Read La Bible en Malgache 2Samoela 4 Bible Online

2Samoela 4 - La Bible en Malgache bible

2Samoela 4

¹Nony ren’ny zanakalahin’i Saoly fa maty tany Hebrona i Abnera dia niraviravy tanana izy ary raiki-tahotra ny Israely rehetra.

²Ary nisy roa lahy, lehiben’ny mpiadin’ny zanakalahin’i Saoly; i Bana no anaran’ny iray ary Rekaba no anaran’ny iray, samy zanak’i Rimona berotita tamin’ny taranak’i Benjamina ireo satria i Berota koa natao ho isan’ny an’i Benjamina;

³ary nandositra nankany Gitaima ny Berotita dia nivahiny tany mandraka androany.

⁴Nanan-janakalahy malemy tongotra i Jonatana, zanak’i Saoly. Dimy taona izy fony tonga avy tany Jezirela ny filazana ny nahafatesan’i Saoly sy i Jonatana; ary noentin’ny mpitaiza azy nandositra izy; ary raha noentiny nandositra tamin’ny fahatairana izy dia nianjera ka tonga malemy tongotra; i Mefiboseta no anarany.

⁵Ary nandeha i Rekaba sy i Bana, zanak’i Rimona berotita; koa rehefa nafana ny andro dia tonga tao an-tranon’Isboseta izy ireo, tamin’ilay izy nandrinandry tamin’ny antoandro iny.

⁶Dia niditra tao an-trano i Rekaba sy i Bana rahalahiny haka vary ka namely azy tamin’ny kibony dia lasa nandositra.

⁷Fa niditra tao an-trano izy roa lahy raha iny nandry teo am-pandrianany tao amin’ny efitrano fandriany iny Isboseta. Dia namely azy izy roa lahy ka nahafaty azy. Notapahiny ny lohany ka noentiny ary nandeha nandritra ny alina namakivaky ny tany ngazana izy.

⁸Nitondra ny lohan’Isboseta tany amin’i Davida tao Hebrona izy ka niteny tamin’ny mpanjaka hoe: Indro ny lohan’Isboseta, zanak’i Saoly fahavalonao izay nitady ny ainao; fa NY TOMPO efa namaly an’i Saoly sy ny taranany androany noho ny amin’ny mpanjaka tompoko.

⁹Ary hoy i Davida tamin’i Rekaba sy i Bana rahalahiny, zanak’i Rimona berotita: Raha velona koa NY TOMPO, izay namonjy ahy tamin’ny fahoriana rehetra,

¹⁰ilay nanambara tamiko hoe: Indro, maty i Saoly, ka nihevitra ny tenany ho mpitondra teny mahafaly dia nohazoniko ka novonoiko tao Ziklaga mba hanomezako azy ny valin’ny teny mahafaly noentiny!

¹¹Koa mainka raha misy olon-dratsy mamono lehilahy marina ao an-tranony, eo am-pandrianany; moa tsy hadiniko eo an-tananareo va ny rany, ary tsy hofongorako tsy ho amin’ny tany intsony va ianareo?

¹²Dia nandidy ny zatovony i Davida hamono azy ireo ka notapahiny ny tanany sy ny tongony dia nahantony teo anilan’ny kamory tao Hebrona. Fa ny lohan’Isboseta kosa dia noentina ka nalevina tao am-pasan’i Abnera tao Hebrona.