Read La Bible en Malgache 2Samoela 5 Bible Online

2Samoela 5 - La Bible en Malgache bible

2Samoela 5

¹Tonga tao amin’i Davida tao Hebrona ny firenen’Israely rehetra ka niteny hoe: Indreto izahay, fa taolanao sy nofonao.

²Fa hatry ny fahiny koa aza, raha mbola nanjaka taminay i Saoly dia ianao no efa mpitarika ny Israely nandeha niady sy niverina avy any; ary NY TOMPO efa nilaza taminao hoe: Ianao no ho mpiandry ny Israely oloko, ianao no ho mpanapaka azy.

³Eny, tonga tao amin’ny mpanjaka tao Hebrona ny loholon’ny Israely rehetra ary nanao fanekena taminy tao Hebrona teo anatrehan’NY TOMPO i Davida mpanjaka. Dia nanosotra an’i Davida ho mpanjakan’ny Israely izy ireo.

⁴Telopolo taona i Davida fony izy nanomboka nanjaka, ary efapolo taona no nanjakany.

⁵Tao Hebrona no nanjakany tamin’ny Joda nandritra ny fito taona sy enim-bolana; ary tany Jerosalema no nanjakany tamin’ny Israely sy ny Joda* rehetra nandritra ny telo amby telopolo taona.

⁶Nankany Jerosalema hiady amin’ny Jebosita tompon-tany ny mpanjaka sy ny olony, ary hoy ireo tompon-tany tamin’i Davida: Tsy ho tafiditra ato ianao; fa na dia ny jamba sy ny mandringa aza dia hahasakana anao; ny heviny tamin’izany dia toy ny hoe: Tsy ho tafiditra ato i Davida.

⁷Kanjo azon’i Davida ihany ny manda fiarovana, dia i Ziona*, Tanànan’i Davida izany.

⁸Ary hoy i Davida tamin’io andro io: Izay mamely ny Jebosita dia aoka hananika ny lalan-drano ka hamely ny mandringa sy ny jamba izay halan’ny fon’i Davida. Izany no nahatonga ny fitenenana hoe: Izay jamba sy mandringa tsy hiditra ao amin’ny Trano.

⁹Dia nitoetra tao anatin’ny manda fiarovana i Davida ka ny anarany nataony hoe Tanànan’i Davida. Ary narafitr’i Davida ny manodidina, hatrany Milo, mbamin’ny ao anatiny.

¹⁰Dia nandroso nisandratra i Davida, satria NY TOMPO, Andriamanitra Tompon’izao rehetra izao, no nomba azy.

¹¹Nandefa iraka tany amin’i Davida Hirama, mpanjakan’i Tiro, ka nampanatitra hazo sedera ary nandefa mpandrafitra sy tambato; dia nanorina trano ho an’i Davida ireo.

¹²Dia fantatr’i Davida fa NY TOMPO no nampitoetra azy ho mpanjakan’ny Israely ka nanandratra ny fanjakany noho ny amin’ny Israely olony.

¹³Mbola naka vady tsindrano sy vady hafa tany Jerosalema koa i Davida rehefa tonga avy tany Hebrona; ary nisy zanakalahy sy zanakavavy koa naterak’i Davida.

¹⁴Izao no anaran’ny naterany tany Jerosalema: Samoa, Sobaba, Natana, Solomona,

¹⁵Jibara, Elisoa, Nafega, Jafia,

¹⁶Elisama, Eliada ary Elifeleta.

¹⁷Nony ren’ny Filistina fa efa nohosoran’ny olona ho mpanjakan’ny Israely i Davida dia niakatra hitady azy ny Filistina rehetra. Rehefa ren’i Davida anefa izany dia nidina tao amin’ny manda fiarovana izy.

¹⁸Dia tonga ny Filistina ka nihahakahaka teny amin’ny Lohasahan’ny Refaìta.

¹⁹Nanontany NY TOMPO i Davida hoe: Hiakatra hamely ny Filistina va aho? Hatolotrao eo an-tanako va izy? Dia hoy NY TOMPO tamin’i Davida: Miakara, fa hatolotro eo an-tananao tokoa ny Filistina.

²⁰Ary tonga tao Baala-Perazima[5] i Davida ka namely ireo tao; dia hoy izy: NY TOMPO efa namaky ny fahavaloko teo anoloako hipariaka toy ny rano vaky, koa izany no nanaovany ny anaran’izany tany izany hoe Baala-Perazima.

²¹Nilaozan’izy ireo tao ny sampiny ka lasan’i Davida sy ny olony.

²²Niakatra indray ny Filistina ka nihahakahaka teny amin’ny lohasahan’ny Refaìta.

²³Ary nanontany NY TOMPO i Davida ka novaliny hoe: Aza mandeha; fa hodidino avy eo aoriana izy ka ho tonga eo aminy tandrifin’ny hazo balisama ianao.

²⁴Ary raha mahare fingadongadon’ny olona eny amin’ny tendron’ny hazo balisama ianao dia haingàna; fa amin’izay no efa miainga mialoha anao NY TOMPO hamely ny miaramilan’ny Filistina.

²⁵Dia nanatanteraka araka ny nandidian’NY TOMPO azy i Davida ka namely ny Filistina hatrany Geba ka hatrany akaikin’i Gezera.