Read La Bible en Malgache 2Tantara 1 Bible Online

2Tantara 1 - La Bible en Malgache bible

2Tantara 1

¹I Solomona, zanak’i Davida, dia nitombo hery tamin’ny fanjakany, ary NY TOMPO Andriamaniny nomba azy ka nanandratra azy ho ambony indrindra.

²Ary niteny tamin’ny Israely rehetra i Solomona, dia ny mpifehy arivo, ny mpifehy zato, ny mpitsara ary ny lohan’ny foko rehetra tamin’ny Israely, dia ny lohan’ny fianakaviana,

³koa niara-niakatra ho any amin’ny toerana fanaovana sorona tao Gibeona i Solomona sy ny fiangonana manontolo; fa tao ny tranolay fihaonana* izay an’Andriamanitra, ilay nataon’i Mosesy, mpanompon’NY TOMPO, tany an-tany efitra.

⁴Fa ny vata misy ny faneken’Andriamanitra dia efa nampiakarin’i Davida avy tany Kiriata-Jearima ho ao amin’izay efa namboariny ho azy; satria efa nanorina tranolay ho azy tany Jerosalema izy.

⁵Ary ny alitara varahina izay nataon’i Bezalila, zanak’i Ory, zanak’i Hora, dia teo anoloan’ny tabernakelin’NY TOMPO. Nitady Azy i Solomona sy ny fiangonana.

⁶Nanolotra fanatitra teo anatrehan’NY TOMPO teo amin’ny alitara varahina, izay momba ny tranolay fihaonana, i Solomona; fanatitra dorana manontolo arivo no nateriny teo.

⁷Tamin’iny alina iny no nisehoan’Andriamanitra tamin’i Solomona ka hoy Izy taminy: Angataho izay tianao homeko anao.

⁸Dia hoy i Solomona tamin’Andriamanitra: Efa naneho fahasoavana lehibe tamin’i Davida raiko Ianao ary nampanjaka ahy handimby azy.

⁹Koa ankehitriny, RY TOMPO Andriamanitra ô, aoka ho tanteraka ny teninao tamin’i Davida raiko; fa efa nampanjaka ahy tamin’ny vahoaka marobe tahaka ny vovo-tany Ianao.

¹⁰Koa omeo fahendrena sy fahalalana aho hitarihako ireto vahoaka ireto ka hahazoako mitondra azy; fa iza no hahay mitsara izao olonao betsaka izao?

¹¹Dia hoy Andriamanitra tamin’i Solomona: Satria izany no tao am-ponao ka tsy nangataka vola aman-karena ianao, na voninahitra, na ny ain’ny fahavalonao, ary tsy nangataka ny ho ela velona aza fa nangataka fahendrena sy fahalalana hitsaranao ny oloko izay nampanjakako anao,

¹²dia omena anao ny fahendrena sy ny fahalalana; ary homeko vola aman-karena sy voninahitra koa ianao, mihoatra noho izay nananan’ny mpanjaka rehetra na iza na iza tany alohanao, ary tsy hisy hanana tahaka izany ny any aoriananao.

¹³Tonga tany Jerosalema, teo anoloan’ny tranolay fihaonana i Solomona, rehefa avy teo amin’ny toerana fanaovana sorona tao Gibeona; ary nanjaka tamin’ny Israely izy.

¹⁴Nanangona kalesy fitondra miady sy mpitaingin-tsoavaly i Solomona ka nanana kalesy fitondra miady efajato sy arivo sy mpitaingin-tsoavaly roa arivo sy iray alina, izay nataony tany amin’ireo tanàna fitoeran’ny kalesy fitondra miady ary tao amin’ny mpanjaka tany Jerosalema.

¹⁵Nataon’ny mpanjaka ho tahaka ny vato ny habetsaky ny volafotsy sy ny volamena tany Jerosalema, ary ny hazo sedera dia nataony maro toy ny aviavy any Sefela.

¹⁶Avy tany Ejipta no nahazoan’i Solomona soavaly; ary ny iray toko tamin’ny mpivaro-mandehan’ny mpanjaka dia naka andiany iray araka izay vidiny.

¹⁷Ary noentiny niakatra avy tany Ejipta ny vidin’ny kalesy fitondra miady iray, izay sekela volafotsy eninjato, ary ny soavaly dia dimampolo amby zato avy; toy izany koa no nitondrany ho an’ny mpanjakan’ny Hetita sy ny mpanjakan’ny Arameana.

¹⁸Nilaza i Solomona fa hanorina trano ho an’ny anaran’NY TOMPO sy lapa ho an’ny tenany.