Read La Bible en Malgache 2Mpanjaka 6 Bible Online

2Mpanjaka 6 - La Bible en Malgache bible

2Mpanjaka 6

¹Hoy ireo zanaky ny mpaminany* tamin’i Elisa: Indro, tsy omby anay ny toerana izay itoeranay eto aminao.

²Miangavy anao izahay, aoka izahay hankany Jordana ka samy haka hazo iray avy any, dia hanao trano ho anay any mba hitoeranay. Ary hoy i Elisa: Mandehana ary!

³Fa hoy ny iray: Miangavy anao aho, aoka mba hiaraka amin’ny mpanomponao ho any koa ianao! Dia namaly izy hoe: Eny ary, handeha aho!

⁴Dia niaraka taminy izy ka nony tonga tany Jordana ireo dia nikapa hazo.

⁵Rehefa nikapa hazo anefa ny iray dia latsaka tany anaty rano ny lelam-pamaky ka nitaraina izy hoe: Indrisy, tompoko, zavatra nindramina ange iny e!

⁶Ary hoy ny lehilahin’Andriamanitra: Taiza no nahalatsahany? Dia natorony azy izay nahalatsahany. Ary nanapaka hazo i Elisa ka natsipiny teo dia nitsinkafona ilay lelam-pamaky.

⁷Ary hoy izy: Raiso! Dia narosony ny tanany ka noraisiny.

⁸Ary ny mpanjakan’i Arama dia niady tamin’ny Israely ka nidinika niaraka tamin’ny mpanompony izy ary niteny hoe: Any Ananona no hitobiako.

⁹Ary ny lehilahin’Andriamanitra kosa nandefa iraka tany amin’ny mpanjakan’ny Israely hilaza hoe: Tandremo fandrao mankany Ananona ianao; fa any no hidinan’ny Arameana.

¹⁰Ary ny mpanjakan’ny Israely nandefa iraka tany amin’izay nolazain’ny lehilahin’Andriamanitra taminy; nampitandrina azy izy ka nametraka mpiambina tany; tsy indray mandeha ihany na indroa akory aza no nitrangan’izany.

¹¹Dia sosotra indrindra ny mpanjakan’i Arama noho izany zavatra izany. Koa niantso ny mpanompony izy ary niteny taminy hoe: Tsy hambaranareo ahy va izay olona eto amintsika miandany amin’ny mpanjakan’ny Israely?

¹²Ary hoy ny mpanompony iray: Tsy misy, ry mpanjaka tompoko! Fa i Elisa mpaminany ao amin’ny Israely ihany no milaza amin’ny mpanjakan’ny Israely na dia izay teny lazainao ao amin’ny efitrano fandrianao aza.

¹³Ary hoy ny mpanjaka: Andeha, zahao izay itoerany mba handefasako iraka hisambotra azy. Dia nolazaina taminy hoe: Indro, any Dotana izy.

¹⁴Dia nampandeha soavaly sy kalesy fitondra miady ary miaramila maro ho any izy; tonga alina ireo ary nanodidina ny tanàna.

¹⁵Nony nifoha vao maraina ny zatovon’ny lehilahin’Andriamanitra ka nivoaka ny trano, dia indreo, nisy miaramila sy soavaly ary kalesy fitondra miady manodidina ny tanàna. Dia hoy ilay zatovo taminy: Indrisy, tompoko! Ahoana ny hataontsika?

¹⁶Hoy i Elisa: Aza matahotra, fa ny momba antsika dia maro noho ny momba azy.

¹⁷Ary i Elisa dia nivavaka hoe: TOMPO ô, mifona aminao aho, ampahirato ny masony mba hahitany! Ary NY TOMPO nampahiratra ny mason’ilay zatovo ka hitany ny tendrombohitra feno soavaly sy kalesy afo fitondra miady manodidina an’i Elisa.

¹⁸Dia nidina nankeny amin’i Elisa ireo. Ary i Elisa dia nivavaka tamin’NY TOMPO hoe: Mifona aminao aho, ataovy jamba ireto olona ireto! Dia nataony jamba ireo araka ny tenin’i Elisa.

