Read La Bible en Malgache 1Mpanjaka 12 Bible Online

1Mpanjaka 12 - La Bible en Malgache bible

1Mpanjaka 12

¹Ary i Rehoboama dia nankany Sekema satria tonga tany ny Israely rehetra hampanjaka azy.

²Mbola tany Ejipta i Jeroboama, zanak’i Nebata, raha nandre izany; tany Ejipta mantsy no nalehany tamin’izy nandositra an’i Solomona mpanjaka ka nonina tany izy.

³Nandefa iraka haka azy ny olona, dia tonga izy sy ny fiangonana, dia ny Israely rehetra, ka niteny tamin’i Rehoboama hoe:

⁴Rainao dia nampitondra zioga mavesatra anay; fa ianao kosa, mba hamaivano ankehitriny ny fanompoana mafy tamin’ny rainao sy ny zioga mavesatra izay nataony taminay, dia hanompo anao izahay.

⁵Nefa hoy izy tamin’izy ireo: Mandehana aloha, fa raha afaka hateloana dia miverena atỳ amiko indray. Dia lasa ny olona.

⁶Naka hevitra tamin’ny zokiolona izay nanompo an’i Solomona rainy fony fahavelony i Rehoboama mpanjaka ka hoy izy: Ahoana no hevitra omenareo mba havaly ny vahoaka?

⁷Dia hoy ireo taminy: Raha mety ho mpanompon’ny vahoaka ianao izao ka hanompo azy sy hanao teny mora aminy dia ho mpanomponao mandrakizay izy.

⁸Nefa tsy nahoan’i Rehoboama akory ny torohevitra nomen’ireo zokiolona azy fa naka saina tamin’ireo tanora izay indray nihira taminy sady nanompo azy izy

⁹ka niteny tamin’ireo hoe: Ahoana kosa no mba hevitra omenareo ka havalintsika ny vahoaka izay niteny tamiko hoe: Hamaivano ny zioga izay nataon’ny rainao taminay?

¹⁰Hoy ny navalin’ireo tanora indray nihira taminy: Raha niteny taminao ny vahoaka hoe: Rainao dia nampitondra zioga mavesatra anay; fa ianao kosa, mba hamaivano aminay izany! Dia izao no lazao aminy: Ny ankihikeliko dia lehibe noho ny andilan’ny raiko.

¹¹Koa raha nampitondra zioga mavesatra anareo ny raiko, izaho kosa dia mainka hanampy ny zioga hoentinareo! Kotopia no namaizan’ny raiko anareo, fa kotopia misy fantsika kosa no hamaizako anareo.

¹²Ary nankany amin’i Rehoboama tamin’ny andro fahatelo i Jeroboama sy ny vahoaka rehetra, araka ilay nolazain’ny mpanjaka hoe: Miverena atỳ amiko indray amin’ny andro fahatelo.

¹³Ary nanao teny mafy tamin’ny olona ny mpanjaka fa tsy niraharaha ny torohevitra nomen’ireo zokiolona azy

¹⁴ka niteny taminy araka ny hevitra nomen’ireo tanora hoe: Ny raiko dia nampitondra zioga mavesatra anareo, fa izaho kosa dia mainka hanampy ny zioga hoentinareo! Kotopia no namaizan’ny raiko anareo fa kotopia misy fantsika kosa no hamaizako anareo!

¹⁵Tsy nihaino ny olona ny mpanjaka; avy tamin’NY TOMPO anefa izany fandehan-javatra izany mba hahatanteraka ny teniny izay nampilazainy an’i Ahia silonita tamin’i Jeroboama, zanak’i Nebata.

¹⁶Nony hitan’ny Israely rehetra fa tsy nihaino azy ny mpanjaka dia hoy ny vahoaka tamin’ny mpanjaka: Inona moa no anjaranay amin’i Davida? Tsy manana lova amin’ny zanak’i Jese izahay! Samia mody any an-dainy avy, ry Israely e! Ankehitriny, jereo ny tranonao, ry Davida ô! Dia samy nody ho any an-dainy avy ny Israely.

¹⁷Fa ny Zanak’Israely izay nonina tany amin’ireo tanànan’i Joda ihany no nanjakan’i Rehoboama.

