Read La Bible en Malgache 2Mpanjaka 19 Bible Online

2Mpanjaka 19 - La Bible en Malgache bible

2Mpanjaka 19

¹Raha nandre izany i Hezekia mpanjaka dia nandriatra ny fitafiany sady nitafy lamba fisaonana ka lasa niditra tao amin’ny tranon’NY TOMPO.

²Ary naniraka an’i Eliakima, lehiben’ny tao an-dapa, sy i Sebna mpitantsoratra ary ny lehiben’ny mpisorona, samy nitafy lamba fisaonana izy, hankany amin’Isaia mpaminany, zanak’i Amoza.

³Hoy ireo taminy: Izao no lazain’i Hezekia: Andro fahoriana sy famaizana ary fahafaham-baraka ity andro ity; fa efa eo am-piterahana ny zaza kanefa tsy misy hery hiterahana azy.

⁴Angamba ho ren’NY TOMPO Andriamanitrao ny teny rehetra nataon’i Rabsake, izay nirahin’ny mpanjakan’i Asiria tompony hihantsy an’Andriamanitra velona, ka mba hovaliany izy noho ny teniny izay efa ren’NY TOMPO Andriamanitrao. Koa akaro ny vavaka ataonao hamonjy izay mbola sisa.

⁵Dia nankany amin’Isaia ny mpanompon’i Hezekia mpanjaka.

⁶Ary hoy Isaia taminy: Ambarao amin’ny tomponareo hoe: Izao no lazain’NY TOMPO: Aza matahotra ny teny renao, dia izay nanompan’iretsy mpanompolahin’ny mpanjakan’i Asiria iretsy Ahy.

⁷Fa indro, Izaho hanisy fanahy ao anatiny, ary hahare siosio izy ka hiverina ho any amin’ny taniny; dia hataoko lavon-tsabatra any amin’ny taniny izy.

⁸Dia niverina i Rabsake ka nankany Libna, izay nataon’ny mpanjakan’i Asiria fahirano tamin’io, satria reny fa efa niala tany Lakisy ny mpanjaka.

⁹Ary i Sankeriba dia nandre filazana ny amin’i Tiraka, mpanjakan’i Kosy hoe: Indro, avy hiady aminao izy. Dia nandefa iraka indray ho any amin’i Hezekia izy ka hilaza hoe:

¹⁰Izao no holazainareo amin’i Hezekia, mpanjakan’ny Joda: Aza mety hofitahin’ny Andriamanitrao izay itokianao ianao, amin’ny teny hoe: Jerosalema dia tsy hatolotra eo an-tanan’ny mpanjakan’i Asiria.

¹¹Indro, efa nandre izay nataon’ireo mpanjakan’i Asiria tamin’ny tany rehetra ianao, dia ny nanaovany azy ho zavatra voaozona; dia ianao va no ho voavonjy?

¹²Moa nahavonjy azy va ireo andriamanitry ny firenena noravan’ny razako, dia i Gozana, i Harana, i Rezefa ary ny taranak’i Edena, izay tao Telasara?

¹³Aiza ny mpanjakan’i Hamata sy ny mpanjakan’i Arpada ary ny mpanjakan’ny tanàna Sefarvaima sy Henà ary Iva?

¹⁴Dia noraisin’i Hezekia tamin’ny tanan’ny iraka ny taratasy ka novakiny, dia niakatra nankao amin’ny tranon’NY TOMPO izy ka namelatra iny teo anatrehan’NY TOMPO.

¹⁵Dia nivavaka teo anatrehan’NY TOMPO i Hezekia hoe: Ry TOMPO, Andriamanitry ny Israely ô, izay mipetraka amin’ny kerobima*, Ianao dia Ianao irery ihany no Andriamanitry ny fanjakana rehetra ambonin’ny tany, fa Ianao no nanao ny lanitra sy ny tany.

¹⁶Atongilano ny sofinao, TOMPO ô, ka mihainoa! Ahirato ny masonao, TOMPO ô, ka mijere! Henoy ny tenin’i Sankeriba, izay nampitondrainy hihaika an’Andriamanitra velona.

¹⁷TOMPO ô, marina ihany tokoa fa ireo mpanjakan’i Asiria dia efa nandrava ny Jentilisa* sy ny taniny

¹⁸ary efa nanary ny andriamaniny tao anaty afo, satria tsy Andriamanitra ireny fa asan’ny tanan’olona ihany, eny, hazo sy vato ka azony nosimbana.

¹⁹Koa ankehitriny, ry TOMPO Andriamanitray ô, mitaraina Aminao aho, vonjeo amin’ny tanany izahay, mba hahafantaran’ny fanjakana rehetra ambonin’ny tany fa Ianao dia Ianao irery ihany, TOMPO ô, no Andriamanitra!

