny Joda ka nanosotra an’i Davida tao mba ho mpanjaka amin’ny taranak’i Joda. Ary nisy nanambara tamin’i Davida hoe: Ny olona any Jabesy-Gileada no nandevina an’i Saoly.

⁵Dia nandefa iraka hankany amin’ny mponina any Jabesy-Gileada i Davida hilaza aminy hoe: Hotahin’NY TOMPO anie ianareo noho ny soa nataonareo tamin’i Saoly tomponareo tamin’ny nandevenanareo azy.

⁶Koa haneho famindrampo sy fahamarinana aminareo anie NY TOMPO, sady izaho koa dia efa manao izao soa izao aminareo noho ny nanaovanareo izany zavatra izany.

⁷Ary ankehitriny, aoka hampaherezina anie ny tananareo, ary aoka hatanjaka ianareo; fa maty i Saoly tomponareo, koa izaho no nohosoran’ny fokon’i Joda ho mpanjaka eo aminy.

⁸Fa i Abnera, zanak’i Nera, komandin’ny miaramilan’i Saoly kosa, dia naka an’Isboseta, zanakalahin’i Saoly, ka nitondra azy nankany Mahanaima

⁹dia nampanjaka azy tamin’ny Gileada sy ny Asorita sy i Jezirela sy i Efraima ary i Benjamina ary tamin’ny Israely rehetra.

¹⁰Efapolo taona no nahaveloman’Isboseta, zanak’i Saoly, fony izy nanomboka nanjaka tamin’ny Israely, ary roa taona no nanjakany. Ny fokon’i Joda* ihany no nomba an’i Davida.

¹¹Fito taona sy enim-bolana no nanjakan’i Davida tao Hebrona tamin’ny taranak’i Joda.

¹²Ary i Abnera, zanak’i Nera, sy ny mpanompon’Isboseta, zanak’i Saoly, dia niala tao Mahanaima ka nankany Gibeona.

¹³I Joaba, zanak’i Zeroia, sy ireo mpanompon’i Davida kosa dia nandeha ka tafahaona tamin’ireo teo amoron’ny kamory tao Gibeona; dia samy nipetraka teo amin’ny lafin’ny kamory avy izy.

¹⁴Ary hoy i Abnera tamin’i Joaba: Miangavy anao aho, aoka hitsangana ny zatovo hanao kilalao eto anatrehantsika. Hoy i Joaba: Aoka ary izy hitsangana.

¹⁵Dia nisy nitsangana ka nita, roa amby folo lahy tamin’ny Benjamina, izay an’Isboseta, zanak’i Saoly, ary roa amby folo lahy koa tamin’ny mpanompon’i Davida.

¹⁶Samy nifampisavika izy rehetra sady nifampihazon-doha ka nifandefon-tehezana tamin’ny sabatra dia niara-niankarapoka; koa izany no nanaovana izany toerana ao Gibeona izany hoe Helkata-Hazorima[2].

¹⁷Mafy ny ady tamin’izany andro izany ka resy teo anoloan’ny mpanompon’i Davida i Abnera sy ny lehilahin’ny Israely.

¹⁸Mba teo koa izy telo lahy zanak’i Zeroia, dia i Joaba sy i Abisay ary i Asahela. I Asahela dia haingam-pandeha tahaka ny gazela any an-tany efitra.

¹⁹Nanenjika an’i Abnera i Asahela ka ny fandehany nanenjika an’i Abnera dia tsy nivily mihitsy na tamin’ny ankavanana na tamin’ny ankavia.

²⁰Ary niherika i Abnera ka niteny hoe: Ianao moa izany, ry Asahela? Dia hoy izy: Izaho ity.

²¹Dia hoy i Abnera taminy: Mivilia ianao, na ho amin’ny ankavanana, na ho amin’ny ankavia; zatovo iray no sambory ka baboy ho anao izay eny aminy rehetra. Tsy nety nivily anefa i Asahela fa nanenjika azy ihany.

²²Hoy indray i Abnera tamin’i Asahela: Mivilia ianao fa aza manenjika ahy; fa nahoana moa aho no hamely anao hiankarapoka amin’ny tany, ary hataoko ahoana no fijery an’i Joaba rahalahinao?

²³Nefa tsy nety nivily ihany izy ka nasian’i Abnera ny vodilefona ny kibony dia niboroaka teo an-damosiny ny lefona ka niankarapoka teo izy ary maty niaraka tamin’izay. Ary izay rehetra tonga teo amin’ilay niankarapohan’i Asahela sy nahafatesany dia nijanona.

²⁴Nanenjika an’i Abnera i Joaba sy i Abisay ka nony tonga teo amin’ny havoanan’i Ama izay tandrifin’i Gia amin’ny lalana mankany amin’ny tany efitr’i Gibeona izy dia maty ny masoandro.

²⁵Dia niangona teo amin’i Abnera ny taranak’i Benjamina ka nivondrona ho andiany iray ary nijanona teo an-tampon’ny havoana iray.

²⁶Ary niantso an’i Joaba i Abnera hoe: Dia handany mandrakizay va ny sabatra? Tsy fantatrao va fa hangidy no hiafaran’izany? Mandra-pahoviana no tsy hampivereninao tsy hanenjika ny rahalahiny ny olona?

²⁷Hoy i Joaba: Raha velona koa Andriamanitra, raha tsy ilay teninao iny[3] dia efa lasa nody androany maraina avokoa ny olona ka tsy nanenjika ny rahalahiny akory.

²⁸Dia nitsoka ny anjomara i Joaba ka nijanona ny olona rehetra ary tsy nanenjika ny Israely na niady taminy intsony izy.

²⁹Rehefa nandeha nandritra ny alina namakivaky ny tany ngazana i Abnera sy ny olony dia nita an’i Jordana sy namakivaky an’i Bitirona manontolo ka tonga tao Mahanaima.

³⁰Nony niverina avy nanenjika an’i Abnera i Joaba dia novoriny ny olona rehetra; sivy amby folo lahy ihany mbamin’i Asahela no tsy teo ny mpanompon’i Davida.

³¹Ny mpanompon’i Davida kosa dia nahafaty enimpolo sy telonjato lahy tamin’ny Benjaminita sy ny olon’i Abnera.

³²Ary noentiny i Asahela ka naleviny tao amin’ny fasan-drainy izay tao Betlehema. Ary nandeha mandritra ny alina i Joaba sy ny olony ka tonga tao Hebrona raha vao nazava ratsy ny andro.