¹⁸Ary naniraka an’i Adorama, lehiben’ny mpanao fanompoana, i Rehoboama mpanjaka, nefa ny Israely rehetra dia nitora-bato azy ka maty izy. Dia niezaka nankeo amin’ny kalesy fitondrany miady i Rehoboama mpanjaka ka nandositra ho any Jerosalema.

¹⁹Koa nikomy tamin’ny taranak’i Davida ny Israely mandraka androany.

²⁰Rehefa ren’ny Israely rehetra fa tafaverina indray i Jeroboama dia nandefa iraka haka azy ho ao amin’ny fivoriana izy ka nampanjaka azy tamin’ny Israely rehetra. Tsy nisy nanaraka ny taranak’i Davida afa-tsy ny fokon’i Joda irery ihany.

²¹Nony tonga tany Jerosalema i Rehoboama dia novoriny ny taranak’i Joda rehetra mbamin’ny fokon’i Benjamina, dia miaramila voafantina valo alina sy iray hetsy, hiady amin’ny taranak’Israely mba hampody ny fanjakana indray ho amin’i Rehoboama, zanak’i Solomona.

²²Kanjo tonga tamin’i Semaia, lehilahin’Andriamanitra, kosa, ny tenin’Andriamanitra hoe:

²³Mitenena amin’i Rehoboama, zanak’i Solomona, mpanjakan’i Joda, sy amin’ny taranak’i Joda sy i Benjamina rehetra ary amin’ny vahoaka sisa hoe:

²⁴Izao no lazain’NY TOMPO: Aza mandeha hiady amin’ny Zanak’Israely rahalahinareo! Samia mody any an-tranony avy ianareo, fa avy Amiko izao zavatra izao. Dia nihaino ny tenin’NY TOMPO ny olona ka samy lasa nody araka ny tenin’NY TOMPO.

²⁵Ary nanamboatra an’i Sekema any amin’ny tany be havoana any Efraima i Jeroboama ka nonina tao; rehefa nivoaka avy tao izy dia nanamboatra an’i Penoela koa.

²⁶Ary i Jeroboama dia niteny anakampo hoe: Izao ny fanjakana dia hiverina amin’ny taranak’i Davida ihany;

²⁷satria, raha miakatra hamono zavatra hatao fanatitra ao amin’ny tranon’NY TOMPO any Jerosalema ny vahoaka dia hiverina amin’ny tompony indray ny fony, dia amin’i Rehoboama, mpanjakan’ny Joda, koa hamono ahy izy ireo ka hiverina any amin’i Rehoboama, mpanjakan’ny Joda.

²⁸Dia nila hevitra ny mpanjaka ka nanao ombilahy kely volamena roa; sady hoy izy tamin’ny olona: Aoka izay ny fiakaranareo any Jerosalema! Ry Israely ô, indreo ny andriamanitrao izay nitondra anao nivoaka avy tany amin’ny tany Ejipta!

²⁹Ny iray dia napetrany tao Betela, fa ny iray hafa kosa tao Dana.

³⁰Fahotana anefa izany zavatra izany, satria ny olona nandeha teo anatrehan’ny iray tamin’ireo, hatrany Dana.

³¹Ary nanorina trano teny amin’ny toerana fanaovana sorona izy sady nanendry olona avy tao amin’ny vahoaka ho mpisorona, nefa ireo dia tsy avy amin’ny taranak’i Levy akory.

³²Nanendry andro firavoravoana tamin’ny andro fahadimy amby folo amin’ny volana fahavalo, tahaka ny andro firavoravoana tamin’ny Joda ihany koa i Jeroboama ka nanolotra fanatitra teo ambonin’ny alitara izy. Toy izany no nataony tao Betela, fa namono zavatra hatao fanatitra ho an’ireo ombilahy kely izay nataony izy. Natsangany tao Betela ireo mpisoron’ny toerana fanaovana sorona izay notendreny.

³³Dia nanolotra fanatitra teo ambonin’ny alitara izay nataony tao Betela izy tamin’ny andro fahadimy amby folo amin’ny volana fahavalo, volana izay notendreny araka ny sitrapony ihany. Nanao andro firavoravoana ho an’ny Zanak’Israely izy ka sady nanolotra fanatitra teo ambonin’ny alitara no nandoro ditin-kazo manitra.