Read La Bible en Malgache 2Mpanjaka 1 Bible Online

2Mpanjaka 1 - La Bible en Malgache bible

2Mpanjaka 1

¹Rehefa maty i Ahaba dia nikomy tamin’ny Israely ny Moabita.

²Ary nianjera avy teo amin’ny makarakara teo amin’ny efitrano ambony tao Samaria i Ahazia ka narary. Dia nandefa iraka izy ka niteny taminy hoe: Mandehana, anontanio amin’i Baala-Zeboba, andriamanitr’i Ekrona, na ho sitrana amin’ity aretiko ity ihany aho na tsia.

³Ary niteny tamin’i Elia tisbita Ilay Anjelin’NY TOMPO* hoe: Miaingà, miakara hihaona amin’ny iraky ny mpanjakan’i Samaria ka lazao aminy hoe: Moa tsy misy Andriamanitra va eo amin’ny Israely no mandeha hanontany amin’i Baala-Zeboba, andriamanitr’i Ekrona, ianareo?

⁴Noho izany dia izao no lazain’NY TOMPO: Tsy hidina hiala amin’ny farafara izay niakaranao ianao fa ho faty tokoa. Dia lasa i Elia.

⁵Nony niverina tany amin’ny mpanjaka ny iraka dia hoy izy taminy: Nahoana re ianareo no niverina?

⁶Hoy ireo taminy: Nisy lehilahy niakatra nitsena anay ka niteny taminay hoe: Mandehana miverina any amin’ny mpanjaka izay naniraka anareo ka lazao aminy hoe: Izao no lazain’NY TOMPO: Moa tsy misy Andriamanitra va eo amin’ny Israely no mandefa iraka hanontany amin’i Baala-Zeboba, andriamanitr’i Ekrona, ianareo? Noho izany dia tsy hidina hiala amin’ny farafara izay niakaranao ianao fa ho faty tokoa.

⁷Hoy i Ahazia taminy: Lehilahy toy inona izany lehilahy niakatra nitsena anareo izany, izay nilaza izany teny izany taminareo?

⁸Ary hoy ireo taminy: Lehilahy mitafy volom-biby sady manao fehikibo hoditra. Dia hoy i Ahazia: I Elia tisbita izany!

⁹Ary ny mpanjaka naniraka olona iray, mpifehy dimampolo, mbamin’ny dimampolo lahy feheziny, mba hankany amin’i Elia. Dia niakatra tany aminy izy ireo ka indro, nipetraka teo an-tampon’ny tendrombohitra i Elia; ary niteny taminy Ralehilahy hoe: Ry lehilahin’Andriamanitra ô, asain’ny mpanjaka midina ianao!

¹⁰Nefa i Elia namaly ny mpifehy dimampolo hoe: Raha lehilahin’Andriamanitra tokoa aho dia aoka hisy afo milatsaka avy any an-danitra handevona anao sy ny dimampolo lahy fehezinao! Dia nisy afo nilatsaka avy tany an-danitra ka nandevona azy mbamin’ny dimampolo lahy feheziny.

¹¹Ary naniraka mpifehy dimampolo hafa, mbamin’ny dimampolo lahy feheziny ny mpanjaka, mba hankany aminy indray. Hoy izy tamin’i Elia: Ry lehilahin’Andriamanitra ô, izao no tenin’ny mpanjaka: Midìna haingana ianao!

¹²Fa namaly azy i Elia hoe: Raha lehilahin’Andriamanitra tokoa aho dia aoka hisy afo milatsaka avy any an-danitra ka handevona anao mbamin’ny dimampolo lahy fehezinao! Dia nisy afon’Andriamanitra nilatsaka avy tany an-danitra ka nandevona azy mbamin’ny dimampolo lahy feheziny.

¹³Mbola naniraka mpifehy dimampolo hafa indray koa, mbamin’ny dimampolo lahy feheziny ny mpanjaka. Dia niakatra ilay mpifehy dimampolo ka tonga, ary nandohalika teo anatrehan’i Elia sady nifona taminy hoe: Miangavy anao re aho, ry lehilahin’Andriamanitra ô, aoka ho sarobidy eo imasonao ny aiko sy ny ain’ireto mpanomponao dimampolo ireto!

¹⁴Indro, efa nisy afo nilatsaka avy tany an-danitra ka nandevona ireo roa lahy mpifehy dimampolo ireo mbamin’ny dimampolo feheziny avy; fa ankehitriny, aoka kosa ho sarobidy eo imasonao ny aiko!

¹⁵Ary hoy Ilay Anjelin’NY TOMPO* tamin’i Elia: Midìna ihany ianao hiaraka aminy fa aza matahotra azy. Dia niainga i Elia ka nidina niaraka taminy ho any amin’ny mpanjaka.

¹⁶Hoy izy tamin’ny mpanjaka: Izao no lazain’NY TOMPO: Satria ianao naniraka olona mba hanontany amin’i Baala-Zeboba, andriamanitr’i Ekrona, ka ohatra ny tsy misy Andriamanitra eo amin’ny Israely, dia tsy hidina hiala amin’ny farafara izay niakaranao ianao fa ho faty tokoa.

¹⁷Dia maty izy araka ny tenin’NY TOMPO izay nolazain’i Elia. Ary satria tsy nanan-janaka izy, dia i Jehorama no nanjaka nandimby azy tamin’ny taona faharoa nanjakan’i Jehorama, zanak’i Josafata, mpanjakan’ny Joda.

¹⁸Ny asan’i Ahazia sisa izay nataony, tsy voasoratra ao amin’ny bokin’ny tantaran’ny mpanjakan’ny Israely va izany?