Read La Bible en Malgache 2Tantara 10 Bible Online

2Tantara 10 - La Bible en Malgache bible

2Tantara 10

¹Nankany Sekema i Rehoboama, fa tonga tany ny Israely rehetra hampanjaka azy.

²Koa raha nandre izany i Jeroboama, zanak’i Nebata, izay efa nandositra nankany Ejipta niala teo anatrehan’i Solomona mpanjaka, dia niverina avy tany Ejipta.

³Ary nandefa iraka haka azy ny olona. Dia tonga i Jeroboama sy ny Israely rehetra ka niteny tamin’i Rehoboama hoe:

⁴Rainao dia nampitondra zioga mavesatra anay; fa ankehitriny, mba hamaivano ny fanompoana mafy nampanaovin’ny rainao sy ny zioga mavesatra izay nampitondrainy anay, dia hanompo anao izahay.

⁵Fa hoy kosa izy taminy: Rehefa afaka hateloana dia miverena atỳ amiko indray. Dia lasa ny olona.

⁶Naka hevitra tamin’ny zokiolona izay nanompo an’i Solomona rainy fony fahavelony i Rehoboama mpanjaka ka hoy izy hoe: Ahoana no hevitra omenareo mba hamaliana ny vahoaka?

⁷Dia hoy ireo taminy: Raha tsara amin’ny vahoaka ianao ka mankasitraka azy sy manao teny mora aminy dia ho mpanomponao mandrakizay izy.

⁸Nefa nolavin’i Rehoboama ny torohevitra nomen’ireo zokiolona azy, dia naka hevitra tamin’ny tanora izay indray nihira taminy sady efa nitoetra teo anatrehany izy ka niteny taminy hoe:

⁹Ahoana kosa no mba hevitra omenareo ka havalintsika ny vahoaka izay niteny tamiko hoe: Hamaivano ny zioga izay nampitondrain’ny rainao anay?

¹⁰Ary ireo tanora indray nihira taminy dia niteny taminy hoe: Izao no lazao amin’ny vahoaka izay niteny taminao hoe: Rainao dia nampitondra zioga mavesatra anay; fa ianao kosa, mba hamaivano aminay izany! Koa izao no lazao aminy: Ny ankikeliko dia lehibe noho ny andilan’ny raiko;

¹¹koa raha nampitondra zioga mavesatra anareo ny raiko, izaho kosa dia mainka hanampy ny zioga hoentinareo; kotopia no namaizan’ny raiko anareo, fa kotopia misy fantsika kosa no hamaizako anareo.

¹²Ary i Jeroboama sy ny vahoaka rehetra dia nankany amin’i Rehoboama tamin’ny andro fahatelo, araka ilay nolazain’ny mpanjaka hoe: Miverena atỳ amiko indray amin’ny andro fahatelo.

¹³Dia nanao teny mafy tamin’ny olona i Rehoboama mpanjaka fa tsy niraharaha ny hevitra nomen’ireo zokiolona azy izy

¹⁴ka niteny taminy araka ny hevitra nomen’ireo tanora hoe: Nampitondra zioga mavesatra anareo ny raiko, fa izaho kosa dia vao mainka hanampy izany; kotopia no namaizan’ny raiko anareo, fa kotopia misy fantsika kosa no hamaizako anareo.

¹⁵Dia tsy nihaino ny olona ny mpanjaka, fa fitondrana avy tamin’Andriamanitra izany zavatra izany, mba hahatanteraka ny teniny izay nampilazainy an’i Ahia silonita tamin’i Jeroboama, zanak’i Nebata.

¹⁶Nony hitan’ny Israely rehetra fa tsy nihaino azy ny mpanjaka dia hoy ny vahoaka tamin’ny mpanjaka: Inona moa no anjaranay amin’i Davida? Tsy manana lova amin’ny zanak’i Jese izahay. Samia mody any an-dainy avy, ry Israely e! Ankehitriny, tsinjovy ny taranakao, ry Davida ô. Dia samy nody ho any an-dainy avy ny Israely rehetra.

¹⁷Fa ny Zanak’Israely izay nonina tany amin’ny tanànan’ny Joda ihany no nanjakan’i Rehoboama.

¹⁸Dia naniraka an’i Adorama, mpifehy ny mpanao fanompoana, i Rehoboama mpanjaka, nefa nitora-bato azy ny Zanak’Israely ka maty izy. Dia niezaka niakatra haingana amin’ny kalesy fitondrany miady i Rehoboama mpanjaka handositra ho any Jerosalema.

¹⁹Ary mandraka androany dia mikomy amin’ny taranak’i Davida ny Israely.