Read La Bible en Malgache 1Mpanjaka 22 Bible Online

1Mpanjaka 22 - La Bible en Malgache bible

1Mpanjaka 22

¹Nandry fehizay ny tany nandritra ny telo taona ka tsy nisy ady tamin’i Arama sy Israely.

²Fa tamin’ny taona fahatelo dia nidina i Josafata, mpanjakan’ny Joda, ho any amin’ny mpanjakan’ny Israely.

³Dia hoy ny mpanjakan’ny Israely tamin’ny mpanompony: Moa fantatrareo va fa antsika i Ramota-Gileada, nefa mitoetra foana isika ka tsy maka azy amin’ny tanan’ny mpanjakan’i Arama?

⁴Hoy koa izy tamin’i Josafata: Hiaraka amiko hiady any Ramota-Gileada va ianao? Dia hoy i Josafata tamin’ny mpanjakan’ny Israely: Eny, fa tahaka ny tenako ihany ny aminao, ka toy ny momba ny oloko ny amin’ny olonao, ary toy ny amin’ny soavaliko ny amin’ny soavalinao.

⁵Hoy anefa i Josafata tamin’ny mpanjakan’ny Israely: Miangavy anao aho, mba anontanio aloha ny tenin’NY TOMPO.

⁶Dia nanangona ny mpaminany tokony ho efajato lahy ny mpanjakan’ny Israely ka niteny tamin’izy ireo hoe: Moa handeha hanafika an’i Ramota-Gileada va aho sa tsy handeha? Dia hoy ireo: Mandehana, fa hatolotry ny Tompo eo an-tananao izy, ry mpanjaka!

⁷Hoy kosa anefa i Josafata: Moa tsy misy mpaminanin’NY TOMPO koa va eto mba hanontaniantsika?

⁸Dia hoy ny mpanjakan’ny Israely tamin’i Josafata: Mbola misy lehilahy iray ihany, i Mikaia, zanak’i Jimla, izay ahazoantsika manontany amin’NY TOMPO; kanefa halako izy, satria tsy mba maminany soa ho ahy izy fa loza ihany. Dia hoy i Josafata: Aza manao izany, ry mpanjaka!

⁹Ary niantso ny tandapa iray ny mpanjakan’ny Israely ka nilaza taminy hoe: Antsoy haingana i Mikaia, zanak’i Jimla.

¹⁰Ary ny mpanjakan’ny Israely sy i Josafata, mpanjakan’ny Joda, dia samy nipetraka teo amin’ny sezafiandrianany avy, teo amin’ny famoloana eo anoloan’ny vavahadin’i Samaria, sady samy niakanjo ny fanamiany avy; ary ny mpaminany rehetra dia naminany teo anatrehany.

¹¹Ary i Zedekia, zanak’i Kenana, dia nanao tandroka vy maromaro ka niteny hoe: Izao no lazain’NY TOMPO: Amin’ireto no hanotoanao ny Arameana mandra-paharingany.

¹²Ary ny mpaminany rehetra dia naminany toy izany koa hoe: Mandehana any Ramota-Gileada, dia hambinina ianao! NY TOMPO hanolotra azy eo an-tananao ry mpanjaka!

¹³Ary ilay iraka izay nandeha naka an’i Mikaia dia niteny taminy hoe: Indro, iray feo avokoa izao ireo mpaminany ka milaza soa ho an’ny mpanjaka. Koa miangavy anao aho, aoka re ny teninao mba hifanaraka amin’ny azy ireo ka mba mitenena soa koa ianao!

¹⁴Dia hoy i Mikaia: Raha velona koa NY TOMPO, dia izay lazain’NY TOMPO amiko ihany no hambarako!

¹⁵Dia nankany amin’ny mpanjaka izy. Hoy ny mpanjaka taminy: Ry Mikaia, handeha hanafika an’i Ramota-Gileada va isika, sa hijanona ihany? Ary izy namaly azy hoe: Mandehana, fa hambinina ianao, fa hatolotry NY TOMPO eo an-tananao izy, ry mpanjaka!

¹⁶Hoy koa ny mpanjaka taminy: Impiry no hampianianako anao mba tsy hilaza na inona na inona amiko amin’ny anaran’NY TOMPO afa-tsy izay marina ihany?

