Read La Bible en Malgache 2Samoela 22 Bible Online

2Samoela 22 - La Bible en Malgache bible

2Samoela 22

¹Nanao izao hira izao ho an’NY TOMPO i Davida tamin’ny andro namonjen’NY TOMPO azy tamin’ny tanan’ny fahavalony rehetra, indrindra fa tamin’ny tanan’i Saoly.

²Hoy izy: NY TOMPO no harambatoko sy manda fiarovana ho ahy ary mpanafaka ahy,

³Andriamanitro vatolampiko, Izy no ialofako, ampingako sy tandroka* famonjena ahy Izy ary fiarovana avo ho ahy sy toeram-pandosirako; ry Mpamonjy ahy, manafaka ahy amin’ny fampahoriana Ianao.

⁴Miantso NY TOMPO izay mendrika hoderaina aho ka vonjena ho afaka amin’ny fahavaloko.

⁵Satria nihodidina tamiko ny onjan’ny fahafatesana ary ny riaky ny faharatsiam-panahy dia naha raiki-tahotra ahy.

⁶Nihodidina tamiko ny famatoran’ny fitoeran’ny maty*, nanoloana ahy ny fandriky ny fahafatesana.

⁷Fony azom-pahoriana aho dia niantso NY TOMPO, eny, Andriamanitro no nitarainako; nihaino ny feoko tao an-tempoliny Izy ary ny fitarainako dia tonga eo an-tsofiny.

⁸Nihozongozona sy nihorohoro ny tany ary ny fiorenan’ny lanitra dia nihorohoro; eny, nihozongozona ireo, satria tezitra NY TOMPO.

⁹Nisy setroka nisavoana teo am-bavorony ary afo avy teo am-bavany no nandevona sady nisy vainafo nidedadeda teo.

¹⁰Naondriny ny lanitra ka nidina Izy ary haizim-pito no teo ambanin’ny tongony.

¹¹Nitaingina kerobima* Izy ka nanidina; eny, niseho teo amin’ny ela-drivotra Izy.

¹²Nanao ny haizina ho tranony manodidina Azy Izy, dia ranobe mihandrona sy rahona matevina.

¹³Avy teo amin’ny famirapiratana teo anoloany dia nisy vainafo nidedadeda.

¹⁴Nampikotroka tany an-danitra NY TOMPO, niloa-peo ny Avo Indrindra.

¹⁵Dia nandefa zana-tsipìka Izy ka nampiely ny fahavaloko ary nampandeha tselatra ka nampifanaritaka azy.

¹⁶Dia niseho ny fanambanin’ny ranomasina ary nihanjahanja ny fanorenan’ny tany, noho ny teny mafy nataon’NY TOMPO, noho ny fifofofofon’ny fofonain’ny vavorony.

¹⁷Nanatsotra ny tanany avy tany ambony Izy ka nandray ahy; nisintona ahy niala tamin’ny ranobe Izy.

¹⁸Nanafaka ahy tamin’ny fahavaloko mahery Izy sy tamin’izay nankahala ahy, satria tsy leoko ireny.

¹⁹Nisakana ahy ireny tamin’ny andro nahitako loza, nefa NY TOMPO no nanohana ahy.

²⁰Namoaka ahy ho any amin’ny malalaka Izy; nanafaka ahy Izy satria tiany aho.

²¹Nanisy soa ahy araka ny fahamarinako NY TOMPO; araka ny fahadiovan’ny tanako no namaliany ahy.

²²Fa nitandrina ny lalan’NY TOMPO aho ka tsy mba nanao ratsy hialana tamin’Andriamanitro;

²³ny fitsipiny rehetra dia teo anatrehako ary ny didiny dia tsy mba nialako;

²⁴tsy nanan-tsiny Taminy aho sady niaro tena tsy ho azon’ny fahotako.