¹⁹Ary hoy i Elisa tamin’ireo: Tsy ity no lalana, ary tsy ity no tanàna! Fa manaraha ahy ianareo dia hitondra anareo ho any amin’ny lehilahy tadiavinareo aho! Dia noentiny nankany Samaria ireo.

²⁰Ary rehefa tonga tany Samaria izy ireo dia hoy i Elisa: TOMPO ô, ampahirato ny mason’ireto mba hahita izy! Ary NY TOMPO nampahiratra ny masony dia hitany fa indro, tao afovoan’i Samaria izy.

²¹Nony nahita azy ireo ny mpanjakan’ny Israely dia niteny tamin’i Elisa hoe: Ry Ikaky ô, hovonoiko va izy ireo? Hovonoiko va izy ireo?

²²Fa hoy izy hoe: Aza vonoinao izy; moa hovonoinao va izay nobaboinao tamin’ny sabatrao sy ny tsipìkanao? Rosoy mofo sy rano eo anoloany mba hohaniny sy hosotroiny, ary aoka izy handeha ho any amin’ny tompony.

²³Dia nanao fanasana lehibe ho azy ny mpanjaka; ary rehefa nihinana sy nisotro ireo dia nampandehaniny ka nankany amin’ny tompony. Koa tsy nankany amin’ny tanin’ny Israely intsony ny mpihantsy adin’i Arama.

²⁴Nony afaka izany dia namory ny miaramilany rehetra i Beny-Hadada, mpanjakan’i Arama, dia niakatra ary nanao fahirano an’i Samaria.

²⁵Dia nisy mosary mafy tany Samaria. Mafy ny fahirano ka loham-boriky iray aza dia lafo sekela valopolo, ary taim-boromailala ampahefatry ny kaba dia nosandaina sekela dimy.

²⁶Ary raha nandalo teny ambonin’ny manda ny mpanjakan’ny Israely dia nisy vehivavy iray nitaraina taminy hoe: Vonjeo aho, ry mpanjaka tompoko ô!

²⁷Hoy ny mpanjaka: Raha tsy vonjen’NY TOMPO ianao, avy aiza no hamonjeko anao? Avy amin’ny famoloana va, sa avy amin’ny famiazam-boaloboka?

²⁸Hoy koa ny mpanjaka taminy: Inona ary no alahelonao? Namaly Ravehivavy hoe: Hoy ity vehivavy ity tamiko: Aiza ny zanakao hohanintsika anio, ary ny zanako kosa hohanintsika rahampitso!

²⁹Koa nahandroinay ny zanako ka nohaninay; ary nony ampitso dia hoy aho taminy: Aiza kosa ny zanakao mba hohanintsika! Kanjo nafeniny ny zanany.

³⁰Nony nandre ny tenin-dRavehivavy ny mpanjaka dia nandriatra ny fitafiany. Ary nandalo teny ambonin’ny manda izy ka hitan’ny olona fa indro, lamba fisaonana no nataony manolo-koditra.

³¹Dia hoy izy: Hataon’Andriamanitra amiko anie izany, eny, mihoatra noho izany aza, raha tsy hotapahina anio ny lohan’i Elisa, zanak’i Safata!

³²Fa nipetraka tao an-tranony i Elisa, ary nipetraka teo akaikiny ny loholona. Ary ny mpanjaka dia nandefa iraka nialoha lalana azy. Raha tsy mbola tonga tany amin’i Elisa anefa iny iraka iny dia hoy izy tamin’ny loholona: Hitanareo va ny nanirahan’ity zanaky ny mpamono olona ity hanapaka ny lohako? Jereo, fa rehefa avy ny iraka dia arindrino ny varavarana ary atoseho mafy hisakana azy; tsy eo aorianany koa va ny fingadongadon’ny tongotry ny tompony?

³³Raha mbola niresaka taminy izy dia indro, nidina nankao aminy ny iraka ka niteny hoe: Indro, izao loza izao dia avy amin’NY TOMPO! Koa inona intsony no anantenako NY TOMPO?