Read La Bible en Malgache 1Tantara 23 Bible Online

1Tantara 23 - La Bible en Malgache bible

1Tantara 23

¹Nony efa ela niainana sy tratra antitra tsara i Davida dia i Solomona zanany no nataony mpanjaka tamin’ny Israely.

²Novoriny ny lehiben’ny Israely rehetra mbamin’ny mpisorona sy ny levita*.

³Dia nisaina ny levita hatramin’ny telopolo taona no ho miakatra ka valo arivo sy telo alina no isan’ny lehilahy.

⁴Ary hoy Davida: Ataoko ho tonian’ny asa ao amin’ny tranon’NY TOMPO ny efatra arivo sy roa alina amin’ireo, ataoko mpifehy sy mpitsara ny enina arivo,

⁵ho mpiandry varavarana ny efatra arivo, ary ho mpidera NY TOMPO amin’ny zavatra namboariko hiderana Azy ny efatra arivo.

⁶Nozarazarain’i Davida ho antokony ireo araka ny zanakalahin’i Levy, dia i Gersona sy i Kehata ary i Merary:

⁷Tamin’ny Gersonita dia i Ladana sy i Simey.

⁸Ny zanakalahin’i Ladana dia i Jehiela no lohany, ny manarakaraka azy dia i Zetama sy i Joela; telo izy ireo.

⁹Ny zanakalahin’i Simey dia i Selomota sy i Haziela ary i Harana; telo izy ireo. Ireo no lohany tamin’ny fianakavian’i Ladana.

¹⁰Ny zanakalahin’i Simey dia i Jahata, i Zina, i Jeosy ary i Beria; izy efa-dahy ireo no zanakalahin’i Simey.

¹¹I Jahata no voalohany, ary i Ziza no faharoa; fa i Jeosy sy i Beria dia tsy nanana zanakalahy maro, koa nisaina ho fianakaviana iray sy antokony iray izy.

¹²Ny zanakalahin’i Kehata dia i Amrama, i Jizara, i Hebrona ary i Oziela; efatra izy ireo.

¹³Ny zanakalahin’i Amrama dia i Arona sy i Mosesy. Ary natokana i Arona ka nohamasinina ho masina indrindra, dia izy sy ny taranany fara aman-dimby, handoro ditin-kazo manitra eo anatrehan’NY TOMPO sy hanao fanompoam-pivavahana ho Azy ary hitsodrano amin’ny anarany mandrakizay.

¹⁴Nefa ny amin’i Mosesy, lehilahin’Andriamanitra, dia nisaina tamin’ny fokon’i Levy ihany ny zanany.

¹⁵Ny zanakalahin’i Mosesy dia i Gersona sy i Eliezera.

¹⁶Tamin’ny zanakalahin’i Gersoma dia i Seboela no lohany.

¹⁷Tamin’ny zanakalahin’i Eliezera dia i Rehabia no lohany, i Eliezera anefa dia tsy nanan-janaka hafa; fa ny zanak’i Rehabia dia maro indrindra.

¹⁸Tamin’ny zanakalahin’i Jizara dia i Selomota no lohany.

¹⁹Ny zanakalahin’i Hebrona, dia i Jeria no lahimatoa, i Amaria no lahiaivo, i Jahaziela no fahatelo, ary i Jekameama no faralahy.

²⁰Ny zanakalahin’i Oziela dia i Mika no lahimatoa ary i Jisia no faralahy.

²¹Ny zanakalahin’i Merary dia i Maly sy i Mosy. Ny zanakalahin’i Maly dia i Eleazara sy i Kisy.

²²Ary maty i Eleazara nefa tsy nanan-janakalahy fa vavy avokoa; ny zanakalahin’i Kisy havany no nanambady azy ireo.

²³Ny zanakalahin’i Mosy dia i Maly sy i Edera ary i Jeremota; telo izy ireo.

²⁴Ireo no zanakalahin’i Levy araka ny fianakaviany, dia ny lohan’ny fianakaviana tamin’ny antokony avy araka ny nanisana ny anarany tsirairay, dia izay nanao ny fanompoana tao amin’ny tranon’NY TOMPO, hatramin’ny roapolo taona no ho miakatra.

²⁵Fa hoy i Davida: NY TOMPO, Andriamanitry ny Israely, efa nanome fitsaharana ho an’ny olony sady mitoetra eto Jerosalema mandrakizay.

²⁶Ary ny levita kosa dia tsy hitondra ny tabernakely* na ny fanaka enti-manompo ao aminy intsony.

²⁷Fa araka ny faratenin’i Davida dia nisaina hatramin’ny roapolo taona no ho miakatra ny levita.

²⁸Ary ny raharahany dia ny hanampy ny taranak’i Arona amin’ny fanompoana ao amin’ny tranon’NY TOMPO, amin’ireo kianja sy efitrano ary amin’ny fanadiovana ny zavatra masina rehetra sy ny fanompoana ao amin’ny tranon’Andriamanitra,

²⁹amin’ny mofo atao fanatitra sy ny koba tsara toto ho fanatitra avy amin’ny zavamaniry, amin’ny mofo manify tsy misy masirasira, amin’izay endasina amin’ny lapoaly, amin’izay mofo hafa karazana, ny amin’ny famarana sy ny fandrefesana rehetra,

³⁰ny hitsangana isa-maraina hisaotra sy hidera NY TOMPO, ary toy izany koa amin’ny hariva,

³¹ary ny hanolotra ny fanatitra dorana manontolo rehetra ho an’NY TOMPO, na amin’ny Sabata, na amin’ny voaloham-bolana, na amin’ny fotoam-pivavahana hafa, dia araka ny isany avy, sy araka ny fanao voatendry hanaovana azy mandrakariva eo anatrehan’NY TOMPO.

³²Aoka ho toy izany no hitandremany ny anjara raharahany ny amin’ny tranolay fihaonana* sy ny anjara raharahany ny amin’ny fitoerana masina ary ny anjara raharahany ny amin’ny taranak’i Arona rahalahiny ho fanompoana ao amin’ny tranon’NY TOMPO.