Read La Bible en Malgache 1Mpanjaka 1 Bible Online

1Mpanjaka 1 - La Bible en Malgache bible

1Mpanjaka 1

¹Efa zokiolona sady nandroso fahanterana i Davida mpanjaka; nototofana lamba maromaro izy nefa tsy nety nafana.

²Dia hoy ny mpanompony taminy: Aoka hitadiavana zazavavy virijiny ny mpanjaka tompoko; aoka hanompo ny mpanjaka izy ka ho mpitaiza azy, ary aoka handry eo amin’ny tratranao izy dia hampafana ny mpanjaka tompoko!

³Dia nitady zazavavy tsara tarehy manerana ny tanin’ny Israely rehetra izy ireo ka nahita an’i Abisaga sonemita izay noentiny tany amin’ny mpanjaka.

⁴Tena tsara tarehy Razazavavy. Tonga mpitaiza ny mpanjaka sady nanompo azy izy. Ny mpanjaka anefa dia tsy nanam-piraisana taminy.

⁵Ary nanandratra ny tenany i Adonia, zanakalahin’i Hagita, ka nilaza hoe: Izaho no hanjaka. Dia nanomana kalesy fitondra miady sy mpitaingin-tsoavaly ary dimampolo lahy ho mpihazakazaka eo alohany izy.

⁶Hatrizay niainany dia tsy mbola niteny mafy azy akory ny rainy hoe: Nahoana ianao no manao toy izao? Izy moa dia lehilahy tsara tarehy tokoa, ary izy no nateraky ny reniny nanarakaraka an’i Absaloma.

⁷Niresaka tamin’i Joaba, zanak’i Zeroia sy i Abiatara mpisorona izy; niandany tamin’i Adonia izy roa lahy ireo sady nanampy azy.

⁸Fa i Zadoka mpisorona, i Benaia, zanak’i Joiada, i Natana mpaminany, i Simey, i Rey ary ireo lehilahy mahery fo izay an’i Davida kosa dia tsy mba niandany tamin’i Adonia.

⁹Ary namono ondry aman’osy sy omby ary zanak’omby mifahy teo akaikin’ny vato Zoheleta teo anilan’i Eny-Rogela i Adonia ka nanasa ny rahalahiny, izay zanakalahin’ny mpanjaka rehetra sy ny lehilahin’ny Joda rehetra izay mpanompon’ny mpanjaka.

¹⁰Fa i Natana mpaminany, i Benaia, ny lehilahy mahery ary i Solomona rahalahiny kosa tsy mba nasainy.

¹¹Hoy i Natana tamin’i Batseba, renin’i Solomona: Moa tsy renao va fa efa tonga mpanjaka i Adonia, zanak’i Hagita, nefa tsy fantatr’i Davida tompontsika akory izany?

¹²Koa etsy homeko saina ianao mba hamonjenao ny ainao sy ny ain’i Solomona zanakao.

¹³Mandehana mankao amin’i Davida mpanjaka ka lazao aminy hoe: Tsy nianiana tamiko mpanompovavinao va ianao, ry mpanjaka tompoko hoe: I Solomona zanakao lahy no hanjaka handimby ahy, ary izy no hipetraka eo amin’ny sezafiandrianako? Koa nahoana no i Adonia indray no tonga mpanjaka?

¹⁴Ary raha mbola miteny amin’ny mpanjaka ianao dia hiditra manaraka anao koa aho ka hanamarina ny teninao.

¹⁵Dia nankao amin’ny mpanjaka tao amin’ny efitrano fatoriany i Batseba. Efa antitra tokoa moa ny mpanjaka, ary i Abisaga sonemita no nanompo azy.

¹⁶Dia niondrika i Batseba ka niankohoka teo anatrehan’ny mpanjaka. Hoy ny mpanjaka: Inona no ilainao?

¹⁷Hoy izy taminy: Tompokolahy ô, tamin’NY TOMPO Andriamanitrao no nianiananao ka nanomezanao toky ahy mpanompovavinao hoe: I Solomona zanakao lahy no hanjaka handimby ahy, ary izy no hipetraka eo amin’ny sezafiandrianako.

¹⁸Kanjo izao indro, i Adonia no tonga mpanjaka, kanefa tsy fantatrao izany, ry mpanjaka tompoko!

