Read La Bible en Malgache 2Mpanjaka 14 Bible Online

2Mpanjaka 14 - La Bible en Malgache bible

2Mpanjaka 14

¹Tamin’ny taona faharoa nanjakan’i Joasy, zanak’i Joahaza, mpanjakan’ny Israely, no nanombohan’i Amazia, zanak’i Joasy, nanjaka tamin’ny Joda.

²Dimy amby roapolo taona izy raha nanomboka nanjaka, ary sivy amby roapolo taona no nanjakany tany Jerosalema. Ny anaran’ny reniny dia Jehoadana, avy any Jerosalema.

³Nanao izay mahitsy teo imason’NY TOMPO izy, nefa tsy dia tahaka an’i Davida rainy, fa tahaka izay rehetra nataon’i Joasy rainy ihany no nataony.

⁴Kanefa ny toerana fanaovana sorona dia tsy mba noravana; mbola namono zavatra ho fanatitra sady nandoro ditin-kazo manitra teny amin’ireo toerana fanaovana sorona ihany ny olona.

⁵Nony tafapetraka tsara teo an-tanany ny fanjakany dia novonoiny ireo mpanompony izay namono ny mpanjaka rainy.

⁶Fa ny zanak’ireo namono kosa dia tsy mba novonoiny fa nataony araka izay voasoratra ao amin’ny bokin’ny lalànan’i Mosesy, izay nandidian’NY TOMPO hoe: Ny ray dia tsy hovonoina noho ny ataon’ny zanany, ary ny zanaka tsy hovonoina noho ny ataon’ny rainy; fa samy hovonoina noho ny fahotany avy ny olona.

⁷Nahafaty Edomita iray alina tao amin’ny Lohasahantsira izy sady nahazo an’i Sela tamin’ny ady ka niantso ny anarany hoe Joktela, izay mbola anarany mandraka androany.

⁸Tamin’izany i Amazia dia nandefa iraka tany amin’i Joasy, zanak’i Joahaza, zanak’i Jeho, mpanjakan’ny Israely, hilaza aminy hoe: Avia, aoka isika hifanandrina!

⁹Fa nandefa iraka tany amin’i Amazia, mpanjakan’ny Joda i Joasy, mpanjakan’ny Israely, hilaza hoe: Ny tsilo izay tany Libanona dia nandefa iraka tany amin’ny hazo sedera izay tany Libanona hilaza hoe: Omeo ny zanako lahy ny zanakao vavy ho vadiny! Nefa dia nisy bibidia tany Libanona nandalo teo ka nanosihosy ny tsilo.

¹⁰Efa namely an’i Edoma tokoa ianao ka nirehareha ny fonao. Aoka hahafa-po anao izany voninahitra izany ka mitoera ao an-tranonao ihany. Fa nahoana no hihaika ny loza hahalavo ny tenanao mbamin’ny Joda koa ianao?

¹¹Tsy nanaiky anefa i Amazia. Koa niakatra i Joasy, mpanjakan’ny Israely; ary izy sy i Amazia, mpanjakan’ny Joda dia nihaona tany Bety-Semesy izay any Joda.

¹²Dia resy teo anoloan’ny Israely ny Joda ka samy nandositra ho any amin’ny tranolainy avy ny olona.

¹³Ary i Amazia, mpanjakan’ny Joda, zanak’i Joasy, zanak’i Ahazia dia nosamborin’i Joasy, mpanjakan’ny Israely, tany Bety-Semesy. Dia nankany Jerosalema i Joasy ary nandravany efajato hakiho* ny mandany, hatreo amin’ny vavahadin’i Efraima ka hatrany amin’ny vavahady eo amin’ny zorony.

¹⁴Ary nalainy avokoa ny volamena sy ny volafotsy rehetra mbamin’ny fanaka rehetra izay hita tao amin’ny tranon’NY TOMPO sy tao amin’ny efitrano fitahirizana tao amin’ny tranon’ny mpanjaka mbamin’ny olona natao takalon’aina, dia niverina ho any Samaria izy.

¹⁵Ny tantaran’i Joasy sisa mbamin’ny heriny sy ny niadiany tamin’i Amazia, mpanjakan’ny Joda, tsy voasoratra ao amin’ny bokin’ny tantaran’ny mpanjakan’ny Israely va izany?

¹⁶Ary nodimandry any amin’ny razany i Joasy dia nalevina tany Samaria tao amin’ny mpanjakan’ny Israely. Ary i Jeroboama zanany no nanjaka nandimby azy.

¹⁷Ny andro niainan’i Amazia, zanak’i Joasy, mpanjakan’ny Joda, taorianan’ny nahafatesan’i Joasy, zanak’i Joahaza, mpanjakan’ny Israely, dia dimy amby folo taona.

¹⁸Ny tantaran’i Amazia sisa, tsy voasoratra ao amin’ny bokin’ny tantaran’ny mpanjakan’ny Joda va izany?

¹⁹Nanao tetika fikomiana taminy tany Jerosalema ny olona ka nandositra nankany Lakisy izy; nefa nanaraka azy tany ny olona ka namono azy.

²⁰Ary nasampy tamin’ny soavaly ny fatiny dia nalevina tany Jerosalema tao amin’ny razany tao amin’ny Tanànan’i Davida izy.

²¹Ary ny vahoaka rehetra tamin’ny Joda dia naka an’i Azaria, izay vao enina amby folo taona monja, ka nampanjaka azy handimby an’i Amazia rainy.

²²Izy no nanamboatra an’i Elota ka nampody azy ho an’ny Joda, rehefa nodimandry any amin’ny razany ny mpanjaka.

²³Tamin’ny taona fahadimy amby folo nanjakan’i Amazia, zanak’i Joasy, mpanjakan’ny Joda, no nanomboka nanjaka tany Samaria i Jeroboama, zanak’i Joasy, mpanjakan’ny Israely. Nanjaka iraika amby efapolo taona izy.

²⁴Nanao izay ratsy teo imason’NY TOMPO izy fa tsy niala tamin’ny fahotana rehetra izay nataon’i Jeroboama, zanak’i Nebata, izay nampanotany ny Israely.

²⁵Izy no nampody ny sisintanin’ny Israely ka azony hatrany akaikin’i Hamata ka hatrany amin’ny ranomasin’ny tany ngazana, araka ny tenin’NY TOMPO, Andriamanitry ny Israely, izay nampilazainy ny mpanompony, dia i Jona, zanak’i Amitahy, mpaminany tany Gata-Hefera.

²⁶Eny, hitan’NY TOMPO fa nangidy loatra ny fahorian’ny Israely. Tsy nisy niangana na voagadra na olona afaka, sady tsy nisy namonjy ny Israely akory.

²⁷NY TOMPO anefa tsy nilaza fa hamono ny anaran’ny Israely tsy ho eo ambanin’ny lanitra. Fa ny tanan’i Jeroboama, zanak’i Joasy, no noentiny namonjy azy.

²⁸Ny tantaran’i Jeroboama sisa mbamin’izay nataony sy ny hery izay niadiany ary ny nampodiany an’i Damaskosy sy Hamata ho an’ny Israely, nefa an’i Joda ireo fahiny, tsy voasoratra ao amin’ny tantaran’ny mpanjakan’ny Israely va izany?

²⁹Ary nodimandry any amin’ny razany i Jeroboama, dia tao amin’ireo mpanjakan’ny Israely. I Zakaria zanany no nanjaka nandimby azy.