Read La Bible en Malgache 1Mpanjaka 7 Bible Online

1Mpanjaka 7 - La Bible en Malgache bible

1Mpanjaka 7

¹Telo amby folo taona no nanaovan’i Solomona ny lapany dia vitany manontolo izany.

²Nanangana ilay trano Alan’i Libanona izy aloha; zato hakiho* ny lavany, dimampolo hakiho ny sakany ary telopolo hakiho ny haavony ambonin’ny andry sedera efatra andalana. Nisy rairainy sedera teo ambonin’ny andry.

³Notafoany hazo sedera ireo efitrano teo ambonin’ny andry izay miisa dimy amby folo isan’andalana ka dimy amby efapolo izy rehetra.

⁴Telo andalana ny rairainy, ary ny varavarankely dia nifanandrify intelo.

⁵Ny varavarana rehetra sy ny tolàna dia natao efa-joro, ary ny varavarankely dia nifanandrify intelo.

⁶Nataony koa ny lalantsara maro andry; dimampolo hakiho ny lavany ary telopolo hakiho ny sakany; nisy koa ny lalantsara fidirana teo anoloany ary nisy andry sy tokonana koa teo anoloan’io.

⁷Nataony koa ny lalantsara hitoeran’ny sezafiandrianana izay hitsarany, dia ny lalantsara fitsarana; nataony hazo sedera avokoa hatreo amin’ny gorodona ka hatrany amin’ny rihana.

⁸Ny tranony izay nitoerany dia teo amin’ny kianja hafa tao anatinatiny kokoa noho ny lalantsara fidirana ary nitovy rafitra tamin’io koa. Ary nanao trano tahaka izany lalantsara fidirana manodidina ny kianja lehibe izany koa i Solomona ho an’ny zanakavavin’i Farao izay nampakariny ho vady.

⁹Ireo rehetra ireo dia vato voafantina avokoa, voapaika araka ny marika sady voatsofa ny atiny sy ny ivelany, hatreo amin’ny fanambaniny ka hatrany an-tampony, ary teo ivelany koa, hatrany amin’ny kianja lehibe.

¹⁰Vato voafantina sady lehibe ny fototra, dia vato folo hakiho sy valo hakiho.

¹¹Teo ambony dia nisy vato voafantina voapaika araka ny marika, sy hazo sedera.

¹²Nasiany vato voapaika telo andalana sy hazo sedera iray andalana manodidina ny kianja lehibe, tahaka ny amin’ny kianja anatiny amin’ny tranon’NY TOMPO, ary amin’ny lalantsara fidirana amin’ny Trano.

¹³Ary i Solomona mpanjaka dia nandefa iraka haka an’i Hirama avy tany Tiro.

¹⁴Zanaky ny vehivavy mpitondratena tamin’ny fokon’i Naftaly izy io, fa ny rainy dia lehilahy tiriana, mpiasa varahina. Feno fahendrena sy fahiratan-tsaina ary fahaizana ny asa varahina rehetra izy. Dia tonga tao amin’i Solomona mpanjaka i Hirama ka nanao izay asa rehetra tao aminy.

¹⁵Nanao ny andry varahina roa izy; valo amby folo hakiho* avy ny haavon’ny iray ary roa amby folo hakiho ny manodidina azy. Toy izany koa ny faharoa.

¹⁶Nanamboatra lohany varahina voarendrika roa izy hatao eo amin’ny tampon’ny andry, dimy hakiho avy ny haavony.

¹⁷Nisy harato sy rojo miolana amin’ny lohany teo amin’ny tampon’ny andry avy: Fito amin’ny lohany iray ary fito koa amin’ny lohany iray hafa.

¹⁸Nanao ny andry izy ary nasiany roa andalana manodidina ny asa harato iray, izay hafono ny lohany izay teo an-tampon’ny andry; toy izany koa no nataony tamin’ny lohany iray.

