Read La Bible en Malgache 2Mpanjaka 15 Bible Online

2Mpanjaka 15 - La Bible en Malgache bible

2Mpanjaka 15

¹Tamin’ny taona fahafito amby roapolo nanjakan’i Jeroboama, mpanjakan’ny Israely, no nanomboka nanjaka i Azaria, zanak’i Amazia, mpanjakan’ny Joda.

²Enina amby folo taona izy no nanomboka nanjaka, ary roa amby dimampolo taona no nanjakany tany Jerosalema. Ny anaran’ny reniny dia Jekolia, avy any Jerosalema.

³Nanao izay mahitsy teo imason’NY TOMPO izy, tahaka izay rehetra nataon’i Amazia rainy.

⁴Kanefa ny toerana fanaovana sorona dia tsy mba noravana; fa mbola namono zavatra ho fanatitra sady nandoro ditin-kazo manitra teny amin’ny toerana fanaovana sorona ihany ny olona.

⁵Nikapoka ny mpanjaka NY TOMPO ka boka mandra-pahafatiny izy ary nitoetra tao amin’ny trano mitokana izy. I Jotama, zanaky ny mpanjaka, no nanapaka tao an-dapa sy nitondra ny vahoaka.

⁶Ny tantaran’i Azaria sisa mbamin’izay rehetra nataony, tsy voasoratra ao amin’ny bokin’ny tantaran’ny mpanjakan’ny Joda va izany?

⁷Ary nodimandry any amin’ny razany i Azaria ka nalevina tao amin’ny razany tao amin’ny Tanànan’i Davida. Ary i Jotama zanany no nanjaka nandimby azy.

⁸Tamin’ny taona fahavalo amby telopolo nanjakan’i Azaria, mpanjakan’ny Joda, no nanjakan’i Zakaria, zanak’i Jeroboama, tamin’ny Israely, ary nanjaka enim-bolana tao Samaria izy.

⁹Nanao izay ratsy teo imason’NY TOMPO tahaka ny nataon’ny razany izy; tsy niala tamin’ny fahotan’i Jeroboama, zanak’i Nebata, izay nampanotany ny Israely izy.

¹⁰Ary i Saloma, zanak’i Jabesy dia nanao tetika fikomiana taminy dia namely azy teo anatrehan’ny vahoaka ka nahafaty azy ary avy eo dia nanjaka nandimby azy.

¹¹Ny tantaran’i Zakaria sisa, indro, efa voasoratra ao amin’ny bokin’ny tantaran’ny mpanjakan’ny Israely izany.

¹²Izany ilay tenin’NY TOMPO nolazainy tamin’i Jeho hoe: Ny taranakao hatramin’ny zafindohalika dia hipetraka amin’ny sezafiandrianan’ny Israely. Dia tanteraka izany.

¹³Ary i Saloma, zanak’i Jabesy, dia nanjaka tamin’ny taona fahasivy amby telopolo nanjakan’i Ozia, mpanjakan’ny Joda; nanjaka tany Samaria iray volana izy.

¹⁴Fa niakatra avy tany Tirza hankany Samaria i Menahema, zanak’i Gady, dia namely an’i Saloma, zanak’i Jabesy, tany Samaria ka nahafaty azy ary nanjaka nandimby azy.

¹⁵Ny tantaran’i Saloma sisa mbamin’ny nikomiany, indro, efa voasoratra ao amin’ny bokin’ny tantaran’ny mpanjakan’ny Israely izany.

¹⁶Tamin’izay i Menahema dia namely an’i Tifsa sy izay rehetra tao mbamin’ny faritaniny nanomboka hatrany Tirza, satria tsy namoha vavahady azy i Tifsa ka nasiany, ary notatahany ny kibon’izay bevohoka rehetra tao.

¹⁷Tamin’ny taona fahasivy amby telopolo nanjakan’i Azaria, mpanjakan’ny Joda, no nanomboka nanjaka tamin’ny Israely i Menahema, zanak’i Gady, ary folo taona no nanjakany tao Samaria.

¹⁸Nanao izay ratsy teo imason’NY TOMPO izy. Tamin’ny androny rehetra izy dia tsy niala tamin’ny fahotan’i Jeroboama, zanak’i Nebata, izay nampanotany ny Israely.

¹⁹Ary i Pola, mpanjakan’i Asiria dia avy hananika ny tany; ary i Menahema dia nanome talenta* volafotsy arivo an’i Pola, mba hanohana azy izy ka hampitoetra ny fanjakana eo an-tanany.

