Read La Bible en Malgache 2Samoela 8 Bible Online

2Samoela 8 - La Bible en Malgache bible

2Samoela 8

¹Nony afaka izany dia nandresy ny Filistina i Davida ka nampietry azy; ary nesorin’i Davida tamin’ny tanan’ny Filistina ny fitondrana.

²Nandresy ny Moabita koa izy dia nampandriany tamin’ny tany ireo ary norefesiny tamin’ny kofehy, koa ny indroan’ny kofehy dia novonoiny ary ny iray kofehy kosa dia novelominy; dia tonga mpanompon’i Davida ny Moabita ka nandoa hetra.

³Dia resin’i Davida koa i Hadadezera, zanak’i Rehoba, mpanjakan’i Zoba, tamin’izy nampody ny fanjakany tany amoron’ny ony Eofrata.

⁴Nahazo babo taminy i Davida, dia miaramila an-tsoavaly fitonjato sy arivo sy miaramila an-tongotra roa alina; ary notraingotraingoin’i Davida avokoa ny soavalin’ny kalesy fitondra miady rehetra, fa ny tokony ho amin’ny kalesy zato ihany no navelany.

⁵Tonga hanampy an’i Hadadezera mpanjakan’i Zoba ny Arameana avy tany Damaskosy; dia nahafatesan’i Davida olona roa arivo sy roa alina koa ny Arameana.

⁶Nametrahan’i Davida miaramila koa tany amin’ny Arameana any Damaskosy; dia tonga mpanompon’i Davida ny Arameana ka nandoa hetra. Fa NY TOMPO nampandresy an’i Davida tany amin’izay rehetra nalehany.

⁷Nalain’i Davida ny ampinga volamena izay teny amin’ny mpanompon’i Hadadezera ka noentiny nankany Jerosalema.

⁸Tao Beta sy Berotahy, tanànan’i Hadadezera i Davida mpanjaka no namabo varahina be dia be.

⁹Nony ren’i Toy, mpanjakan’i Hamata fa efa naharesy ny miaramilan’i Hadadezera rehetra i Davida,

¹⁰dia nirahin’i Toy hankany amin’i Davida mpanjaka i Jorama zanany mba hiarahaba azy sy hisaotra azy noho ny niadiany tamin’i Hadadezera sy ny nandreseny azy; fahavalon’i Toy mantsy i Hadadezera. Nitondra fanaka volafotsy sy fanaka volamena ary fanaka varahina i Jorama.

¹¹Dia nohamasinin’i Davida mpanjaka ho an’NY TOMPO koa izany mbamin’ny volafotsy sy ny volamena izay nohamasininy avy tamin’ny firenena rehetra izay efa resiny,

¹²dia tamin’i Arama sy i Moaba sy ny taranak’i Amona, ny Filistina, ny Amalekita ary ny babo azony tamin’i Hadadezera, zanak’i Rehoba, mpanjakan’i Zoba.

¹³Ary nahazo laza i Davida nony niverina avy nandresy ny Arameana valo arivo sy iray alina teo amin’ny Lohasahantsira.

¹⁴Nametrahany miaramila tany Edoma; eny, nametrahany miaramila i Edoma manontolo ka tonga mpanompon’i Davida ny mponina rehetra tany Edoma. Ary nampandresy an’i Davida NY TOMPO teny amin’izay rehetra nalehany.

¹⁵Nanjaka tamin’ny Israely rehetra i Davida ka nitsara sy nitondra marina ny vahoakany rehetra.

¹⁶I Joaba, zanak’i Zeroia, no komandin’ny miaramila; i Josafata, zanak’i Ahiloda, no mpitadidy ny raharaham-panjakana;

¹⁷i Zadoka, zanak’i Ahitoba, sy i Ahimeleka, zanak’i Abiatara, no mpisorona; ary i Seraia no mpitantsoratra;

¹⁸ary i Benaia zanak’i Joiada, no komandin’ny Keretita sy ny Peletita[7] ary ny zanak’i Davida no mpisorona.