²⁵Koa namaly ahy araka ny fahamarinako NY TOMPO, araka ny fahadiovako teo imasony.

²⁶Ny olona tsara no isehoanao fa tsara; ny tena olona marina no isehoanao fa marina;

²⁷ny madio no isehoanao ho madio; ary ny mpiolakolaka kosa no isehoanao ho miolikolika.

²⁸Vonjenao ny olona ory; ary ny masonao dia manohitra ny mpiavonavona ka aetrinao ireny.

²⁹Fa Ianao no jiroko, TOMPO ô; mampahazava ny fahamaizinako NY TOMPO.

³⁰Ianao no ahazoako mihazakazaka hamely miaramila andiany iray; Andriamanitro no ahazoako mitsambikina mihoatra ny manda.

³¹Raha ny amin’Andriamanitra dia marina ny lalany; ny tenin’NY TOMPO dia voazaha toetra amin’ny memy; NY TOMPO no ampingan’izay rehetra mialoka Aminy.

³²Fa iza no Andriamanitra afa-tsy NY TOMPO? Iza no vatolampy afa-tsy Andriamanitsika?

³³Izany Andriamanitra izany no fiarovana mafy ho ahy; mitondra ahy amin’ny lalana tanteraka Izy.

³⁴Manao ny tongotro ho tahaka ny an’ny dieravavy Izy; mampitoetra ahy eo amin’ny havoana Izy.

³⁵Mampianatra ny tanako hiady Izy ka mahahenjana tsipìka varahina ny sandriko.

³⁶Omenao ahy ny ampingan’ny famonjenao ary mahalehibe ahy ny fahamoram-panahinao.

³⁷Halalahinao ny lalana diaviko ka tsy mangovitra ny hato-tongotro.

³⁸Manenjika ny fahavaloko aho ka mandripaka azy ary tsy miverina aho mandra-pahalany ritra azy.

³⁹Mandringana sy mandripaka azy aho ka tsy maharina izy; lavo eo ambanin’ny tongotro izy.

⁴⁰Ianao no mampisikina hery ahy mba hiady; aripakao ho eo ambaniko izay mitsangana hamely ahy.

⁴¹Ataonao miamboho ahy ny fahavaloko; ampanginiko izay mankahala ahy.

⁴²Miherikerika izy nefa tsy misy mpamonjy; eny, maniry NY TOMPO izy nefa tsy mamaly azy Izy.

⁴³Torotoroiko madinika tahaka ny vovoka izy; hoseko tahaka ny fotaka eny an-dalana izy ka aeliko.

⁴⁴Manafaka ahy amin’ny fifanoheran’ny oloko Ianao sady mitahiry ahy ho lohan’ny firenen-tsamihafa; ny firenena tsy fantatro aza dia manompo ahy.

⁴⁵Ny hafa firenena dia mikoy ahy; raha vao mahare ny lazako fotsiny ihany aza izy dia manoa ahy.

⁴⁶Ny hafa firenena dia mihaketraka ka miala amin-kovitra avy ao amin’ny manda fiarovany mafy.

⁴⁷Velona NY TOMPO; isaorana anie ny Vatolampiko! Hasandratra anie Andriamanitry ny vatolampy famonjena ahy,

⁴⁸dia Andriamanitra izay manao famaliana ho ahy ka mampietry firenena ho ambaniko,

⁴⁹dia Ilay mitondra ahy ho afaka amin’ny fahavaloko; eny, manandratra ahy ho ambonin’izay mitsangana hanohitra ahy Ianao ary manafaka ahy amin’ny mpampihorohoro.

⁵⁰Koa izany no hiderako Anao eny amin’ny firenen-tsamihafa, TOMPO ô, sy hihirako ho an’ny anaranao.

⁵¹Manao famonjena lehibe ho an’ny mpanjaka voatendriny Izy ary mamindra fo amin’ny voahosony, dia amin’i Davida sy ny taranany mandrakizay.