Read La Bible en Malgache 2Mpanjaka 20 Bible Online

2Mpanjaka 20 - La Bible en Malgache bible

2Mpanjaka 20

¹Tamin’izany andro izany dia narary saika maty i Hezekia. Nankao aminy Isaia mpaminany, zanak’i Amoza, ka nilaza taminy hoe: Izao no lazain’NY TOMPO: Hafaro ny ankohonanao, fa ho faty ianao fa tsy ho velona intsony.

²Dia nitodika nankany amin’ny rindrina izy ka nivavaka tamin’NY TOMPO hoe:

³TOMPO ô, enga anie ka hotsarovanao ny nandehanako teo anatrehanao tamin’ny fahamarinana sy tamin’ny foko manontolo ary ny nanaovako izay tsara teo imasonao! Dia nitomany mafy dia mafy izy.

⁴Ary raha tsy mbola tafavoaka ny kianja afovoan’ny tanàna Isaia dia tonga taminy ny tenin’NY TOMPO hoe:

⁵Miverena ka lazao amin’i Hezekia, mpanapaka ny oloko hoe: Izao no lazain’NY TOMPO, Andriamanitr’i Davida rainao: Efa reko ny fitarainanao ary efa hitako ny ranomasonao. Indro, hanasitrana anao Aho ka raha afaka ampitso dia hiakatra ho ao amin’ny tranon’NY TOMPO ianao.

⁶Ary hampiako dimy amby folo taona ny andronao, sady hamonjy anao sy ity tanàna ity amin’ny tanan’ny mpanjakan’i Asiria Aho; hiaro ity tanàna ity Aho noho ny amin’ny tenako sy i Davida mpanompoko.

⁷Ary hoy Isaia: Makà mofo aviavy. Dia nalainy izany ka napetany tamin’ny vay dia sitrana izy.

⁸Hoy mantsy i Hezekia tamin’Isaia: Inona no famantarana fa hositranin’NY TOMPO aho ka hiakatra any amin’ny tranon’NY TOMPO raha afaka ampitso?

⁹Hoy Isaia: Izao no famantarana ho anao avy amin’NY TOMPO hahalalanao fa NY TOMPO hanatanteraka izay zavatra nolazainy: Handroso ambaratonga folo va ny aloka, sa hiverina ambaratonga folo?

¹⁰Ary namaly i Hezekia hoe: Mora foana ny handrosoan’ny aloka ambaratonga folo; koa tsy izany, fa aoka ny aloka hiverina ambaratonga folo!

¹¹Nitaraina tamin’NY TOMPO Isaia mpaminany, ary NY TOMPO nampihemotra ny aloka ambaratonga folo tamin’ilay nidinany teo amin’ny famantaranandro aloka an’i Ahaza; nihemotra ambaratonga folo izany.

¹²Tamin’izany andro izany no nampitondran’i Berodaka-Baladana, zanak’i Baladana, mpanjakan’i Babilona, taratasy sy fanomezana ho an’i Hezekia; fa reny hoe narary izy.

¹³Ary nandray ireo iraka i Hezekia ka naneho azy ny trano rehetra fitahirizany zava-tsoa, ny volafotsy, ny volamena, ny zavamanitra ary ny diloilo tsara, mbamin’ny trano fitahirizana ny fiadiany rehetra sy izay rehetra tao amin’ny trano fitahirizany: Tsy nisy zavatra tsy nasehon’i Hezekia azy, na ny tao an-tranony, na ny tao amin’ny fanjakany manontolo.

¹⁴Dia nankany amin’i Hezekia mpanjaka Isaia mpaminany ka niteny taminy hoe: Inona no nolazain’ireo olona nankaty aminao ireo, ary avy taiza moa izy? Hoy i Hezekia: Avy tany an-tany lavitra izy, dia avy tany Babilona.

¹⁵Hoy izy: Koa inona avy anefa no hitany tato an-tranonao? Ary hoy i Hezekia: Izay rehetra ato an-tranoko dia hitany avokoa; tsy misy zavatra tsy nasehoko azy ny ato amin’ny trano fitahirizako rehetra.

¹⁶Dia hoy Isaia tamin’i Hezekia: Henoy ary ny tenin’NY TOMPO:

¹⁷Indro, avy ny andro, koa hoentina any Babilona izay rehetra ao an-tranonao sy izay rehetra noharin’ny razanao ka voarakitra mandraka androany; eny, tsy hisy sisa hijanona na inona na inona, hoy NY TOMPO.

¹⁸Ary na dia ny naterakao koa aza dia hisy hoentiny ka ho ionòka* any amin’ny lapan’ny mpanjakan’i Babilona ireo.

¹⁹Dia hoy i Hezekia tamin’Isaia: Tsara ny tenin’NY TOMPO izay nolazainao. Hoy koa izy: Eny, tsy hisy fiadanana sy fandriampahalemana va amin’ny androko?

²⁰Ny tantaran’i Hezekia sisa sy ny heriny rehetra mbamin’ny nanaovany ny kamory sy ny lakandrano nitarihany rano ho ao an-tanàna, tsy voasoratra ao amin’ny bokin’ny tantaran’ny mpanjakan’ny Joda va izany?

²¹Dia nodimandry any amin’ny razany i Hezekia ka i Manase zanany no nanjaka nandimby azy.