Read La Bible en Malgache 2Samoela 23 Bible Online

2Samoela 23 - La Bible en Malgache bible

2Samoela 23

¹Izao no teny farany nataon’i Davida: Hoy i Davida, zanak’i Jese, dia ny lehilahy izay voasandratra ho ambony, ilay voahosotry ny Andriamanitr’i Jakoba sady mpanao hira mahafinaritra ho an’ny Israely:

²Ny Fanahin’NY TOMPO no mampiteny ahy, ary ny teniny no eo amin’ny lelako;

³Andriamanitry ny Israely milaza, eny, ny Vatolampin’ny Israely miteny amiko hoe: Indro ny mpanapaka ny olona; marina izy sady manapaka amin’ny fahatahorana an’Andriamanitra;

⁴izy dia toy ny fahazavan’ny maraina, raha miposaka ny masoandro, dia ilay maraina tsy misy rahona iny; ny ahitra dia mandrobona amin’ny tany noho ny hainandro manarakaraka ny ranonorana.

⁵Moa tsy toy izany indrindra va ny taranako amin’Andriamanitra? Satria fanekena mandrakizay no nataony tamiko, voalamina amin’ny zavatra rehetra sady voatandrina; moa tsy hampitsimohiny va ny famonjena ahy rehetra sy ny faniriako rehetra?

⁶Ny tena ratsy fanahy rehetra kosa dia tahaka ny tsilo ariana, fa tsy azo raisin’ny tanana izy;

⁷Ary ny olona izay mikasika azy dia tsy maintsy mitondra vy sy zaran-defona; ary hodorana amin’ny afo avokoa amin’izay itoerany ireny.

⁸Izao no anaran’ireo lehilahy maherin’i Davida: i Joseba-Basebeta takemonita no lehiben’ny mpanafika malaza. Izy no ilay Edino eznita izay namely ny valonjato lahy ka nahafaty azy tamin’ny ady indray mandeha monja.

⁹Ny manarakaraka azy dia i Eleazara, zanak’i Dodo, zanak’i Ahoha, iray amin’izy telo lahy mahery teo amin’i Davida, raha nihantsy ny Filistina izay niangona hiady ireo ka niakatra ny lehilahy tamin’ny Israely.

¹⁰Izy no nitsangana ka namely ny Filistina mandra-pahavizan’ny tanany ka efa niraikitra tamin’ny sabatra. Ary NY TOMPO nanao famonjena lehibe tamin’io andro io. Ny haka babo ihany no sisa niverenan’ny olona hanaraka an’i Eleazara.

¹¹Manarakaraka azy dia i Sama, zanak’i Age hararita. Nony nivory ho andiany iray teo amin’ny tany nisy voanemba maniry ny Filistina dia nandositra azy ny olona.

¹²Nijoro teo afovoan’io tany io kosa anefa i Sama ka nahazo azy ary namono ny Filistina. Nanao famonjena lehibe NY TOMPO.

¹³Nisy telo lahy samy malaza avy tamin’ny telopolo lahy nidina koa ka tonga tao amin’i Davida tao amin’ny zohin’i Adolama nony fararano; ary ny miaramilan’ny Filistina dia nitoby teo amin’ny lohasahan’ny Refaìta.

¹⁴Tao amin’ny toeram-piereny i Davida tamin’izay ary ny miaramilan’ny Filistina kosa dia tao Betlehema.

¹⁵Dia nilaza ny faniriany i Davida hoe: Iza re no mba hampisotro rano ahy avy amin’ny fantsakana ao Betlehema, ilay ao akaikin’ny vavahady e!

¹⁶Dia namakivaky teo amin’ny miaramilan’ny Filistina ireo telo lahy mahery fo ka nanovo rano tamin’ny fantsakana tao Betlehema, izay teo anilan’ny vavahady, dia noentiny ho any amin’i Davida; kanjo tsy nety nisotro izy fa naidiny ho an’NY TOMPO iny.

¹⁷Fa hoy i Davida: Sanatria, TOMPO ô, raha hanao izany aho; tsy ran’ny lehilahy izay nandeha nanao vy very ny ainy va ity? Dia tsy nety nisotro izy. Izany zavatra izany no nataon’ireo telo lahy mahery fo ireo.

¹⁸I Abisay, rahalahin’i Joaba, zanak’i Zeroia, no lehibe tamin’izy telo lahy, namely ny telonjato lahy tamin’ny lefona izy ka nahafaty azy ireo, ary izy no nalaza tamin’izy telo lahy.

¹⁹Izy no be voninahitra noho izy telo lahy. Izy no lehibeny; nefa tsy nahomby noho izy telo lahy ireo izy.

²⁰Ary i Benaia, zanak’i Joiada, zanaka lehilahy mahay tany Kabezela, izay nahavita asa be, izy no namono ny roa lahy mahery tany Moaba; izy no nidina ka namono ny liona tao an-davaka fantsakana tamin’ilay andro nisy orampanala iny;

²¹ary izy koa no namono ilay Ejiptiana makadiry be. Nitondra lefona teny an-tanany ilay Ejiptiana, nefa nidina teny aminy tamin’ny tehina i Benaia ka nosarihany ny lefona teny an-tanan’ilay Ejiptiana, ary iny lefony iny ihany no namonoany azy.

²²Izany no nataon’i Benaia, zanak’i Joiada, ary tamin’izy telo lahy mahery dia izy no nalaza.

²³Nalaza noho ny telopolo lahy izy, nefa tsy nahatratra ny vitan’izy telo lahy teo. Ary nanendry azy ho isan’ny mpanolotsaina azy i Davida.

²⁴I Asahela, rahalahin’i Joaba kosa no iray amin’ny telopolo; i Elanana, zanak’i Dodo, avy any Betlehema,

²⁵i Sama harodita, i Elika harodita,

²⁶i Heleza paltita, Ira, zanak’Ikesy tekoita,

²⁷i Abiezera anatotita, i Mebonay hosatita,

²⁸i Zalmona ahohita, i Maharay netofatita,

²⁹i Haleba, zanak’i Bana netofatita, Itahy, zanak’i Ribay, avy any Gibean’ny taranak’i Benjamina,

³⁰i Benaia piratonita, i Hiday, avy any amin’ny lohasahan-driakan’i Gaasy,

³¹i Aby-Albona arbatita, i Azmaveta baromita,

³²i Eliaba salbonita, i Bene-Jasena, i Jonatana,

³³i Sama hararita, i Ahiama, zanak’i Sarara hararita,

³⁴i Elifeleta, zanak’i Ahasbay, zanaky ny Makatita, i Eliama, zanak’i Ahitofela gilonita,

³⁵i Hezray karmelita, i Paray arbita,

³⁶i Jigala, zanak’i Natana, avy any Zoba, i Bany gadita,

³⁷i Zeleka amonita, i Naharay berotita, mpitondra ny fiadian’i Joaba, zanak’i Zeroia,

³⁸Ira jitirita, i Gareba jitirita,

³⁹i Oria hetita. Fito amby telopolo no isan’izy rehetra.