¹⁹Efa namono omby sy zanak’omby mifahy ary ondry aman’osy betsaka izy ary efa nanasa ny zanakalahin’ny mpanjaka rehetra sy i Abiatara mpisorona ary i Joaba, lehiben’ny miaramila, fa i Solomona mpanomponao ihany no tsy mba nasainy.

²⁰Ary ianao, ry mpanjaka tompoko ô, ny mason’ny Israely rehetra no manandrandra anao mba hilazanao izay hipetraka eo amin’ny sezafiandriananao handimby anao, ry mpanjaka tompoko ô!

²¹Fa rehefa lasa modimandry any amin’ny razany ny mpanjaka tompoko, dia izaho sy i Solomona zanako no homena heloka.

²²Raha mbola niteny tamin’ny mpanjaka Ravehivavy, dia indro, niditra koa i Natana mpaminany.

²³Nisy nanambara tamin’ny mpanjaka hoe: Indro i Natana mpaminany! Dia niditra teo anatrehan’ny mpanjaka izy ka niankohoka tamin’ny tany teo anatrehany.

²⁴Ary hoy i Natana: Ry mpanjaka tompoko ô, fa angaha efa niteny ianao hoe: I Adonia no hanjaka handimby ahy, ary izy no hipetraka eo amin’ny sezafiandrianako?

²⁵Fa nidina izy androany ka namono omby, zanak’omby mifahy, ondry aman’osy betsaka ary nanasa ny zanakalahin’ny mpanjaka rehetra sy ireo lehiben’ny miaramila sy i Abiatara mpisorona; ary indreo izy mihinana sy misotro eo anatrehany sady miteny hoe: Ho ela velona anie i Adonia mpanjaka!

²⁶Fa izaho mpanomponao, i Zadoka mpisorona, i Benaia, zanak’i Joiada ary i Solomona mpanomponao ihany no tsy mba nasainy.

²⁷Moa avy tamin’ny mpanjaka tompoko va no nahatonga izany zavatra izany ka tsy mba nampahafantarinao ny mpanomponao izay hipetraka eo amin’ny sezafiandriananao handimby anao, ry mpanjaka tompoko?

²⁸Ary hoy i Davida mpanjaka: Antsoy hankaty amiko i Batseba! Dia niditra nankeo anatrehan’ny mpanjaka izy ka nitsangana teo anatrehany.

²⁹Ary nianiana ny mpanjaka hoe: Raha velona koa NY TOMPO, izay namonjy ny aiko tamin’ny fahoriana rehetra,

³⁰dia tahaka ilay nianianako tamin’NY TOMPO, Andriamanitry ny Israely, ka nilazako hoe: I Solomona zanakao lahy no hanjaka handimby ahy ary izy no hipetraka eo amin’ny sezafiandrianako hisolo ahy, dia izany ihany no hataoko anio.

³¹Ary niondrika i Batseba dia niankohoka tamin’ny tany teo anatrehan’ny mpanjaka ka niteny hoe: Ho velona mandrakizay anie i Davida mpanjaka tompoko!

³²Ary hoy i Davida mpanjaka: Antsoy hankaty amiko i Zadoka mpisorona sy i Natana mpaminany ary i Benaia, zanak’i Joiada. Dia niditra nankeo anatrehan’ny mpanjaka izy telo lahy.

³³Hoy ny mpanjaka tamin’izy ireo: Ento miaraka aminareo ny mpanompon’ny tomponareo ary ampitaingeno ny ampondravaviko i Solomona zanako lahy ka ento midina any Gihona izy.

³⁴Ary aoka hanosotra azy any ho mpanjakan’ny Israely i Zadoka mpisorona sy i Natana mpaminany. Tsofinareo avy eo ny anjomara ka lazao hoe: Ho ela velona anie i Solomona mpanjaka!

³⁵Dia miakara manaraka azy ianareo ary aoka hiditra izy ka hipetraka eo amin’ny sezafiandrianako; fa izy no ho mpanjaka hisolo ahy, satria izy no voatendriko ho mpitondra ny Israely sy ny Joda.

³⁶Ary namaly ny mpanjaka i Benaia, zanak’i Joiada hoe: Amena! Hiteny tahaka izany koa anie NY TOMPO, Andriamanitry ny mpanjaka tompoko!