²⁰Ary Isaia, zanak’i Amoza, nandefa iraka hankany amin’i Hezekia, hilaza hoe: Izao no lazain’NY TOMPO, Andriamanitry ny Israely: Ilay fitarainana nataonao Tamiko ny amin’i Sankeriba, mpanjakan’i Asiria, dia efa nohenoiko.

²¹Koa izao no teny nolazain’NY TOMPO ny amin’i Sankeriba. Manao tsinontsinona sy mandatsalatsa anao i Ziona*, zanakavavy virijiny; mihifikifi-doha i Jerosalema zanakavavy mahita anao mandositra.

²²Fa iza no nohantsianao sy nompanao? Ary hanohitra an’iza no nanandratanao ny feonao? Nampiandrandra ny masonao any ambony ianao hanohitra ny Iray Masin’ny Israely!

²³Tamin’ny alalan’ny irakao no nihantsianao ny Tompo hoe: Tamin’ny kalesiko fitondra miady maro no niakarako tany an-tampon’ny tendrombohitra, tao afovoan’i Libanona, dia nokapaiko ny sedera avo sy ny kipreso voafantina; dia niditra tany amin’ny fialofana farany ao aminy aho sy tany amin’ny alany midokadoka.

²⁴Izaho no nihady ka nisotro ny ranon’ny firenen-kafa ary ny faladiako no handriatako ny lakandranon’i Neily rehetra any Ejipta.

²⁵Tsy mbola renao va, hoy NY TOMPO, fa efa hatry ny ela no nanomanako izany, ary efa hatramin’ny andro taloha no namolavolako izao? Ankehitriny kosa dia efa manatanteraka izany Aho ka ny nandrava tanàna mimanda ho tonga korontam-bato no anjaranao.

²⁶Tsy nahatohitra ny mponina tany; sady raiki-tahotra no mangaihay izy; efa tahaka ny ahitra any an-tsaha izy ary tahaka ny ahi-maitso sy ny ahitra eo amin’ny tampon-trano*, eny, tahaka ny vary vao mitsiry dia maty.

²⁷Fa samy fantatro avokoa na mipetraka ianao, na mivoaka hiady, na miverina avy niady; fantatro koa ny fihetsiketsehanao hanohitra Ahy.

²⁸Satria mihetsiketsika manohitra Ahy ianao, ary efa tafakatra atỳ an-tsofiko ny fireharehanao, dia hasiako ny faraingoko ny oronao ary hopetahiko ny lamboridiko ny molotrao, dia hampivereniko amin’ny lalana izay niavianao ianao.

²⁹Izao kosa no famantarana ho anao: Hihinana ny maniry ho azy avy tamin’ny voa nihintsana ianareo amin’ity taona ity, ary amin’ny taona manaraka dia ny kolokolon’izany, fa amin’ny taona fahatelo kosa, mamafaza ianareo ka mijinjà ary manaova tanim-boaloboka ka mihinàna izay vokatra avy amin’izany.

³⁰Ary ny sisa izay afa-nandositra amin’ny taranak’i Joda dia mbola hamahatra lalindalina kokoa sady hisondrotra ka hamoa.

³¹Fa hisy sisa hiseho avy any Jerosalema sy sisa afaka avy any an-tendrombohitra Ziona*; ny fahasaro-piaron’Andriamanitra, Tompon’izao rehetra izao, no hanao izany.

³²Koa izao no lazain’NY TOMPO ny amin’ny mpanjakan’i Asiria: Tsy ho tafiditra amin’ity tanàna ity izy, na handefa zana-tsipìka ho ato, na hitondra ampinga eo anoloany, na hanandratra tovon-tany hamelezany azy.

³³Ny lalana izay niaviany ihany no hiverenany, fa tsy ho tafiditra amin’ity tanàna ity izy, hoy NY TOMPO.

³⁴Fa hiaro ity tanàna ity Aho ka hamonjy azy noho ny amin’ny tenako sy i Davida mpanompoko.

³⁵Tamin’ny alin’io dia avy ilay Anjelin’NY TOMPO* ka namely olona dimy arivo sy valo alina sy iray hetsy tao amin’ny tobin’ny Asiriana, koa nony maraina vao nifoha olona dia hita fa indreo, fatin’olona avokoa.

³⁶Dia niainga i Sankeriba, mpanjakan’i Asiria ka lasa nody ary nitoetra tany Ninive.

³⁷Ary raha niankohoka tao an-tranon’i Nisroka andriamaniny izy dia nasian’i Adrameleka sy i Sarezera zanany lahy ny sabatra; afa-nandositra nankany amin’ny tany Ararata izy mirahalahy. I Esara-Hadona zanany lahy no nanjaka nandimby azy.