Read La Bible en Malgache 1Mpanjaka 16 Bible Online

1Mpanjaka 16 - La Bible en Malgache bible

1Mpanjaka 16

¹Tonga tamin’i Jeho, zanak’i Hanany, ny tenin’NY TOMPO ny amin’i Basa hoe:

²Satria nasandratro avy tamin’ny vovoka ianao ka notendreko ho mpitondra ny Israely oloko, nefa ianao kosa nandeha tamin’ny lalan’i Jeroboama ihany ary nampanota ny Israely oloko ka nahatezitra Ahy tamin’ny fahotany,

³dia indro, hofongorako i Basa sy ny taranany, ary ny taranakao dia hataoko tahaka ny taranak’i Jeroboama, zanak’i Nebata.

⁴Koa izay tamingan’i Basa maty ao an-tanàna dia hohanin’ny alika; ary izay tamingany maty any an-tsaha dia hohanin’ny voromanidina.

⁵Ny tantaran’i Basa sisa mbamin’izay nataony ary ny heriny, tsy voasoratra ao amin’ny bokin’ny tantaran’ny mpanjakan’ny Israely va izany?

⁶Nodimandry any amin’ny razany i Basa dia nalevina tao Tirza. I Elaha zanany no nanjaka nandimby azy.

⁷I Jeho mpaminany, zanak’i Hanany, no nampitondraina ny tenin’NY TOMPO ny amin’i Basa sy ny taranany, satria nanao izay ratsy teo imason’NY TOMPO izy ka nahatezitra Azy tamin’ny asan’ny tanany, ary tonga tahaka ny mpianakavin’i Jeroboama, satria namono ireo koa izy.

⁸Tamin’ny taona fahenina amby roapolo nanjakan’i Asa, mpanjakan’ny Joda, no tonga mpanjakan’ny Israely tao Tirza i Elaha, zanak’i Basa, ary nanjaka roa taona izy.

⁹Nikomy taminy i Zimry mpanompony, lehiben’ny antsasaky ny kalesy fitondrany miady, raha izy nisotro ho mamo tao Tirza, tao an-tranon’i Arza, lehiben’ny lapa tao Tirza.

¹⁰Niditra tao i Zimry ka namely an’i Elaha ho faty tamin’ny taona fahafito amby roapolo nanjakan’i Asa, mpanjakan’ny Joda, ary izy no nanjaka nisolo azy.

¹¹Nony vao nanjaka i Zimry ka nipetraka tamin’ny sezafiandrianany dia namono ny mpianakavin’i Basa rehetra izy ka tsy navelany hisy miangana na dia lehilahy iray akory aza, na tamin’ny havany, na tamin’ny sakaizany.

¹²Toy izany no nandringanan’i Zimry ny mpianakavin’i Basa rehetra, araka ny tenin’NY TOMPO izay nampilazainy an’i Jeho mpaminany ny amin’i Basa,

¹³noho ny fahotany rehetra sy ny fahotan’i Elaha zanany koa, izay nataony, sady nampanotany ny Israely ka nahatezitra NY TOMPO, Andriamanitry ny Israely, noho ny amin’ireo sampiny.

¹⁴Ny tantaran’i Elaha sisa mbamin’izay rehetra nataony, tsy voasoratra ao amin’ny bokin’ny tantaran’ny mpanjakan’ny Israely va izany?

¹⁵Tamin’ny taona fahafito amby roapolo nanjakan’i Asa, mpanjakan’ny Joda, no nanjakan’i Zimry andro fito tao Tirza. Tamin’izay dia nanao fahirano an’i Gibetona, izay an’ny Filistina, ny olona,

¹⁶koa ireo olona izay nitoby teo dia nandre hoe: Nikomy i Zimry sady namono ny mpanjaka koa! Ary ny Israely rehetra tany an-tobiny dia nampanjaka an’i Omry, lehiben’ny miaramila, ho mpanjakan’ny Israely androtr’izay ihany.

¹⁷Dia niakatra avy tao Gibetona i Omry sy ny Israely rehetra niaraka taminy ka nanao fahirano an’i Tirza.

