Read La Bible en Malgache 2Mpanjaka 13 Bible Online

2Mpanjaka 13 - La Bible en Malgache bible

2Mpanjaka 13

¹Tamin’ny taona fahatelo amby roapolo nanjakan’i Joasy, zanak’i Ahazia, mpanjakan’ny Joda, no nanombohan’i Joahaza, zanak’i Jeho, nanjaka tamin’ny Israely tany Samaria, ary nanjaka fito amby folo taona izy.

²Nanao izay ratsy teo imason’NY TOMPO izy; nanaraka ny fahotan’i Jeroboama, zanak’i Nebata, izay nampanotany ny Israely izy fa tsy niala tamin’izany.

³Koa nirehitra tamin’ny Israely ny fahatezeran’NY TOMPO ka nandritra ny andro dia natolony teo an-tanan’i Hazaela, mpanjakan’i Arama, sy teo an-tanan’i Beny-Hadada, zanak’i Hazaela, izy.

⁴Ary nifona tamin’NY TOMPO i Joahaza ka nohenoin’NY TOMPO, satria hitany ny fahorian’ny Israely, fa nampahory azy ny mpanjakan’i Arama.

⁵Ary NY TOMPO nanome mpamonjy ho amin’ny Israely ka afaka tamin’ny tanan’ny Arameana izy ary nonina tao an-dainy toy ny teo aloha ny Zanak’Israely.

⁶Kanefa tsy niala tamin’ny fahotan’ny taranak’i Jeroboama, izay nampanotany ny Israely, izy fa nandeha tamin’izany ihany, ary na dia ilay tsangankazon-tsampy ho an’ny Aseraha* aza dia mbola tao Samaria ihany.

⁷Tsy nisy sisa navelan’NY TOMPO ho an’i Joahaza afa-tsy mpitaingin-tsoavaly dimampolo sy kalesy fitondra miady folo ary miaramila an-tongotra iray alina fotsiny; fa ny mpanjakan’i Arama dia efa nandringana azy ka nanao azy ho toy ny vovoka hitsakitsahina.

⁸Ny tantaran’i Joahaza sisa mbamin’izay rehetra nataony sy ny heriny, tsy voasoratra ao amin’ny bokin’ny tantaran’ny mpanjakan’ny Israely va izany?

⁹Ary nodimandry any amin’ny razany i Joahaza dia nalevina tao Samaria ka i Joasy zanany no nanjaka nandimby azy.

¹⁰Tamin’ny taona fahafito amby telopolo nanjakan’i Joasy, mpanjakan’ny Joda, no nanombohan’i Joasy, zanak’i Joahaza, nanjaka tamin’ny Israely tany Samaria; nanjaka enina amby folo taona izy.

¹¹Nanao izay ratsy teo imason’NY TOMPO izy fa tsy niala tamin’ny fahotana rehetra izay nataon’i Jeroboama, zanak’i Nebata, izay nampanotany ny Israely, fa nandeha tamin’izany ihany.

¹²Ny tantaran’i Joasy sisa mbamin’izay rehetra nataony sy ny heriny niadiany tamin’i Amazia, mpanjakan’ny Joda, tsy voasoratra ao amin’ny bokin’ny tantaran’ny mpanjakan’ny Israely va izany?

¹³Ary nodimandry any amin’ny razany i Joasy ka i Jeroboama no nipetraka tamin’ny sezafiandrianany. Ary i Joasy dia nalevina tany Samaria tao amin’ny mpanjakan’ny Israely.

¹⁴Rehefa voan’ny aretina izay hahafaty azy i Elisa dia nidina nankany aminy i Joasy mpanjakan’ny Israely ka niondrika nitomany teo ambonin’ny tavany sady niteny hoe: Ry Ikaky ô! Ry Ikaky ô! E ny kalesy fitondra miady an’ny Israely sy ny mpitaingin-tsoavaliny!

¹⁵Hoy i Elisa taminy: Makà tsipìka sy zana-tsipìka! Dia naka tsipìka sy zana-tsipìka izy.

¹⁶Ary hoy izy tamin’ny mpanjakan’ny Israely: Henjano ny tsipìka! Dia nohenjaniny izany. Dia nametraka ny tanany teo amin’ny tanan’ny mpanjaka i Elisa

¹⁷ary hoy izy: Vohay ny varavarankely atsinanana! Dia novohany izany. Hoy i Elisa: Alefaso! Dia nalefany. Ary hoy izy: Zana-tsipìkan’ny famonjen’NY TOMPO, dia zana-tsipìkan’ny famonjena hahavoa ny Arameana! Fa hamely ny Arameana ao Afeka ianao mandra-pandringanao azy.

¹⁸Hoy koa izy: Raiso ny zana-tsipìka! Dia noraisiny. Ary hoy izy tamin’ny mpanjakan’ny Israely: Kapohy ny tany! Ary nokapohiny intelo, dia nitsahatra izy.

¹⁹Ary tezitra taminy ny lehilahin’Andriamanitra ka niteny hoe: Tokony ho nikapoka indimy na inenina ianao, dia ho nasianao ny Arameana mandra-pandringanao azy; fa izao dia intelo ihany no hamelezanao ny Arameana.

²⁰Dia maty i Elisa ka nalevina. Tamin’izany fotoana izany dia nananika ny tany isan-taona ny mpihantsy adin’ny Moabita.

²¹Ary nisy mpandevina nahita ireo mpihantsy ady ireo ka natsipiny tao am-pasan’i Elisa ny faty haleviny; nefa raha vao nitehika tamin’ny taolan’i Elisa ny fatin-dRalehilahy dia velona izy ka nijoro tamin’ny tongony.

²²Ary i Hazaela, mpanjakan’i Arama, dia nampahory ny Israely tamin’ny andro rehetra nanjakan’i Joahaza.

²³Fa NY TOMPO namindra fo tamin’ny Israely sy niantra azy ary nitsinjo azy noho ny fanekeny tamin’i Abrahama sy Isaka ary i Jakoba; tsy ta handringana azy na hanaisotra azy tsy ho eo anatrehany mandraka ankehitriny Izy.

²⁴Ary maty i Hazaela, mpanjakan’i Arama, ka i Beny-Hadada zanany no nanjaka nandimby azy.

²⁵Nalain’i Joasy, zanak’i Joahaza, teo an-tanan’i Beny-Hadada, zanak’i Hazaela, indray ireo tanàna izay efa nalain’i Hazaela teo an-tanan’i Joahaza, rain’i Joasy, tamin’ny ady. Intelo no nandresen’i Joasy azy ka azony indray ireo tanànan’ny Israely.