Read La Bible en Malgache 1Tantara 15 Bible Online

1Tantara 15 - La Bible en Malgache bible

1Tantara 15

¹I Davida dia nanao trano ho azy tao an-Tanànan’i Davida sady nanamboatra fitoerana sy nanorina tranolay ho an’ny vata misy ny faneken’Andriamanitra.

²Tamin’izay dia hoy i Davida: Tsy misy tokony hitondra ny vata misy ny faneken’Andriamanitra afa-tsy ny levita* ihany, satria izy no efa nofidin’NY TOMPO hitondra ny vata misy ny faneken’Andriamanitra sy hanao fanompoam-pivavahana ho Azy mandrakariva.

³Dia novorin’i Davida tany Jerosalema ny Israely rehetra hampiakatra ny vata misy ny faneken’NY TOMPO ho any amin’ny toerana izay namboariny ho azy.

⁴Ary novorin’i Davida ny taranak’i Arona sy ny levita:

⁵Tamin’ny taranak’i Kehata dia i Oriela lehibeny sy ny rahalahiny roapolo amby zato;

⁶tamin’ny taranak’i Merary dia i Asaia lehibeny sy ny rahalahiny roapolo sy roanjato;

⁷tamin’ny taranak’i Gersoma dia i Joela lehibeny sy ny rahalahiny telopolo amby zato;

⁸tamin’ny taranak’i Elizafana dia i Semaia lehibeny sy ny rahalahiny roanjato;

⁹tamin’ny taranak’i Hebrona dia i Eliela lehibeny sy ny rahalahiny valopolo;

¹⁰tamin’ny taranak’i Oziela dia i Aminadaba lehibeny sy ny rahalahiny roa amby folo amby zato.

¹¹Ary i Davida niantso an’i Zadoka sy i Abiatara mpisorona ary ny levita, dia i Oriela, i Asaia, i Joela, i Semaia, i Eliela ary i Aminadaba,

¹²ka niteny tamin’ireo hoe: Ianareo lohan’ny fianakavian’ny levita, hamasino ny tenanareo, dia ianareo sy ny rahalahinareo, mba hampiakaranareo ny vata misy ny faneken’NY TOMPO, Andriamanitry ny Israely, ho ao amin’ilay toerana namboariko ho azy.

¹³Satria tsy ianareo no nampiakatra azy tamin’ny voalohany, dia nasian’NY TOMPO Andriamanitsika isika, fa tsy nitady Azy araka ny fomba tokony harahina.

¹⁴Dia nanamasina ny tenany ny mpisorona sy ny levita mba hampiakatra ny vata misy ny faneken’NY TOMPO, Andriamanitry ny Israely.

¹⁵Ary nilanja ny vata misy ny faneken’Andriamanitra tamin’ny bao hazo teny an-tsorony ny levita, fa izany no nandidian’i Mosesy araka ny tenin’NY TOMPO.

¹⁶Ary ireo lehiben’ny levita dia nasain’i Davida nanendry ny mpihira rahalahiny hitondra zavamaneno, dia ny valiha sy ny lokanga ary hampaneno ny kipantsona, mba hanandra-peo amin’ny fifaliana.

¹⁷Dia notendren’ny levita i Hemana, zanak’i Joela; tamin’ny rahalahiny dia i Asafa, zanak’i Berekia; tamin’ny taranak’i Merary rahalahiny dia i Etana, zanak’i Kosaia;

¹⁸naman’ireo ihany koa ny rahalahiny manarakaraka, dia i Zakaria, i Bena, i Jaziela, i Semiramota, i Jehiela, i Ony, i Eliaba, i Benaia, i Mahaseia, i Matitia, i Elifeleho, i Mikneia, i Obeda-Edoma ary i Jeiela, mpiandry varavarana.

¹⁹I Hemana sy i Asafa ary i Etana mpihira dia nasaina nitondra kipantsona varahina hampanenoina.

²⁰I Zakaria, i Aziela, i Semiramota, i Jehiela, i Ony, i Eliaba, i Mahaseia ary i Benaia no nasaina nitendry valiha tamin’ny alamota[4].

²¹I Matitia, i Elifeleho, i Mikneia, i Obeda-Edoma, i Jeiela ary i Azazia no nasaina nitendry ny lokanga tamin’ny seminita[5] ho fitarihana ny hira.

²²I Kenania, lehiben’ny levita, no tonian’ny fitondrana entana; nampianatra ny fitondrana entana izy satria hainy izany.

²³I Berekia sy i Elikana no mpiandry varavarana amin’ny vata misy ny Fanekena*.

²⁴I Sebania, i Josafata, i Netanela, i Amasay, i Zakaria, i Benaia ary i Eliezera, izay samy mpisorona, no nitsoka ny trompetra teo alohan’ny vata misy ny faneken’Andriamanitra; i Obeda-Edoma sy i Jehia kosa no mpiandry varavarana amin’ny vata misy ny Fanekena.

²⁵I Davida sy ny loholon’ny Israely mbamin’ny mpifehy arivo no nandeha hampiakatra amim-pifaliana ny vata misy ny faneken’NY TOMPO avy tao an-tranon’i Obeda-Edoma.

²⁶Rehefa nomban’Andriamanitra ny levita* izay nilanja ny vata misy ny faneken’NY TOMPO dia namono vantotra ombilahy fito sy ondrilahy fito ho fanatitra izy.

²⁷Ary nanao akanjo vita amin’ny rongony fotsy madinika i Davida; niakanjo toy izany koa ny levita rehetra izay nitondra ny vata misy ny Fanekena* ary ny mpihira sy i Kenania, tonian’ny fitondrana entana, mbamin’ny mpihira; nisalotra efoda* rongony fotsy koa i Davida.

²⁸Toy izany no nampiakaran’ny Israely rehetra ny vata misy ny faneken’NY TOMPO tamin’ny fihobiana, ny feon’ny anjomara, ny trompetra, ny kipantsona ary tamin’ny fitendrena ny valiha sy ny lokanga.

²⁹Nony tonga tao an-Tanànan’i Davida ny vata misy ny faneken’NY TOMPO dia nitsirika teo am-baravarankely i Mikala, zanakavavin’i Saoly, ka nahita an’i Davida mpanjaka nibitaka sy nitsinjaka; dia naneso azy mafy tao am-pony izy.