²⁰Ary nampandoavin’i Menahema io vola io ny mpanankarena rehetra tamin’ny Israely, dia sekela volafotsy dimampolo avy isan’olona, mba homeny ny mpanjakan’i Asiria. Dia lasa niverina ny mpanjakan’i Asiria fa tsy nijanona teo amin’ny tany.

²¹Ny tantaran’i Menahema sisa mbamin’izay rehetra nataony, tsy voasoratra ao amin’ny bokin’ny tantaran’ny mpanjakan’ny Israely va izany?

²²Nodimandry any amin’ny razany i Menahema ka i Pekahia zanany no nanjaka nandimby azy.

²³Tamin’ny taona fahadimampolo nanjakan’i Azaria, mpanjakan’ny Joda, no nanomboka nanjaka tamin’ny Israely tao Samaria i Pekahia, zanak’i Menahema, ary roa taona no nanjakany.

²⁴Nanao izay ratsy teo imason’NY TOMPO izy fa tsy niala tamin’ny fahotan’i Jeroboama, zanak’i Nebata, izay nampanotany ny Israely.

²⁵Ary i Peka, zanak’i Remalia, lefiny, dia nanao tetika fikomiana taminy ka namely an’i Pekahia mbamin’i Argoba sy i Aria tao Samaria, tao amin’ny tilikambo-mandan’ny lapa; nisy olona dimampolo lahy avy any Gileada niaraka tamin’i Peka. Koa namono an’i Pekahia i Peka dia nanjaka nandimby azy.

²⁶Ny tantaran’i Pekahia sisa mbamin’izay rehetra nataony, indro, voasoratra ao amin’ny bokin’ny tantaran’ny mpanjakan’ny Israely izany.

²⁷Tamin’ny taona faharoa amby dimampolo nanjakan’i Azaria, mpanjakan’ny Joda, no nanomboka nanjaka tamin’ny Israely tao Samaria i Peka, zanak’i Remalia, ary roapolo taona no nanjakany.

²⁸Nanao izay ratsy teo imason’NY TOMPO izy fa tsy niala tamin’ny fahotan’i Jeroboama, zanak’i Nebata, izay nampanotany ny Israely.

²⁹Tamin’ny andron’i Peka, mpanjakan’ny Israely, dia tonga i Tiglato-Pilesera, mpanjakan’i Asiria, ka nahazo an’Iona sy i Abela-Bety-Maka, i Janoa, i Kadesy, i Hazora, i Gileada ary i Galilia, dia ny tanin’ny Naftaly manontolo; izy no nandefa ny olona ho babo tany Asiria.

³⁰Ary nanao tetika fikomiana tamin’i Peka, zanak’i Remalia, i Hosea, zanak’i Elaha, dia namely azy ho faty ka nanjaka nandimby azy tamin’ny taona faharoapolo nanjakan’i Jotama, zanak’i Ozia.

³¹Ny tantaran’i Peka sisa mbamin’izay rehetra nataony, indro voasoratra ao amin’ny bokin’ny tantaran’ny mpanjakan’ny Israely izany.

³²Tamin’ny taona faharoa nanjakan’i Peka, zanak’i Remalia, mpanjakan’ny Israely, no nanomboka nanjaka i Jotama, zanak’i Ozia, mpanjakan’ny Joda.

³³Dimy amby roapolo taona izy raha nanomboka nanjaka, ary enina amby folo taona no nanjakany tany Jerosalema. Ny anaran’ny reniny dia Jerosa, zanakavavin’i Zadoka.

³⁴Nanao izay mahitsy teo imason’NY TOMPO izy; tahaka izay rehetra nataon’i Ozia rainy no nataony.

³⁵Kanefa ireo toerana fanaovana sorona dia tsy mba noravana; mbola namono zavatra ho fanatitra sady nandoro ditin-kazo manitra teny amin’ireo toerana fanaovana sorona ihany ny olona. Izy no nanao ny vavahady ambony amin’ny tranon’NY TOMPO.

³⁶Ny tantaran’i Jotama sisa mbamin’izay rehetra nataony, tsy voasoratra ao amin’ny bokin’ny tantaran’ny mpanjakan’ny Joda va izany?

³⁷Tamin’izany andro izany NY TOMPO dia nanomboka naniraka an’i Rezina, mpanjakan’i Arama, sy i Peka, zanak’i Remalia, hanafika an’i Joda.

³⁸Ary nodimandry any amin’ny razany i Jotama ka nalevina tao amin’ny razany tao amin’ny Tanànan’i Davida rainy; i Ahaza zanany no nanjaka nandimby azy.