Read La Bible en Malgache 1Tantara 19 Bible Online

1Tantara 19 - La Bible en Malgache bible

1Tantara 19

¹Tatỳ aoriana dia maty i Nahasy, mpanjakan’ny taranak’i Amona, ary ny zanany no nanjaka nandimby azy.

²Dia hoy i Davida: Hanisy soa an’i Hanona, zanak’i Nahasy, aho, fa soa no nataon’ny rainy tamiko. Ary nandefa iraka hitsapa alahelo azy noho ny amin’ny rainy i Davida. Dia tonga tany amin’i Hanona tany amin’ny tanin’ny Amonita ny mpanompon’i Davida hitsapa alahelo azy.

³Hoy anefa ireo mpanapaka ny taranak’i Amona tamin’i Hanona: Moa heverinao ho fanajana ny rainao no anirahan’i Davida hitsapa alahelo anao? Moa tsy hizaha sy handrava ary hisafo ny tany va no nalehan’ireo mpanompony ireo atỳ aminao?

⁴Dia nosamborin’i Hanona ny mpanompon’i Davida ka noharatany sady notapahiny hatreo amin’ny foto-peny ny akanjony dia nalefany hody avy eo.

⁵Nisy lasa nanambara tamin’i Davida izay natao tamin’ireo lehilahy ireo; dia nandefa iraka izy hitsena azy ireo fa afa-baraka loatra izy ireo; dia hoy ny mpanjaka: Mitoera any Jeriko aloha ambara-panirin’ny somotrareo, aorianan’izay vao mody ianareo.

⁶Nony hitan’ny taranak’i Amona fa efa nanao izay nampangidy hoditra azy tamin’i Davida izy dia nandefa iraka hanatitra talenta* volafotsy arivo hanakaramany kalesy fitondra miady sy mpitaingin-tsoavaly avy any Mezopotamia sy Arama-Maka ary Zoba i Hanona sy ny taranak’i Amona.

⁷Dia nanakarama kalesy fitondra miady roa arivo sy telo alina mbamin’ny mpanjakan’i Maka sy ny olony izy; ary tonga ireo ka nitoby tandrifin’i Medeba. Dia nivory ny taranak’i Amona izay niala tany amin’ny tanànany avy ka tamy hiady.

⁸Nony ren’i Davida izany dia naniraka an’i Joaba sy ny miaramila rehetra izy, dia ny lehilahy mahery.

⁹Nandeha nilahatra hiady teo anoloan’ny vavahadin’ny tanàna ny taranak’i Amona, fa ireo mpanjaka tonga ireo kosa dia nitokana teny an-tsaha.

¹⁰Rehefa hitan’i Joaba fa sady teo anoloany no teo ivohony ny fahavalo dia nifidy olona tamin’ireo voafantina tamin’ny Israely rehetra izy ka nalahany hiady tamin’ny Arameana.

¹¹Ny olona sisa kosa dia nomeny hoentin’i Abisay rahalahiny, dia nilahatra hiady amin’ny taranak’i Amona ireo.

¹²Ary hoy i Joaba: Raha tsy tohako ny Arameana dia vonjeo aho; fa raha tsy tohanao kosa ny taranak’i Amona dia hovonjeko ianao.

¹³Mahereza, ary aoka hitomban-dahy isika ho an’ny firenentsika sy ireo tanànan’Andriamanitsika, dia aoka NY TOMPO hanao izay sitrapony.

¹⁴Dia nandroso hiady tamin’ny Arameana i Joaba sy ny olona nanaraka azy; koa vaky nandositra niala teo anoloany ireo.

¹⁵Nony hitan’ny taranak’i Amona fa nandositra ny Arameana dia mba nandositra niala teo anoloan’i Abisay, rahalahin’i Joaba, koa izy ka niditra tao an-tanàna. Dia niverina tany Jerosalema i Joaba.

¹⁶Nony hitan’ny Arameana fa resy teo anoloan’ny Israely izy dia nandefa iraka izy haka ny Arameana izay tany andafin’ny ony Eofrata, ary i Sobaka, lehiben’ny miaramilan’i Hadadezera, no nitarika azy.

¹⁷Nony nambara tamin’i Davida izany dia namory ny Israely rehetra izy ka lasa nita an’i Jordana, dia tonga teo aminy ka nilahatra hiady aminy. Nony nilahatra hiady amin’ny Arameana i Davida dia niady taminy ireo.

¹⁸Fa vaky nandositra teo anoloan’ny Israely ny Arameana ka nahafaty fito arivo teo amin’ny kalesy fitondrany miady sy miaramila mandeha an-tongotra efatra alina tamin’ny Arameana i Davida; ary matiny koa i Sobaka, lehiben’ny miaramila.

¹⁹Nony hitan’ireo mpanompon’i Hadadezera fa resy teo anoloan’ny Israely izy dia nanao fihavanana tamin’i Davida izy ka nanompo azy; ary tsy nety nanampy ny taranak’i Amona intsony ny Arameana.