¹⁹Ny lohany izay teo an-tampon’ny andry dia nataony mitarehim-boninkazo lisy tahaka ny amin’ny lalantsara fidirana, ary efatra hakiho ny haavony.

²⁰Ny lohany teo an-tampon’ny andry roa dia nohodidinin’ny sarin’ampongabendanitra roanjato nilahatra teo ambony, teo akaikin’ny kibony sy tany ambadiky ny harato; toy izany koa tamin’ny lohany iray.

²¹Ny andry dia natsangany teo amin’ny lalantsara fidirana amin’ny tempoly ka nisy ny andry teo ankavanana, nomeny anarana hoe Jakina[2]; ary nisy koa ny andry teo ankavia, izay nataony hoe Boaza[3].

²²Ny tampon’ny andry dia nitarehim-boninkazo lisy. Toy izany no nahavitany ny asa momba ny andry.

²³Nanamboatra ny koveta lehibe boribory voarendrika koa izy ka folo hakiho* no halehiben’ny vavany, dimy hakiho ny haavony ary telopolo hakiho ny manodidina azy.

²⁴Nisy sarim-boatango manodidina azy, folo teny amin’ny hakiho iray manodidina ny koveta lehibe, teo ambanin’ny molotry ny koveta lehibe; ny sarim-boatango dia roa andalana ary niara-narendriny tamin’ny koveta lehibe izany.

²⁵Io koveta lehibe io dia nipetraka teo ambonin’ny sarin’omby roa amby folo; ny telo dia nanatrika ny avaratra, ny telo dia nanatrika ny andrefana, ny telo dia nanatrika ny atsimo ary ny telo dia nanatrika ny atsinanana; teo ambonin’ireo ny koveta lehibe ary nifampiamboho izy rehetra.

²⁶Ny hateviny dia felatanana iray ary tahaka ny molotry ny kapoaka ny molony, tahaka ny vonin’ny lisy; nahalany roa arivo bata* izany.

²⁷Nanao ny fitoeran’ireo koveta varahina folo indray izy; efatra hakiho ny lavan’ny iray, efatra hakiho koa ny sakany ary telo hakiho* ny haavony.

²⁸Toy izao ny nanaovana ireo fitoeran’ny koveta ireo: Nisy atiny, ary ireo atiny ireo dia nisy sisiny nihazona azy;

²⁹tamin’ny atiny izay nohodidinin’ny sisiny dia nisy sarin’ny liona sy omby ary kerobima; teo ambonin’ny sisiny koa dia nisy faladiany; ary teo ambanin’ny sary liona sy omby dia nisy rojo mihantona.

³⁰Ireo fitoeran’ny koveta ireo dia samy nisy kodiarana varahina efatra sy tanan-kodiarana varahina, ary tamin’ny zorony efatra dia nisy fanamafisana; teo ambanin’ny koveta no nisy ny fanamafisana voarendrika ary nanandrify ny rojo izany.

³¹Ny vavan’ny koveta dia teo anatin’ny sisiny izay nihoatra hakiho iray teo ambonin’io; hakiho iray sy tapany kosa sady boribory ny vavany; tamin’ny vavany koa dia nisy soratra, ary efa-joro ny sisiny fa tsy boribory.

³²Ny kodiarana efatra dia teo ambanin’ireo atiny ary ny fihazonana ny tanan-kodiarana dia nikambana tamin’ny fitoeran’ny koveta ihany; hakiho iray sy tapany ny haavon’ny kodiarana.

³³Tahaka ny amin’ny kodiaran-kalesy ny fomban’ny kodiarana: Ny tanany sy ny boriboriny manodidina azy sy ny tana-masoandrony ary ny foitrany dia nataony tamin’ny varahina avokoa.

³⁴Nisy fanamafisana efatra teo amin’ny zorony efatra amin’ny fitoeran’ny koveta iray ary mitranga avy eo amin’ny fitoeran’ny koveta ireo.

