Read La Bible en Malgache 1Tantara 13 Bible Online

1Tantara 13 - La Bible en Malgache bible

1Tantara 13

¹Naka saina tamin’ny mpifehy arivo sy ny mpifehy zato, dia ny mpifehy rehetra i Davida

²ka hoy izy tamin’ny Israely rehetra izay tafangona: Raha heverinareo fa mety, sady avy amin’NY TOMPO Andriamanitsika izany, dia andeha isika handefa iraka haingana any amin’ny rahalahintsika rehetra izay sisa amin’ny tanin’ny Israely rehetra ary amin’ny mpisorona sy ny levita* koa, izay any amin’ny tanànany sy ny tany manodidina azy, mba hivory atỳ amintsika.

³Ary aoka haverintsika atỳ amintsika indray ny vata misy ny faneken’Andriamanitsika; fa tsy nahoantsika izy io tamin’ny andron’i Saoly.

⁴Ary ny olona rehetra izay tafangona dia nanaiky hanatanteraka izany, satria marina teo imason’ny olona rehetra izany.

⁵Dia novorin’i Davida ny Israely rehetra hatrany Sihora any Ejipta ka hatrany akaikin’i Hamata haka ny vata misy ny faneken’Andriamanitra avy any Kiriata-Jearima.

⁶Dia niakatra hankany Baala i Davida sy ny Israely rehetra, any Joda any Kiriata-Jearima izany, hampakatra ny vata misy ny faneken’NY TOMPO Andriamanitra, izay mipetraka amin’ny kerobima*, ilay iantsoana ny anarany.

⁷Ary noentiny tamin’ny sarety vaovao niala tao an-tranon’i Abinadaba ny vata misy ny faneken’Andriamanitra. I Oza sy i Ahio no nampandeha ny sarety.

⁸I Davida sy ny Israely rehetra kosa dia nitsinjaka fatratra teo anatrehan’Andriamanitra tamin’ny hira, ny lokanga, ny valiha, ny ampongatapaka, ny kipantsona ary ny trompetra.

⁹Nony tonga teo amin’ny famoloan’i Kidona izy dia nanatsotra ny tanany hihazona ny vata misy ny Fanekena* i Oza, satria nibolasitra ny omby.

¹⁰Dia nirehitra tamin’i Oza ny fahatezeran’NY TOMPO ka namely azy Izy noho ny nanatsorany ny tanany tamin’ny vata misy ny Fanekena. Dia maty teo anatrehan’Andriamanitra i Oza.

¹¹Nalahelo i Davida noho ny namelezan’NY TOMPO an’i Oza ka nataony hoe Pereza-Oza[2] no anaran’izany toerana izany mandraka androany.

¹²Ary natahotra an’Andriamanitra i Davida tamin’izany andro izany ka nilaza hoe: Amin’ny fomba ahoana no hitondrako ny vata misy ny faneken’Andriamanitra ho atỳ amiko?

¹³Dia tsy nafindran’i Davida ho ao aminy ao an-Tanànan’i Davida ny vata misy ny Fanekena fa naviliny ho ao an-tranon’i Obeda-Edoma gatita.

¹⁴Ary nipetraka telo volana tao amin’ny ankohonan’i Obeda-Edoma tao an-tranony ny vata misy ny faneken’Andriamanitra; dia notahin’NY TOMPO ny ankohonan’i Obeda-Edoma sy izay rehetra nananany.