Read La Bible en Malgache 1Tantara 18 Bible Online

1Tantara 18 - La Bible en Malgache bible

1Tantara 18

¹Taorianan’izany dia nandresy ny Filistina i Davida ka nampietry azy, ary i Gata sy ny vohitra miankina aminy dia nesoriny tamin’ny tanan’ny Filistina.

²Nandresy ny Moabita koa izy ka tonga mpanompon’i Davida nandoa hetra ireo.

³Dia resin’i Davida koa i Hadadezera, mpanjakan’i Zoba akaikin’i Hamata, tamin’izy nandeha nampiorina ny fanjakany tany amoron’ny ony Eofrata.

⁴I Davida dia nahazo babo kalesy arivo fitondra miady taminy sy mpitaingin-tsoavaly fito arivo ary miaramila mandeha an-tongotra roa alina; notraingotraingoin’i Davida avokoa ny soavalin-kalesy fitondra miady rehetra, fa ny tokony ho amin’ny kalesy zato fitondra miady ihany no navelany.

⁵Nony tonga hanampy an’i Hadadezera, mpanjakan’i Zoba, ny Arameana avy any Damaskosy, dia nahafatesan’i Davida olona roa arivo sy roa alina ny Arameana.

⁶Nisy mpifehy namponenin’i Davida tany Arama any Damaskosy; dia tonga mpanompon’i Davida ny Arameana ka nandoa hetra. Fa NY TOMPO nampahazo fandresena an’i Davida tany amin’izay rehetra nalehany.

⁷Ary nalain’i Davida ny ampinga volamena teny amin’ny mpanompon’i Hadadezera ka noentiny nankany Jerosalema.

⁸Tao Tibata sy Kona, tanànan’i Hadadezera, no nahazoan’i Davida babo varahina be dia be, ary izany no nanaovan’i Solomona ilay koveta varahina lehibe sy ny andry ary ny fanaka varahina.

⁹Nony ren’i Toy, mpanjakan’i Hamata, fa naharesy ny miaramila rehetra an’i Hadadezera, mpanjakan’i Zoba, i Davida,

¹⁰dia naniraka an’i Hadorama zanany hankany amin’i Davida mpanjaka izy hiarahaba sy hisaotra azy noho ny niadiany tamin’i Hadadezera sy ny nandreseny azy, sady nampitondrainy fanaka volamena sy volafotsy ary varahina izay samy maro karazana izy; fa i Hadadezera dia fahavalon’i Toy.

¹¹Nohamasinin’i Davida mpanjaka ho an’NY TOMPO koa izany mbamin’ny volafotsy sy ny volamena noentiny avy tamin’ny firenena rehetra, dia tany Edoma sy Moaba, tany amin’ny taranak’i Amona sy ny Filistina ary ny Amalekita.

¹²Naharesy ny Edomita izay nisy valo arivo sy iray alina teo amin’ny Lohasahantsira i Abisay, zanak’i Zeroia.

¹³Ary nametraka miaramila tany Edoma izy; dia tonga mpanompon’i Davida ny Edomita rehetra. Fa NY TOMPO nampandresy an’i Davida tany amin’izay rehetra nalehany.

¹⁴Nanjaka tamin’ny Israely rehetra i Davida ka nitsara sy nitondra ny vahoakany rehetra tamin’ny fahamarinana.

¹⁵I Joaba, zanak’i Zeroia, no lehiben’ny miaramila; i Josafata, zanak’i Ahiloda, no mpitadidy ny raharaham-panjakana;

¹⁶i Zadoka, zanak’i Ahitoba, sy i Abimeleka, zanak’i Abiatara, no mpisorona; ary i Saosa no mpitantsoratra;

¹⁷ary i Benaia, zanak’i Jehoiada, no mpifehy ny Keretita sy ny Peletita; ary ny zanak’i Davida no lehibe tamin’izay akaiky ny mpanjaka.