Read La Bible en Malgache 1Tantara 16 Bible Online

1Tantara 16 - La Bible en Malgache bible

1Tantara 16

¹Nampiditra ny vata misy ny faneken’Andriamanitra ny olona ka nametraka azy tao afovoan’ny tranolay izay naorin’i Davida ho azy; avy eo dia nanolotra fanatitra dorana manontolo sy fanati-pihavanana teo anatrehan’Andriamanitra izy.

²Nony voatolotr’i Davida ny fanatitra dorana manontolo sy ny fanati-pihavanana dia nitsodrano ny olona tamin’ny anaran’NY TOMPO izy.

³Dia nizara mofo iray avy sy hena iray didy ary mofo voaloboka ho an’ny Israely rehetra, na lahy na vavy, izy.

⁴Notendren’i Davida ho mpanao fanompoam-pivavahana eo anatrehan’ny vata misy ny faneken’NY TOMPO ny levita* sasany mba hankalaza sy hisaotra ary hidera NY TOMPO, Andriamanitry ny Israely:

⁵I Asafa no lehibeny, i Zakaria no nanarakaraka. I Jeiela, i Semiramota, i Jehiela, i Matitia, i Eliaba, i Benaia, i Obeda-Edoma ary i Jeiela no nitendry ny valiha sy ny lokanga; fa i Asafa no nampaneno ny kipantsona.

⁶I Benaia sy i Jahaziela mpisorona kosa no mpitsoka mandrakariva ny trompetra eo anoloan’ny vata misy ny faneken’Andriamanitra.

⁷Tamin’izay andro izay no voalohan’ny nanendren’i Davida an’i Asafa sy ny rahalahiny hidera NY TOMPO.

⁸Miderà NY TOMPO, miantsoa ny anarany! Ampahafantaro ny firenena ny asany!

⁹Mihirà ho Azy, mankalazà Azy! Saintsaino ny fahagagana rehetra ataony!

¹⁰Ataovy ho reharehanareo ny anarany masina! Aoka hifaly ny fon’izay mitady NY TOMPO!

¹¹Mitadiava NY TOMPO sy ny heriny, katsaho mandrakariva ny tavany!

¹²Tsarovy ny asa mahagaga izay nataony, dia ny fahagagana nataony sy ny fitsaran’ny vavany,

¹³ianareo taranak’Israely mpanompony, ianareo olom-boafidiny, taranak’i Jakoba!

¹⁴NY TOMPO, Izy no Andriamanitsika; manerana ny tany rehetra ny fitsarany.

¹⁵Tsarovy mandrakizay ny fanekeny, dia ilay teny nomeny ho an’ny taranaka arivo mandimby,

¹⁶eny, ilay nataony tamin’i Abrahama sy ny fianianany tamin’Isaka;

¹⁷izay naoriny ho lalàna ho an’i Jakoba sy ho fanekena mandrakizay ho an’Israely

¹⁸ka nilazany hoe: Homeko anao ny tany Kanana ho lovanareo voarefy tsara.

¹⁹Tamin’izay dia mbola olom-bitsy ianareo, eny, vitsy sady vahiny tao;

²⁰nifindrafindra tany amin’ny firenena sy nifindrafindra fanjakana tany amin’ny firenen-kafa;

²¹tsy nisy navelany hampahory azy anefa, fa nananatra mpanjaka noho ny amin’ireo Izy hoe:

²²Aza mikasika ireo Voahosotro, ary aza manisy ratsy ireo mpaminaniko!

²³Mihirà ho an’NY TOMPO, ry tany rehetra! Lazao isanandro isanandro ny vaovao mahafalin’ny famonjeny!

²⁴Ambarao any amin’ny Jentilisa* ny voninahiny, ary any amin’ny firenena rehetra ny fahagagana ataony!

²⁵Fa lehibe NY TOMPO ka mendrika hoderaina indrindra, sady mahatahotra, fa ambonin’ny andriamanitra rehetra.

²⁶Ny andriamanitry ny firenena rehetra dia tsinontsinona, fa NY TOMPO no nanao ny lanitra.

²⁷Famirapiratana sy voninahitra no eo anatrehany, hery sy hafaliana no ao amin’ny fitoerany.

²⁸Ry firenena, manomeza an’NY TOMPO, eny, omeo voninahitra sy hery NY TOMPO!

²⁹Omeo NY TOMPO ny voninahitry ny anarany! Manolora fanatitra ka mankanesa eo anatrehany! Miankohofa eo anatrehan’NY TOMPO amin’ny fihaingoana masina!

³⁰Mangovita eo anatrehany, ry tany rehetra! Izao rehetra izao dia voaorina ka tsy hihetsika.

³¹Aoka ho faly ny lanitra ary ho ravo ny tany! Aoka holazaina any amin’ny firenena hoe: NY TOMPO no Mpanjaka!

³²Aoka hirohondrohona ny ranomasina sy izay rehetra ao aminy! Aoka ho faly ny saha sy izay rehetra ao aminy!

³³Dia hihoby eo anatrehan’NY TOMPO amin’izay koa ny hazo any an’ala! Fa avy hitsara ny tany Izy.

³⁴Miderà NY TOMPO fa tsara Izy, fa mandrakizay ny famindrampony!

³⁵Ary mitenena hoe: Vonjeo izahay, ry Andriamanitry ny famonjena anay ô, angony izahay ka afaho amin’ny Jentilisa, mba hisaoranay ny anaranao masina ka ho reharehanay ny fiderana Anao!

³⁶Isaorana anie NY TOMPO, Andriamanitry ny Israely, hatramin’ny taloha indrindra ka ho mandrakizay. Ary ny olona rehetra dia niteny hoe: Amena! Sady nidera NY TOMPO.

³⁷I Asafa sy ny rahalahiny dia navelan’i Davida teo anoloan’ny vata misy ny faneken’NY TOMPO hanao fanompoam-pivavahana ao mandrakariva araka ny raharaha tokony hatao isanandro.

³⁸I Obeda-Edoma, zanak’i Jedotona sy ny rahalahiny valo amby enimpolo ary i Hosa kosa dia ho mpiandry varavarana.

³⁹I Zadoka mpisorona sy ny mpisorona rahalahiny dia navelany ho eo anoloan’ny tabernakelin’NY TOMPO teo amin’ny toerana fanaovana sorona any Gibeona.

⁴⁰Izy ireo dia hanolotra fanatitra dorana manontolo ho an’NY TOMPO marain-tsy hariva eo amin’ny alitara fandoroana ny fanatitra mandrakariva, dorana manontolo, ary hanatanteraka izay rehetra voasoratra ao amin’ny lalànan’NY TOMPO, izay nomeny ny Israely.

⁴¹Naman’ireo koa i Hemana sy i Jedotona ary ny sisa amin’ny olona voafidy izay voatonona anarana hidera NY TOMPO, fa mandrakizay ny famindrampony!

⁴²Tao amin’i Hemana sy i Jedotona dia nisy trompetra sy kipantsona natao hampanenoina; tao koa ireo karazavan-javamaneno hanaraka ny hira ho an’Andriamanitra. Ny zanak’i Jedotona no mpiandry varavarana.

⁴³Dia samy nody tany an-tranony avy ny olona rehetra ary lasa nody koa i Davida mba hitsodrano ny ankohonany.