Read La Bible en Malgache 2Mpanjaka 24 Bible Online

2Mpanjaka 24 - La Bible en Malgache bible

2Mpanjaka 24

¹Tamin’ny andro nanjakan’i Joiakima no niakaran’i Nebokadnezara, mpanjakan’i Babilona. Nanoa azy nandritra ny telo taona i Joiakima; nivadika anefa izy ka nikomy taminy.

²Ary NY TOMPO nandefa ny miaramilan’ny Kaldeana, ny miaramilan’ny Arameana, ny miaramilan’i Moaba ary ny miaramilan’ny taranak’i Amona hiady aminy; nampandehaniny hiady amin’i Joda ireo mba handrava azy araka ny tenin’NY TOMPO izay nampilazainy ny mpaminany mpanompony.

³Araka ny tenin’NY TOMPO ihany no nahatongavan’izany tamin’i Joda ka nanesorany azy tsy ho eo imasony noho ny fahotan’i Manase, noho izay rehetra nataony

⁴sy noho ny ran’ny tsy manan-tsiny izay nalatsany koa; fa nofenoiny ran’ny tsy manan-tsiny i Jerosalema. Izany no tsy netezan’NY TOMPO hamela ny helony.

⁵Ny tantaran’i Joiakima sisa mbamin’izay rehetra nataony, tsy voasoratra ao amin’ny bokin’ny tantaran’ny mpanjakan’ny Joda va izany?

⁶Ary nodimandry any amin’ny razany i Joiakima ka i Joiakina zanany no nanjaka nandimby azy.

⁷Ary tsy nivoaka avy tany amin’ny taniny intsony ny mpanjakan’i Ejipta; fa lasan’ny mpanjakan’i Babilona izay rehetra an’ny mpanjakan’i Ejipta, hatrany amin’ny lohasahan-driakan’i Ejipta ka hatrany amin’ny ony Eofrata.

⁸Valo amby folo taona i Joiakina raha nanomboka nanjaka, ary telo volana no nanjakany tany Jerosalema. Ny anaran’ny reniny dia Nehosta, zanakavavin’i Elnatana avy any Jerosalema.

⁹Nanao izay ratsy teo imason’NY TOMPO izy, tahaka izay rehetra nataon’ny rainy.

¹⁰Tamin’izany andro izany no niakaran’ny mpanompon’i Nebokadnezara, mpanjakan’i Babilona, hamely an’i Jerosalema, ary nataony fahirano ny tanàna.

¹¹Dia tonga koa i Nebokadnezara, mpanjakan’i Babilona, hamely ny tanàna, raha mbola nanao fahirano azy ny mpanompony.

¹²Dia nandeha nankany amin’ny mpanjakan’i Babilona i Joiakina, mpanjakan’ny Joda, dia izy sy ny reniny, ny mpanompony, ny mpanapaka ary ny tandapany. Noentin’ny mpanjakan’i Babilona izy tamin’ny taona fahavalo nanjakany.

¹³Ary navoakan’i Nebokadnezara ny harena rehetra tao amin’ny tranon’NY TOMPO sy ny harena tao amin’ny tranon’ny mpanjaka dia nendahany ny volamena rehetra izay nataon’i Solomona, mpanjakan’ny Israely, tao amin’ny tempolin’NY TOMPO, araka izay nolazain’NY TOMPO.

¹⁴Noentiny ho babo ny tao Jerosalema rehetra sy ny manamboninahitra rehetra ary ny lehilahy mahery rehetra, dia olona iray alina mbamin’ny mpahay taozavatra rehetra sy ny mpanefy, tsy nisy izay navelany afa-tsy ny madinika teo amin’ny tany.

¹⁵Nitondra an’i Joiakina koa ho babo any Babilona izy; ary ny renin’ny mpanjaka, ny vadin’ny mpanjaka, ny tandapa ary ny lehilahy mahery amin’ny tany dia noentiny ho babo avy tany Jerosalema ho any Babilona.

¹⁶Ny lehilahy mahery rehetra, fito arivo, mbamin’ny mpahay taozavatra sy ny mpanefy arivo lahy, izay samy mahery sy mahay miady, dia noentin’ny mpanjakan’i Babilona ho babo tany Babilona avokoa.

¹⁷Ary i Matania, rahalahin-drainy, no notendren’ny mpanjakan’i Babilona ho mpanjaka hisolo an’i Joiakina ka novany hoe Zedekia ny anarany.

¹⁸Iraika amby roapolo taona i Zedekia raha nanomboka nanjaka, ary iraika amby folo taona no nanjakany tany Jerosalema. Ny anaran’ny reniny dia Hamotala, zanakavavin’i Jeremia, avy any Libna.

¹⁹Nanao izay ratsy teo imason’NY TOMPO izy, tahaka izay rehetra nataon’i Joiakima.

²⁰Fa ny fahatezeran’NY TOMPO no nahatongavan’izany tamin’i Jerosalema sy ny Joda ambara-pandroahany azy tsy ho eo anatrehany. Ary nikomy tamin’ny mpanjakan’i Babilona i Zedekia.