Read La Bible en Malgache 1Tantara 14 Bible Online

1Tantara 14 - La Bible en Malgache bible

1Tantara 14

¹Ary nandefa iraka tany amin’i Davida i Hirama, mpanjakan’i Tiro, sady nampanatitra hazo sedera ho azy no nandefa mpanao trano vato sy mpandrafitra hanao trano koa.

²Dia fantatr’i Davida fa NY TOMPO efa nampitoetra azy ho mpanjakan’ny Israely ka voasandratra ny fanjakany noho ny amin’ny Israely olony.

³Nampaka-bady tany Jerosalema indray i Davida ka niteraka zazalahy sy zazavavy.

⁴Ireto no anaran’ny zanany naterany tany Jerosalema: I Samoa, i Sobaba, i Natana, i Solomona,

⁵i Jibara, i Elisoa, i Elipeleta,

⁶i Noga, i Nafega, i Jafia,

⁷i Elisama, i Beliada ary i Elifeleta.

⁸Nony ren’ny Filistina fa voahosotra ho mpanjakan’ny Israely rehetra i Davida dia niakatra hitady azy ny Filistina rehetra. Koa raha ren’i Davida izany dia nivoaka hiady taminy izy.

⁹Dia tonga ny Filistina ka nihahakahaka teny amin’ny lohasahan’ny Refaìta.

¹⁰Ary nanontany an’Andriamanitra i Davida hoe: Hiakatra hamely ny Filistina va aho? Hatolotrao eo an-tanako va izy? Dia hoy NY TOMPO taminy: Miakara fa hatolotro eo an-tananao izy.

¹¹Dia niakatra nankao Baala-Perazima i Davida ka namely azy teo; dia hoy izy: Ny tanako no namakian’Andriamanitra ny fahavaloko hipariaka toy ny rano vaky; koa izany no nanaovany ny anaran’io tany io hoe Baala-Perazima[3].

¹²Dia nilaozan’ireny teo ireo andriamaniny ka nasain’i Davida nodorana tamin’ny afo.

¹³Ary tonga indray ny Filistina ka nihahakahaka teny an-dohasaha.

¹⁴Dia nanontany an’Andriamanitra indray i Davida ka novaliny hoe: Aza manenjika azy; fa mivilia lalana manodidina azy; dia mandehana fa ho tonga eo aminy ianao eo amin’ny tandrifin’ny hazo balisama.

¹⁵Rehefa mandre fingadongadon’olona eny amin’ny tendron’ny hazo balisama ianao dia miaingà amin’izay hiady; fa amin’izay no efa miainga mialoha anao Andriamanitra hamely ny miaramilan’ny Filistina.

¹⁶Dia nanatanteraka izay nandidian’Andriamanitra azy i Davida ka namely ny miaramilan’ny Filistina hatrany Gibeona ka hatrany Gezera.

¹⁷Niely teny amin’ny tany rehetra ny lazan’i Davida; ary nataon’NY TOMPO nahazo ny firenena rehetra ny tahotra an’i Davida.