³⁵Teo amin’ny tapany ambony amin’ny fitoeran’ny koveta dia nisy boribory manodidina, antsasaky ny hakiho ny haavony; teo amin’ny tapany ambony amin’ny fitoeran’ny koveta koa dia nisy fihazonana, ary ny atiny dia narendrika hiray aminy.

³⁶Fa ny atin’ny fanamafisana sy ny atiny hafa izay mbola nisy toerana malalaka dia nosoratany sarin’ny kerobima* sy liona ary hazo palma sady nasiany rojo manodidina.

³⁷Tahaka izany no nanaovany ny fitoerana folo ho an’ny koveta, samy natao indray mandrendrika avokoa ary nitovy refy sy nitovy endrika izy rehetra.

³⁸Nanao koveta varahina folo koa izy; ny koveta dia nahalany efapolo bata* avy; samy efatra hakiho* avy ny koveta; ary koveta iray avy no tamin’ny fitoerany folo.

³⁹Dia nametraka ny fitoeran’ireo koveta izy, dimy teo ankavanan’ny Trano, ary dimy teo ankavian’ny Trano; ilay koveta lehibe koa dia nataony teo ankavanan’ny Trano, teo atsimo atsinanana.

⁴⁰Ary nanao ireo koveta sy ireo sotron’afo ary ireo lovia famafazana i Hirama. Vitan’i Hirama ny asa rehetra izay nataony ho an’i Solomona mpanjaka ho amin’ny tranon’NY TOMPO. Ireto izany:

⁴¹Ny andry roa sy ny bolany roa amin’ny lohany teo an-tampon’ny andry roa, ny harato roa izay hafono ny bolany roa amin’ny lohany teo an-tampon’ny andry avy

⁴²ary ny sarin’ampongabendanitra efajato ho amin’ny harato roa, ampongabendanitra roa andalana ho amin’ny harato iray hafono ny bolany roa amin’ny lohany teny an-tampon’ny andry avy;

⁴³ny fitoeran’ny koveta folo sy ny koveta folo ho eo ambonin’ny fitoerany,

⁴⁴ny koveta lehibe iray sy ny sary omby roa amby folo teo ambaniny,

⁴⁵ireo vilany sy sotron’afo ary ireo lovia famafazana. Ireo fanaka rehetra ireo, izay nataon’i Hirama ho an’i Solomona mpanjaka ho amin’ny tranon’NY TOMPO, dia varahina mamirapiratra avokoa.

⁴⁶Tany amin’ny tany amoron’i Jordana no nandrendrehan’ny mpanjaka azy tamin’ny tanimanga teo anelanelan’i Sokota sy Zaretana.

⁴⁷Dia napetrak’i Solomona amin’ny toerany ny fanaka rehetra; be dia be izany ka tsy nozahana intsony ny lanjan’ny varahina.

⁴⁸Nanao ny fanaka rehetra izay ao amin’ny tranon’NY TOMPO i Solomona: Ny alitara volamena sy ny latabatra volamena izay fitoeran’ny mofo atao fanatitra;

⁴⁹ny fitoeran-jiro, dimy amin’ny ankavanana ary dimy amin’ny ankavia, teo anoloan’ny fitoerana masina indrindra, dia samy volamena voafantina; ireo voninkazo sy ireo jiro ary ireo hetin-jiro dia samy volamena avokoa;

⁵⁰ary ireo lovia, antsy, vilia famafazana, lovia kely ary ny fitoeran-davenon-jiro dia samy volamena voafantina; ny savily ho amin’ny lelam-baravaran’ny efitra anatiny, dia ny fitoerana masina indrindra, sy ho amin’ny lelam-baravaran’ny tempoly, dia samy volamena avokoa.

⁵¹Toy izany no nahavitana ny asa nataon’i Solomona mpanjaka ho amin’ny tranon’NY TOMPO. Dia nampidirin’i Solomona ny zavatra izay efa nohamasinin’i Davida rainy, dia ny volafotsy sy ny volamena ary ny fanaka, ka nataony tao amin’ny efitrano fitahirizana.