¹⁸Nony hitan’i Zimry fa azo ny tanàna dia lasa niditra tao amin’ny tilikambo-manda tao amin’ny lapa izy ary nodorany tamin’ny afo ny lapa ka may tao izy dia maty.

¹⁹Izany dia noho ny fahotana izay nataony tamin’ny nanaovany izay ratsy teo imason’NY TOMPO, tamin’ny nandehanany tamin’ny lalan’i Jeroboama sy tamin’ny fahotana izay nataony sady nampanotany ny Israely.

²⁰Ny tantaran’i Zimry sisa mbamin’ny fikomiany, tsy voasoratra ao amin’ny bokin’ny tantaran’ny mpanjakan’ny Israely va izany?

²¹Tamin’izany dia nizara roa ny lehilahin’ny Israely: Ny antsasany dia nomba an’i Tibny, zanak’i Ginata, mba hampanjaka azy; ary ny antsasany kosa dia nomba an’i Omry.

²²Ny olona izay nomba an’i Omry anefa no naharesy ireo olona izay nomba an’i Tibny, zanak’i Ginata ka maty i Tibny ary i Omry no nanjaka.

²³Tamin’ny taona fahiraika amby telopolo nanjakan’i Asa, mpanjakan’ny Joda, no tonga mpanjaka i Omry. Nanjaka roa amby folo taona tamin’ny Israely izy. Tao Tirza no nanjakany nandritra ny enin-taona.

²⁴Novidiny volafotsy talenta* roa tamin’i Samera anefa ny havoanan’i Samaria ka nanorina tanàna teo an-tampon’ny havoana izy, ary nataony hoe Samaria ny anaran’ny tanàna, araka ny anaran’i Samera, tompon’ny havoana.

²⁵Nanao izay ratsy eo imason’NY TOMPO anefa i Omry, eny, nanao izay ratsy mihoatra noho izay rehetra talohany izy;

²⁶fa nandeha tamin’ny lalana rehetra nalehan’i Jeroboama, zanak’i Nebata, sy tamin’ny fahotana izay nampanotany ny Israely izy ka nahatezitra NY TOMPO, Andriamanitry ny Israely, noho ny amin’ireo sampiny.

²⁷Ny tantaran’i Omry sisa mbamin’izay nataony sy ny heriny izay nasehony, moa tsy voasoratra ao amin’ny bokin’ny tantaran’ny mpanjakan’ny Israely va izany?

²⁸Nodimandry any amin’ny razany i Omry, dia nalevina tao Samaria. I Ahaba zanany no nanjaka nandimby azy.

²⁹Tonga mpanjakan’ny Israely i Ahaba zanak’i Omry, tamin’ny taona fahavalo amby telopolo nanjakan’i Asa, mpanjakan’ny Joda, ary nanjaka tamin’ny Israely tao Samaria nandritra ny roa amby roapolo taona izy.

³⁰Nanao izay ratsy eo imason’NY TOMPO mihoatra noho izay rehetra talohany i Ahaba, zanak’i Omry.

³¹Fa noheveriny ho tsy dia naninona ny miroso amin’ny fahotan’i Jeroboama, zanak’i Nebata, ka nampakatra an’i Jezebela, zanakavavin’i Etibaala, mpanjakan’ny Sidoniana, ho vadiny izy, ary nandeha nanompo ny Baala* ka niankohoka teo anatrehany.

³²Nanangana alitara ho an’ny Baala tao amin’ny trano naoriny manokana ho an’izany tao Samaria izy.

³³Nanao ny tsangankazon-tsampy ho an’ny Aseraha* koa i Ahaba ka nahatezitra NY TOMPO, Andriamanitry ny Israely, mihoatra noho ny mpanjakan’ny Israely rehetra izay talohany.

³⁴Tamin’ny andron’i Ahaba no nanorenan’i Hiela betelita an’i Jeriko. Ny ain’i Abirama lahimatoany no saran’ny nanorenany ny fanambaniny, ary ny ain’i Segoba faralahiny no saran’ny nananganany ny vavahadiny, araka ny tenin’NY TOMPO izay nampilazainy an’i Josoa, zanak’i Nona.