Read La Bible en Malgache 1Tantara 10 Bible Online

1Tantara 10 - La Bible en Malgache bible

1Tantara 10

¹Niady tamin’ny Israely ny Filistina. Ary nandositra teo anoloan’ny Filistina ny lehilahy amin’ny Israely ka niampatrampatra teny an-tendrombohitra Gilboa ny faty.

²Nanenjika fatratra an’i Saoly sy ny zanany ny Filistina ka matin’ny Filistina i Jonatana sy i Abinadaba ary i Malky-Soa, zanakalahin’i Saoly.

³Mafy tamin’i Saoly ny ady; nifanehatra tamin’ny mpandefa tsipìka izy ary raiki-tahotra izy noho ny mpandefa tsipìka.

⁴Dia hoy i Saoly tamin’ny mpitondra ny fiadiany: Tsoahy ny sabatrao ka atsatohy miboroaka amiko; fandrao avy irerỳ tsy mifora irerỳ ka hanao ahy ho fihomehezana. Nefa tsy nety ny mpitondra ny fiadiany fa natahotra loatra. Dia nalain’i Saoly ny sabatra ka nianjerany.

⁵Rehefa hitan’ny mpitondra ny fiadiana fa maty i Saoly dia mba nianjera tamin’ny sabany koa izy ka maty.

⁶Dia niara-maty i Saoly sy ny zanany telo lahy ary ny ankohonany rehetra.

⁷Nony hitan’ny lehilahy rehetra amin’ny Israely teny amin’ny lohasaha fa nandositra ny olona, ary maty i Saoly sy ny zanany, dia nandao ny tanànany avy izy ireo ka nandositra; ary tonga ny Filistina ka nonina tao.

⁸Nony ampitso, raha tonga hanendaka ny zavatra teny amin’ny faty ny Filistina, dia nahita an’i Saoly sy ny zanany lahy niampatrampatra teo an-tendrombohitra Gilboa.

⁹Dia nesoriny ny akanjony ka ny loha izay notapahiny sy ny fiadiany no noentiny tany amin’ny tanin’ny Filistina manodidina mba hanambaràna izany zavatra mahafaly izany tamin’ny sampiny sy ny olona.

¹⁰Dia napetrany tao amin’ny tranon’ny andriamaniny ny fiadian’i Saoly, ary nohomboany teo amin’ny tempolin’i Dagona ny lohany.

¹¹Nony ren’ny mponina rehetra tao Jabesy-Gileada izay rehetra nataon’ny Filistina tamin’i Saoly

¹²dia niainga ny lehilahy mahery rehetra naka ny fatin’i Saoly sy ny fatin’ny zanany ka nitondra azy ho any Jabesy, ary nandevina ny taolambalony teo ambanin’ilay hazo terebinta* tany Jabesy, avy eo dia nifady hanina hafitoana.

¹³Eny, maty i Saoly noho ny nivadihany tamin’NY TOMPO, dia noho ny tsy nitandremany ny tenin’NY TOMPO sy noho ny nakany saina tamin’izay mpila hevitra amin’ny maty

¹⁴ary noho ny tsy nanontaniany tamin’NY TOMPO; dia novonoiny izy ary nafindrany ho an’i Davida, zanak’i Jese, ny fanjakana.