³⁷Toy ny nomban’NY TOMPO ny mpanjaka tompoko anie no mba hombany an’i Solomona koa, ary hataony be voninahitra mihoatra noho ny sezafiandrianan’i Davida mpanjaka tompoko anie ny sezafiandrianan’i Solomona!

³⁸Dia nidina i Zadoka mpisorona, i Natana mpaminany, i Benaia, zanak’i Joiada, ary ny Keretita sy ny Peletita[1] ka nampitaingenin’izy ireo ny ampondravavin’i Davida mpanjaka i Solomona ary noentiny nankany Gihona.

³⁹Ary naka ny tandroka misy diloilo tao amin’ny tranolay i Zadoka mpisorona ka nanosotra an’i Solomona. Notsofina avy eo ny anjomara sady hoy ny vahoaka rehetra: Ho ela velona anie i Solomona mpanjaka!

⁴⁰Dia niakatra nanaraka azy ny vahoaka rehetra sady nitsoka sodina no nifaly indrindra ka nila hitresaka ny tany noho ny feony.

⁴¹Ren’i Adonia sy ireo olona rehetra izay nasaina teo aminy izany rehefa nitsahatra nihinana izy ireo. Dia hoy i Joaba nony nahare ny feon’ny anjomara: Inona re izao hotakotaka mampitabataba ny tanàna izao?

⁴²Fa raha mbola niteny izy dia indro tonga i Jonatana, zanak’i Abiatara mpisorona. Dia hoy i Adonia taminy: Mandrosoa, fa lehilahy azo antoka ianao ka vaovao tsara no hoentinao.

⁴³Nefa hoy i Jonatana tamin’i Adonia: Tsia! Tsy izany velively fa i Davida mpanjaka tompontsika dia nanangana an’i Solomona ho mpanjaka.

⁴⁴Ary ny mpanjaka no naniraka an’i Zadoka mpisorona, i Natana mpaminany, i Benaia, zanak’i Joiada ary ny Keretita sy ny Peletita hiaraka aminy ka nampitaingenin’ireo ny ampondravavin’ny mpanjaka izy.

⁴⁵Dia nohosoran’i Zadoka mpisorona sy i Natana mpaminany ho mpanjaka tao Gihona izy. Niakatra avy teo izy ireo sady nifaly ka naresaka be terỳ ny tanàna. Izany no tabataba renareo.

⁴⁶Ary i Solomona aza izao dia efa mipetraka eo amin’ny sezafiandrianan’ny fanjakana.

⁴⁷Dia tonga koa ny mpanompon’ny mpanjaka hisaotra an’i Davida mpanjaka tompontsika hoe: Hataon’Andriamanitrao ho tsara noho ny anaranao anie ny anaran’i Solomona, ary hataony ho be voninahitra mihoatra noho ny sezafiandriananao anie ny sezafiandrianany! Dia niankohoka teo am-parafara ny mpanjaka

⁴⁸ka niteny hoe: Isaorana anie NY TOMPO, Andriamanitry ny Israely, izay nanolotra ny mpandimby ahy eo amin’ny sezafiandrianako androany, sady hitan’ny masoko koa izany.

⁴⁹Dia raiki-tahotra izay rehetra nasain’i Adonia ka niainga ary samy lasa nandeha tamin’izay nalehany avy izy rehetra.

⁵⁰Natahotra an’i Solomona koa i Adonia dia niainga ka lasa nihazona mafy ny tandroky ny alitara.

⁵¹Ary nisy nanambara tamin’i Solomona hoe: Indro, i Adonia matahotra an’i Solomona mpanjaka; koa ao izy mihazona ny tandroky ny alitara sady miteny hoe: Aoka hianiana amiko aloha i Solomona mpanjaka fa tsy hamono ahy mpanompony amin’ny sabatra!

⁵²Fa hoy i Solomona: Raha hita fa lehilahy azo antoka izy dia tsy hisy na dia singam-bolony iray akory aza ho latsaka amin’ny tany; fa raha ahitana heloka kosa aminy dia ho faty ihany izy!

⁵³Dia nandefa iraka hampidina azy hiala tamin’ny alitara i Solomona mpanjaka. Tonga niankohoka teo anatrehan’i Solomona mpanjaka izy ary hoy i Solomona taminy: Modia any an-tranonao.