Read La Bible en Malgache 1Tantara 27 Bible Online

1Tantara 27 - La Bible en Malgache bible

1Tantara 27

¹Ny amin’ny Zanak’Israely araka ny isany, dia ny loham-pianakaviany, ny mpifehy arivo, ny mpifehy zato ary ny mpifehy azy, izay nanompo ny mpanjaka tamin’izay raharahany rehetra isan-tokony, izay nifandimby isam-bolana mandritra ny herintaona, dia efatra arivo sy roa alina avy no isan’ny isan-tokony.

²Ny nifehy ny antoko voalohany, ho amin’ny volana voalohany, dia i Jasobeama, zanak’i Zabdiela; ny antokony dia efatra arivo sy roa alina.

³Isan’ny taranak’i Fareza izy sady lehiben’ny mpifehy rehetra tamin’ny tafika amin’ny volana voalohany.

⁴Ny nifehy ny antokony ho amin’ny volana faharoa dia i Doday ahohita; i Miklota andriandahy no isan’ny antokony; ny antokon’ny Ahohita dia efatra arivo sy roa alina.

⁵Ny lehiben’ny antokony fahatelo tamin’ny tafika, ho amin’ny volana fahatelo, dia i Benaia, zanak’i Jehoiada mpisorona; ny antokony dia efatra arivo sy roa alina.

⁶Io no ilay Benaia, izay nahery sady ambony tamin’izy telopolo lahy; i Amizabada zanany no isan’ny antokony.

⁷Ny fahefatra, ho amin’ny volana fahefatra, dia i Asahela, rahalahin’i Joaba, ary i Zebadia zanany no nanarakaraka azy; ny antokony dia efatra arivo sy roa alina.

⁸Ny fahadimy, ho amin’ny volana fahadimy, dia i Samihota jizraita; ny antokony dia efatra arivo sy roa alina.

⁹Ny fahenina, ho amin’ny volana fahenina, dia Ira, zanak’Ikesy tekoita; ny antokony dia efatra arivo sy roa alina.

¹⁰Ny fahafito, ho amin’ny volana fahafito, dia i Heleza pelonita, isan’ny taranak’i Efraima; ny antokony dia efatra arivo sy roa alina.

¹¹Ny fahavalo, ho amin’ny volana fahavalo, dia i Sibekay hosatita, isan’ny Zerita; ny antokony dia efatra arivo sy roa alina.

¹²Ny fahasivy, ho amin’ny volana fahasivy, dia i Abiezera anatotita, isan’ny Benjaminita; ny antokony dia efatra arivo sy roa alina.

¹³Ny fahafolo, ho amin’ny volana fahafolo, dia i Maharay netofatita, isan’ny Zarita; ny antokony dia efatra arivo sy roa alina.

¹⁴Ny fahiraika amby folo, ho amin’ny volana fahiraika amby folo, dia i Benaia piratonita, isan’ny taranak’i Efraima; ny antokony dia efatra arivo sy roa alina.

¹⁵Ny faharoa amby folo, ho amin’ny volana faharoa amby folo, dia i Helday netofatita, isan’ny taranak’i Otniela; ny antokony dia efatra arivo sy roa alina.

¹⁶Izao no lohan’ireo fokon’ny Israely: Tamin’ny Robenita dia i Eliezera, zanakalahin’i Zikry; tamin’ny Simeonita dia i Sefatia, zanakalahin’i Maka;

¹⁷tamin’ny levita* dia i Hasabia, zanakalahin’i Kemoela; tamin’ny Aronita dia i Zadoka;

¹⁸tamin’ny Joda dia i Eliho, izay isan’ny rahalahin’i Davida; tamin’ny Isakara dia i Omry, zanakalahin’i Mikaela;

¹⁹tamin’ny Zebolona dia i Jismaia, zanakalahin’i Obadia; tamin’ny Naftaly dia i Jerimota, zanakalahin’i Azriela;

²⁰tamin’ny taranak’i Efraima dia i Hosea, zanakalahin’i Azazia; tamin’ny antsasaky ny fokon’i Manase dia i Joela, zanakalahin’i Pedaia;

²¹tamin’ny antsasaky ny fokon’i Manase tao Gileada dia Ido, zanakalahin’i Zakaria; tamin’ny Benjamina dia i Jasiela, zanakalahin’i Abnera;

²²tamin’ny Dana dia i Azarela, zanakalahin’i Jerohama. Ireo no lohan’ireo fokon’ny Israely.

²³Tsy nanisa ny hatramin’ny roapolo taona no ho midina anefa i Davida satria efa nilaza NY TOMPO fa hampitombo ny Israely ho tahaka ny kintana eny amin’ny lanitra.

²⁴Nanomboka nanisa i Joaba, zanak’i Zeroia, fa tsy nahefa, satria nisy fahatezerana nihatra tamin’ny Israely tamin’izany ka tsy voasoratra ao amin’ny bokin’ny tantaran’i Davida mpanjaka ny isany.

²⁵Ny tonian’ny trano fitahirizan’ny mpanjaka dia i Azmaveta, zanak’i Adiela; ny tonian’ny trano fitahirizana tany ambanivohitra, na tamin’ny tanàna, na tamin’ny vohitra, na tamin’ny tilikambo, dia i Jonatana, zanak’i Ozia;

²⁶ny mpifehy ny mpiasa tany an-tsaha hiasa ny tany dia i Ezry, zanak’i Keloba;

²⁷ny mpiandraikitra ny tanim-boaloboka dia i Simey ramatita; ny tonian’ny fitahirizana divay any amin’ny tanim-boaloboka dia i Zebdy sifmita;

²⁸ny mpiandraikitra ny hazo oliva sy ny aviavy any Sefela dia i Baala-Hanana gaderita; ny tonian’ny fitahirizana diloilo dia i Joasy;

²⁹ny mpiandraikitra ny fiandrasana omby any Saròna dia i Sitiray sarònita; ny mpiandraikitra ny omby any an-dohasaha dia i Safata, zanak’i Adlay;

³⁰Ny mpiandraikitra ny rameva dia i Obila ismaelita; ny mpiandraikitra ny borikivavy dia i Jedeia meronotita;

³¹ary ny mpiandraikitra ny ondry aman’osy dia i Jaziza hagarita. Ireo rehetra ireo no tonian’ny fananan’i Davida mpanjaka.

³²I Jonatana, rahalahin-drain’i Davida, dia mpanolotsaina; lehilahy be fahalalana izy sady mpitantsoratra; i Jehiela, zanak’i Hakmony, no nikarakara ny zanaky ny mpanjaka.

³³I Ahitofela dia mpanolotsaina ny mpanjaka; i Hosay arkita no namana akaiky ny mpanjaka;

³⁴ny manarakaraka an’i Ahitofela dia i Jehoiada, zanak’i Benaia, sy i Abiatara; ary ny lehiben’ny miaramilan’ny mpanjaka dia i Joaba.