¹⁷Dia hoy i Mikaia: Hitako fa indreny ny Israely rehetra dia niely teny an-tendrombohitra toy ny ondry tsy misy mpiandry. Ary hoy NY TOMPO: Tsy manan-tompo ireo, koa aoka izy samy hody soa amantsara any an-tranony avy.

¹⁸Dia hoy ny mpanjakan’ny Israely tamin’i Josafata: Tsy efa voalazako taminao va fa tsy mba mety maminany soa ho ahy izy, fa loza ihany?

¹⁹Ary hoy i Mikaia: Henoy ary ny tenin’NY TOMPO: Nahita NY TOMPO nipetraka teo amin’ny sezafiandrianany aho, ary ny tafiky ny lanitra manontolo nijoro teo anilany, dia teo amin’ny ankavanany sy teo amin’ny ankaviany.

²⁰Ary hoy NY TOMPO: Iza no hamitaka an’i Ahaba mba handehanany ho any Ramota-Gileada ka ho lavo any? Ary ny iray dia niteny toy izao, ary ny iray kosa dia niteny toy izatsy.

²¹Dia nandroso ny fanahy iray ka nijoro teo anatrehan’NY TOMPO sady niteny hoe: Izaho no hamitaka azy. Hoy NY TOMPO taminy: Amin’inona anefa?

²²Hoy izy: Handeha aho ka ho tonga fanahy mandainga ao am-bavan’ny mpaminaniny rehetra. Dia hoy indray NY TOMPO: Ho voafitakao izy ka hahomby ianao! Mandehana ka ataovy araka izany!

²³Koa indro, ankehitriny, NY TOMPO efa nanisy fanahy mandainga ao am-bavan’ireto mpaminaninao rehetra ireto ka NY TOMPO no efa nilaza ny loza hanjo anao!

²⁴Fa nanatona i Zedekia, zanak’i Kenana, ka namely ny takolak’i Mikaia sady niteny hoe: Taiza no nialan’ny Fanahin’NY TOMPO tamiko ka nitenenany taminao?

²⁵Hoy ny navalin’i Mikaia hoe: Indro, ho hitanao izany amin’ny andro hitetezanao efitrano mba hierenao.

²⁶Dia hoy ny mpanjakan’ny Israely: Sambory i Mikaia ka ento miverina ho any amin’i Amona, lehiben’ny tanàna, sy ho any amin’i Joasy, zanaky ny mpanjaka,

²⁷dia lazao hoe: Izao no lazain’ny mpanjaka: Ataovy ao an-tranomaizina Ilehio ka fahano mofom-pahoriana sy ranom-pijaliana izy mandra-piveriko soa amantsara!

²⁸Fa hoy i Mikaia: Raha toa ka tafaverina soa amantsara ianao dia tsy nampitenenin’NY TOMPO aho. Ary hoy koa izy: Samia mihaino izany ianareo, ry firenena rehetra!

²⁹Dia niakatra nankany Ramota-Gileada ny mpanjakan’ny Israely sy i Josafata, mpanjakan’ny Joda.

³⁰Ary hoy ny mpanjakan’ny Israely tamin’i Josafata: Mody hanao olon-kafa aho ka hitsarapaka any anatin’ny ady, fa ianao kosa dia miakanjoa ny fanamianao ihany. Dia nody olon-kafa ny mpanjakan’ny Israely ka nitsarapaka tany anatin’ny ady.

³¹Fa ny mpanjakan’i Arama efa nandidy ny roa amby telopolo lahy, lehiben’ny kalesy fitondra miady hoe: Aza miady na amin’ny kely na amin’ny lehibe, fa amin’ny mpanjakan’ny Israely ihany.

³²Nony nahita an’i Josafata ireo lehiben’ny kalesy fitondra miady dia hoy izy: Iny mihitsy no mpanjakan’ny Israely. Dia nitodika nanatrika azy mba hiady aminy ireo, ka niantsoantso i Josafata.

³³Rehefa hitan’ireo lehiben’ny kalesy fitondra miady fa tsy izy no mpanjakan’ny Israely, dia niverina niala taminy ireo.

³⁴Ary nisy lehilahy iray nandefa anjoanjo zana-tsipìka ka nahavoa ny mpanjakan’ny Israely teo amin’ny fitohizan’ny fiarovan-tratrany ka hoy izy tamin’ny mpitondra ny kalesiny: Ahodino ny kalesy ka ento miala teto amin’ny ady aho fa voa.

