Read La Bible en Malgache 1Tantara 5 Bible Online

1Tantara 5 - La Bible en Malgache bible

1Tantara 5

¹Ny zanakalahin’i Robena, lahimatoan’Israely; izy no lahimatoa; saingy tamin’ny nandotoany ny farafaran’ny rainy no nanomezana ny fizokiany ho an’ny zanak’i Josefa, zanak’Israely; nefa tsy voasoratra ho zokiny amin’ny tetiarana ireo;

²fa i Joda dia nisandratra ho ambony noho ny rahalahiny ary izy no niavian’ny mpitondra; fa ny fizokiana dia an’i Josefa ihany.

³Ny zanakalahin’i Robena, lahimatoan’Israely, dia i Hanoka, i Palo, i Hezrona ary i Karmy.

⁴Ny zanakalahin’i Joela dia i Semaia; i Goga no zanakalahin’i Semaia; i Simey no zanakalahin’i Goga;

⁵i Mika no zanakalahin’i Simey; i Reaia no zanakalahin’i Mika; i Baala no zanakalahin’i Reaia;

⁶i Bera no zanakalahin’i Baala, izay nobaboin’i Tiglato-Pilesera, mpanjakan’i Asiria; izy no loham-pirenen’ny Robenita.

⁷Ary ny rahalahiny araka ny fianakaviany avy, raha araka ny tetiarana, dia i Jeiela no lohany, ny manarakaraka azy dia i Zakaria

⁸ary i Bela, zanak’i Azaza, zanak’i Sema, zanak’i Joela, izay nonina tao Aroera hatrany Nebo sy Baala-Meona.

⁹Nonina tany atsinanana hatrany akaikin’ny tany efitra ka hatrany amin’ny ony Eofrata izy; fa nihamaro teny amin’ny tany Gileada ny omby aman’ondriny.

¹⁰Tamin’ny andron’i Saoly dia niady tamin’ny Hagarita izy ka naharesy azy; ary nonina an-day nanerana ny ilany atsinanana rehetra amin’i Gileada izy.

¹¹Nonina tandrifiny, teny amin’ny tany Basana hatrany Saleka ny taranak’i Gada.

¹²I Joela no lohany, i Safama no manarakaraka, ary i Janay sy i Safata no tany Basana.

¹³Ny rahalahiny araka ny fianakaviany avy dia i Mikaela, i Mesolama, i Seba, i Joray, i Jakana, i Zia ary i Ebera; fito izy ireo.

¹⁴Ireo no zanakalahin’i Abihaila, zanak’i Hory, zanak’i Jaroa, zanak’i Gileada, zanak’i Mikaela, zanak’i Jesisay, zanak’i Jado, zanak’i Boza;

¹⁵i Ahia, zanak’i Abdiela, zanak’i Gonỳ, no lohan’ny fianakaviany.

¹⁶Nonina tany Gileada sy tany Basana ary tany amin’ny vohitra miankina aminy sy tany amin’ny tany rehetra manodidina an’i Saròna ka hatrany an-tsisiny izy ireo.

¹⁷Ireo rehetra ireo dia nisaina araka ny firazanany tamin’ny andron’i Jotama, mpanjakan’ny Joda, sy tamin’ny andron’i Jeroboama, mpanjakan’ny Israely.

¹⁸Ny taranak’i Robena sy ny Gadita ary ny antsasaky ny fokon’i Manase, izay isan’ny lehilahy mahery, mahatana ampinga sy sabatra ary mahahenjana tsipìka sady zatra ny miady, miisa enimpolo sy fitonjato sy efatra arivo sy efatra alina, no azo nalefa hanafika.

¹⁹Niady tamin’ny Hagarita, tamin’i Jetora, tamin’i Nafisy ary tamin’i Nodaba izy ireo.

²⁰Nomban’Andriamanitra izy ireo teo amin’ny ady ka voatolotra teo an-tanany ny Hagarita mbamin’izay rehetra nomba azy, satria nitaraina tamin’Andriamanitra izy ireo nandritra ny ady, koa nekeny ny fangatahany noho ny fahatokiany Azy.

²¹Ary nobaboiny ny biby fiompiny, dia rameva dimy alina, ondry aman’osy dimy alina sy roa hetsy, boriky roa arivo ary olona iray hetsy;

²²maro ny faty niampatrampatra, satria avy tamin’Andriamanitra ny ady. Ary nonina nandimby ireo izy mandra-pahatongan’ny fahababoana.

²³Ny taranaky ny antsasaky ny fokon’i Manase dia nonina teo amin’ny tany; ary nihamaro izy ireo ka tonga hatrany Basana ka hatrany Baala-Hermona sy Senira ary hatrany amin’ny tendrombohitra Hermona.

²⁴Izao no lohan’ny fianakaviany: I Efera, i Jisy, i Eliela, i Azriela, i Jeremia, i Hodavia ary i Jadiela; lehilahy mahery ireo ary malaza sady samy loham-pianakaviany avy.

²⁵Nivadika tamin’Andriamanitry ny razany anefa izy ireo fa nijangajanga nanaraka ny andriamanitry ny tompon-tany, izay naringan’Andriamanitra tsy ho eo anoloany.

²⁶Ary ny Andriamanitry ny Israely nampirisika an’i Pola, mpanjakan’i Asiria, sy i Tiglato-Pilesera, mpanjakan’i Asiria, ka nobaboin’ireo ny Robenita sy ny Gadita ary ny antsasaky ny fokon’i Manase dia noentiny tany Hala, tany Habora, tany Hara ary tany amoron’ny ony Gozana, ambaraka androany.

²⁷Ny zanakalahin’i Levy dia i Gersona sy i Kehata ary i Merary.

²⁸Ny zanakalahin’i Kehata dia i Amrama, i Jizara, i Hebrona ary i Oziela.

²⁹Ny zanak’i Amrama dia i Arona sy i Mosesy ary i Miriama. Ny zanakalahin’i Arona dia i Nadaba, i Abiho, i Eleazara ary Itamara.

³⁰I Eleazara no niteraka an’i Finehasa; i Finehasa no niteraka an’i Abisoa;

³¹i Abisoa no niteraka an’i Bokỳ; i Bokỳ no niteraka an’i Ozy;

³²i Ozy no niteraka an’i Zerahia; i Zerahia no niteraka an’i Meraiota;

³³i Meraiota no niteraka an’i Amaria; i Amaria no niteraka an’i Ahitoba;

³⁴i Ahitoba no niteraka an’i Zadoka; i Zadoka no niteraka an’i Ahimaza;

³⁵i Ahimaza no niteraka an’i Azaria; i Azaria no niteraka an’i Johanana;

³⁶i Johanana no niteraka an’i Azaria, ilay nanao fisoronana tao amin’ny trano nataon’i Solomona tany Jerosalema;

³⁷i Azaria no niteraka an’i Amaria; i Amaria no niteraka an’i Ahitoba;

³⁸i Ahitoba no niteraka an’i Zadoka; i Zadoka no niteraka an’i Saloma;

³⁹i Saloma no niteraka an’i Hilkia; i Hilkia no niteraka an’i Azaria;

⁴⁰i Azaria no niteraka an’i Seraia; i Seraia no niteraka an’i Jozadaka.

⁴¹Lasa nandeha koa i Jozadaka nony voatolotry NY TOMPO ho babon’i Nebokadnezara ny Joda sy Jerosalema.