Read La Bible en Malgache 2Samoela 20 Bible Online

2Samoela 20 - La Bible en Malgache bible

2Samoela 20

¹Sendra nisy lehilahy iray tena ratsy fanahy teo, i Seba no anarany, zanak’i Bikry benjaminita; nitsoka ny anjomara izy sady niantsoantso hoe: Isika dia tsy manana anjara amin’i Davida na lova amin’ny zanak’i Jese! Samia mody any amin’ny tranolainy avy, ry Israely ô!

²Dia samy niara-nandao an’i Davida ny lehilahin’ny Israely ka nanaraka an’i Seba, zanak’i Bikry; fa ny lehilahin’ny Joda* no nifikitra tamin’ny mpanjakany hatrany Jordana ka hatrany Jerosalema.

³Nony tonga tao an-tranony tany Jerosalema i Davida mpanjaka dia nalainy ny vady tsindranony folo vavy izay navelany hiandry trano tao ka nataony tao an-trano fiambenana ary nomeny fivelomana, fa tsy nandriany intsony. Dia nambenana tao mandra-pahafatiny ireo ka velona tsy nanambady intsony.

⁴Hoy ny mpanjaka tamin’i Amasa: Vorio ho eto amiko ao anatin’ny hateloana ny lehilahin’ny Joda*, ary aoka mba ho eto koa ny tenanao.

⁵Dia lasa namory ny Joda i Amasa, nefa nandiso ny fotoana nifanaovana taminy izy.

⁶Ary hoy i Davida tamin’i Abisay: Ankehitriny izao dia i Seba, zanak’i Bikry, no ahitantsika loza mihoatra noho i Absaloma; koa ento ny mpanompon’ny tomponao ka enjeho izy, fandrao mahazo tanàna mimanda ka tsy ho azontsika.

⁷Dia niainga hanenjika azy ny olon’i Joaba mbamin’ny Keretita sy ny Peletita[11] ary ny lehilahy mahery rehetra; nivoaka avy tany Jerosalema ireo hanenjika an’i Seba, zanak’i Bikry.

⁸Nony tonga tao amin’ilay vato lehibe tao Gibeona izy dia avy i Amasa nitsena azy. Niakanjo fanamiana fitondra miady i Joaba ka nafehy azy teo an-tsikinany ny fehikibony mbamin’ny trano-tsabany; ary nony nandeha izy dia latsaka ny sabatra.

⁹Ary hoy i Joaba tamin’i Amasa: Tsara ihany va ianao, ry rahalahy? Dia noraisin’i Joaba tamin’ny tanany havanana ny somotr’i Amasa horohany.

¹⁰Tsy nanahinahy ny sabatra teny an-tanan’i Joaba anefa i Amasa ka nasiany tamin’ny kibony dia nivaroraka tamin’ny tany ny tsinainy, ary tsy nasiany intsony izy, fa matiny tamin’izay ihany. Ary nanenjika an’i Seba, zanak’i Bikry i Joaba sy i Abisay rahalahiny.

¹¹Dia nijanona teo anilan’ny faty ny zatovon’i Joaba iray ka niteny hoe: Izay miandany amin’i Joaba sy i Davida dia aoka hanaraka an’i Joaba.

¹²Ary nihosin-dra teo anaty lalambe i Amasa ka nony hitan-dRalehilahy fa nijanona ny olona rehetra dia nafindrany niala teo amin’ny lalambe ho any an-tsaha ny fatin’i Amasa ary nosaronany lamba, satria hitany fa nijanona izay rehetra mandalo azy.

¹³Rehefa nafindrany niala teo amin’ny lalambe izy dia nizotra nanaraka an’i Joaba ny olona rehetra hanenjika an’i Seba, zanak’i Bikry.

¹⁴Nandeha namakivaky ny fokon’ny Israely rehetra hatrany Abela-Bety-Maka sy ny Berita rehetra izy; ary nivory ireo ka mba lasa nanaraka azy.

¹⁵Dia tonga izy ireo ka nanao fahirano azy teo Abela-Bety-Maka, ary nanandratra tovon-tany teo anilan’ny tanàna izy ka teo ivelany manolotra ny manda no niankinany; ary ny olona izay nomba an’i Joaba dia namely ny manda mba handrava azy.

¹⁶Ary nisy vehivavy hendry tao an-tanàna niantso hoe: Mihainoa, mihainoa e! Miangavy anareo aho, lazao amin’i Joaba hoe: Mankanesa erỳ aminy, hono, ianao, fa misy holazainy aminao!

¹⁷Nony tonga teo akaiky izy dia hoy Ravehivavy: Ianao va no Joaba? Dia hoy izy: Eny, izaho no izy! Hoy Ravehivavy taminy: Mihainoa ny teniko mpanompovavinao. Dia hoy izy: Mihaino aho izao.

¹⁸Ary hoy Ravehivavy: Izao no fitenin’ny olona taloha: Aoka hanadina ao Abela izy; koa araka izany no nahavitany ny raharaha.

¹⁹Izaho dia isan’ny tia fihavanana sady olona mahatoky eto amin’ny Israely, fa ianao kosa dia mitady handrava renivohitra eto amin’ny Israely. Koa ahoana no hamongoranao ny lovan’NY TOMPO?

²⁰Ary namaly i Joaba hoe: Sanatria dia sanatria amiko izay handripaka sy handringana!

²¹Tsy izany tsy akory. Fa misy lehilahy avy amin’ny tany be havoana any Efraima, Seba no anarany, zanak’i Bikry, izay efa nanainga tanana hikomy amin’i Davida mpanjaka; koa izy ihany no atolory ahy; dia hiala amin’ny tanàna aho. Ary hoy Ravehivavy tamin’i Joaba: Indro, ny lohany dia hatsipy any aminao any ambadiky ny manda.

²²Dia lasa nanatona ny vahoaka Ravehivavy ka nanome azy izany torohevitra feno fahendrena izany. Dia notapahin’ireo ny lohan’i Seba, zanak’i Bikry, ka natsipiny teny amin’i Joaba. Ary nitsoka ny anjomara i Joaba ka niala tamin’ny tanàna samy ho any amin’ny tranolainy avy ny olona. Ary niverina nankany Jerosalema ho any amin’ny mpanjaka i Joaba.

²³I Joaba no komandin’ny miaramila rehetra tamin’ny Israely; i Benaia, zanak’i Joiada, no mpifehy ny Keretita sy ny Peletita[12];

²⁴i Adorama no lehiben’ny mpanao fanompoana; i Josafata, zanak’i Ahiloda, no mpitadidy ny raharaham-panjakana;

²⁵i Seva no mpanoratra; i Zadoka sy i Abiatara no mpisorona;

²⁶ary Ira jairita koa no mpisorona ho an’i Davida.