³⁵Nihamafy ny ady tamin’izay andro izay ka notohanana ny mpanjaka mba hijoro teo amin’ny kalesiny, nanatrika ny Arameana, nefa nony efa hilentika ny masoandro dia maty izy. Ary ny ra avy tamin’ny ratrany dia nikoriana tao anatin’ny kalesy.

³⁶Nony efa hilentika ny masoandro dia niely nanerana ny toby izao antsoantso izao hoe: Samia mody any an-tanànany avy sy any amin’ny taniny avy!

³⁷Fa maty ny mpanjaka ka noentina tany Samaria ary nalevina tao.

³⁸Nony nosasana teo amin’ny farihin’i Samaria ny kalesiny dia avy ny alika nilelaka ny rany, raha nandro tao ny vehivavy janga; izany dia araka ny tenin’NY TOMPO tokoa.

³⁹Ny tantaran’i Ahaba sisa mbamin’izay rehetra nataony sy ny trano voaravaka ivoara izay natsangany ary ny tanàna rehetra izay naoriny, tsy voasoratra ao amin’ny bokin’ny tantaran’ny mpanjakan’ny Israely va izany?

⁴⁰Nodimandry any amin’ny razany i Ahaba. I Ahazia zanany no nanjaka nandimby azy.

⁴¹Tonga mpanjakan’ny Joda i Josafata, zanak’i Asa, tamin’ny taona fahefatra nanjakan’i Ahaba, mpanjakan’ny Israely.

⁴²Dimy amby telopolo taona i Josafata raha nanomboka nanjaka ary dimy amby roapolo taona no nanjakany tany Jerosalema. Ny anaran’ny reniny dia Azoba, zanakavavin’i Sily.

⁴³Nandeha tamin’ny lalana rehetra izay nalehan’i Asa rainy izy ka tsy niala tamin’izany fa nanao izay mahitsy teo imason’NY TOMPO;

⁴⁴kanefa tsy mba noravana ireo toerana fanaovana sorona ka mbola namono zavatra hatao fanatitra ny olona sady mbola nandoro ditin-kazo manitra teny amin’ny toerana fanaovana ihany.

⁴⁵Ary tsara fihavanana i Josafata sy ny mpanjakan’ny Israely.

⁴⁶Ny tantaran’i Josafata sisa sy ny heriny mbamin’ny ady nataony, tsy voasoratra ao amin’ny bokin’ny tantaran’ny mpanjakan’ny Joda va izany?

⁴⁷Ny sisa tamin’ny olona izay nanolo-tena hijangajanga ho amin’ny fanompoan-tsampy, dia izay mbola tany amin’ny andron’i Asa rainy, dia nofongorany tsy ho eo amin’ny tany.

⁴⁸Tsy nisy mpanjaka tany Edoma fahizany fa mpifehy voatendry no nitondra ny fanjakana.

⁴⁹Ary nanao sambon’i Tarsisy folo hankany Ofira i Josafata mba haka volamena; nefa tsy lasa tany izy satria nahavakiana tao Eziona-Gebera ireo sambo ireo.

⁵⁰Dia hoy i Ahazia, zanak’i Ahaba, tamin’i Josafata: Aoka mba hiaraka amin’ny mpanomponao any an-tsambo ny mpanompoko! Tsy nety anefa i Josafata.

⁵¹Nodimandry tany amin’ny razany i Josafata, dia nalevina niaraka amin’ny razany tao amin’ny Tanànan’i Davida rainy. I Jehorama zanany no nanjaka nandimby azy.

⁵²Tamin’ny taona fahafito amby folo nanjakan’i Josafata, mpanjakan’ny Joda, no nanomboka nanjaka tamin’ny Israely tao Samaria i Ahazia, zanak’i Ahaba. Nanjaka roa taona tamin’ny Israely izy.

⁵³Nanao izay ratsy teo imason’NY TOMPO izy satria nandeha tamin’ny lalan’ny rainy sy ny reniny ary tamin’ny lalan’i Jeroboama, zanak’i Nebata, izay nampanota ny Israely.

⁵⁴Nanompo ny Baala* izy ary niankohoka teo anatrehany ka nahatezitra NY TOMPO, Andriamanitry ny Israely, tahaka izay rehetra nataon’ny rainy.