Read La Bible en Malgache 2Samoela 6 Bible Online

2Samoela 6 - La Bible en Malgache bible

2Samoela 6

¹Novorin’i Davida indray ny lehilahy voafantina rehetra tamin’ny Israely, telo alina no isany.

²Ary niainga i Davida sy ny olona rehetra izay nanaraka azy ka niala tany Baala-Joda mba hampiakatra ny vata misy ny faneken’Andriamanitra izay niantsoana ny anaran’Andriamanitra, Tompon’izao rehetra izao, izay mipetraka eo amin’ny kerobima*.

³Nataony teo amin’ny sarety vaovao ny vata misy ny faneken’Andriamanitra ka noentiny avy tao an-tranon’i Abinadaba teo an-kavoana; i Oza sy i Ahio, zanak’i Abinadaba, no nampandeha ny sarety vaovao.

⁴Dia noentiny niala tao an-tranon’i Abinadaba teo an-kavoana niaraka tamin’ny vata misy ny faneken’Andriamanitra izany; i Ahio no nandeha teo alohan’ny vata misy ny Fanekena.

⁵I Davida sy ny taranak’Israely rehetra kosa dia nitsinjaka teo anatrehan’NY TOMPO tamin’ny karazan-javamaneno samihafa natao tamin’ny hazo kipreso, dia tamin’ny lokanga, ny valiha, ny ampongatapaka, ny korintsana ary ny kipantsona.

⁶Nony tonga teo amin’ny famoloanan’i Nakona izy ireo dia nanatsotra ny tanany tamin’ny vata misy ny faneken’Andriamanitra i Oza ka nihazona azy, satria nibolisatra ny omby.

⁷Dia nirehitra tamin’i Oza ny fahatezeran’NY TOMPO ka namely azy teo Andriamanitra noho ny fahadisoany. Maty teo anilan’ny vata misy ny faneken’Andriamanitra izy.

⁸Dia tezitra i Davida noho ny namelezan’NY TOMPO an’i Oza ka nataony hoe Pereza-Oza[6] ny anaran’izany tany izany mandraka androany.

⁹Natahotra NY TOMPO i Davida tamin’izany andro izany ka niteny hoe: Nahoana no hoentina atỳ amiko ny vata misy ny faneken’NY TOMPO?

¹⁰Ary tsy nety namindra ny vata misy ny faneken’NY TOMPO ho ao aminy ao an-Tanànan’i Davida i Davida fa naviliny ho ao an-tranon’i Obeda-Edoma gatita izany.

¹¹Nipetraka telo volana tao an-tranon’i Obeda-Edoma gatita ny vata misy ny faneken’NY TOMPO; dia notahin’NY TOMPO i Obeda-Edoma sy ny ankohonany rehetra.

¹²Ary nambara tamin’i Davida mpanjaka hoe: NY TOMPO efa nitahy ny ankohonan’i Obeda-Edoma sy izay nananany rehetra noho ny vata misy ny faneken’Andriamanitra. Dia nandeha i Davida ka nampiakatra ny vata misy ny faneken’Andriamanitra tamim-pifaliana avy tao an-tranon’i Obeda-Edoma ho any an-Tanànan’i Davida.

¹³Rehefa namindra inenina ny mpitondra ny vata misy ny faneken’NY TOMPO dia namono omby sy zanak’omby mifahy izy hatao fanatitra.

¹⁴Ary nandihy tamin’ny heriny rehetra teo anatrehan’NY TOMPO i Davida sady nisalotra efoda* vita tamin’ny lamba rongony.

¹⁵Dia nampiakatra ny vata misy ny faneken’NY TOMPO tamin’ny hoby sy ny feon’ny anjomara i Davida sy ny taranak’Israely rehetra.

¹⁶Nony tonga teo an-Tanànan’i Davida ny vata misy ny faneken’NY TOMPO dia nitsirika teo am-baravarankely i Mikala, zanakavavin’i Saoly, ka nahita an’i Davida mpanjaka nibitaka sy nandihy teo anatrehan’NY TOMPO. Dia nanabanty azy tao am-pony izy.

¹⁷Ary nampidirina ny vata misy ny faneken’NY TOMPO ka napetraka teo amin’ny fitoerany tao anatin’ny tranolay izay naorin’i Davida hitoerany; ary nanolotra fanatitra dorana manontolo sy fanati-pihavanana teo anatrehan’NY TOMPO i Davida.

¹⁸Nony voatolotr’i Davida ny fanatitra dorana manontolo sy ny fanati-pihavanana dia nitsodrano ny vahoaka tamin’ny anaran’Andriamanitra, Tompon’izao rehetra izao, izy.

¹⁹Nomeny mofo iray sy hena didiny iray ary mofo voaloboka iray avy ny olona rehetra, izany hoe ny Israely rehetra, na lahy na vavy. Dia samy nody tany an-tranony avy ny olona rehetra.

²⁰Mba nody koa i Davida hitsodrano ny ankohonany. Fa tonga nitsena an’i Davida i Mikala, zanakavavin’i Saoly ary hoy izy: Akory ity voninahitry ny mpanjakan’ny Israely androany! Ilay nanary lamba anikeheo teo imason’ny zanakavavin’ny mpanompony, tahaka ny adala manary lamba ka tsy manan-kenatra.

²¹Hoy kosa i Davida tamin’i Mikala: Teo anatrehan’NY TOMPO, izay nifidy ahy fa tsy ny rainao sy ny ankohonany rehetra ka nanendry ahy ho mpanapaka ny Israely, olon’NY TOMPO, eny, teo anatrehan’NY TOMPO no nandihizako.

²²Ary mbola hidina ambany kokoa noho izany aza aho ka hataoko tsinontsinona ny tenako; nefa hiaraka hanam-boninahitra amin’ireo tovovavy lazainao ireo kosa aho.

²³Tsy nanan-janaka intsony i Mikala, zanakavavin’i Saoly, mandra-pahafatiny.