Read La Bible en Malgache 2Tantara 11 Bible Online

2Tantara 11 - La Bible en Malgache bible

2Tantara 11

¹Nony tonga tany Jerosalema i Rehoboama dia novoriny ny taranak’i Joda sy i Benjamina, dia miaramila valo alina sy iray hetsy voafantina, hiady amin’ny Israely mba hampody ny fanjakana ho an’i Rehoboama.

²Kanjo tonga tamin’i Semaia, lehilahin’Andriamanitra, ny tenin’NY TOMPO hoe:

³Mitenena amin’i Rehoboama, zanak’i Solomona, mpanjakan’ny Joda, sy amin’ny Israely rehetra any amin’i Joda sy i Benjamina hoe:

⁴Izao no lazain’NY TOMPO: Aza mandeha hiady amin’ny rahalahinareo fa samia mody any an-tranony avy ianareo; satria avy Amiko izao zavatra izao. Ary nihaino ny tenin’NY TOMPO ny olona ka samy lasa nody fa tsy nandeha hamely an’i Jeroboama.

⁵Nitoetra tany Jerosalema i Rehoboama ka nanamboatra tanàna mimanda tany Joda.

⁶Ireto avy ireo namboariny: I Betlehema, i Etama, i Tekoa,

⁷i Bety-Zora, i Soko, i Adolama,

⁸i Gata, i Maresa, i Zifa,

⁹i Adoraima, i Lakisy, i Azeka,

¹⁰i Zora, i Aialona ary i Hebrona, izay tanàna mimanda ao amin’i Joda sy i Benjamina.

¹¹Nanamafy ny tanàna mimanda izy sady nametraka mpanapaka tao, nasiany tahirin-kanina sy diloilo ary divay koa.

¹²Ary tamin’ny isam-bohitra dia nasiany ampinga lehibe sy lefona avokoa, sady nohamafisiny tsara ny vohitra; ary i Joda sy i Benjamina no nomba azy.

¹³Ary ny mpisorona sy ny levita* izay tany amin’ny Israely rehetra dia nanatona an’i Rehoboama avy tany amin’ny faritaniny avy.

¹⁴Nandao ny tanànany sy ny tany manodidina azy ny levita ka nankany Joda sy Jerosalema, fa efa nanaisotra azy tsy ho mpisorona ho an’NY TOMPO i Jeroboama sy ny zanany,

¹⁵fa nanendry mpisorona ho amin’ny toerana fanaovana sorona sy ho an’ny Seìrima[4] ary ho an’ny ombilahy kely izay nataony.

¹⁶Ary na iza na iza tamin’ny fokon’Israely rehetra no nanolotra ny fony hitady NY TOMPO, Andriamanitry ny Israely, dia nanaraka ireo nankany Jerosalema mba hamono zavatra hatao fanatitra ho an’NY TOMPO, Andriamanitry ny razany.

¹⁷Dia nampatanjaka ny fanjakan’ny Joda izy ireo sady nanome hery an’i Rehoboama, zanak’i Solomona, nandritra ny telo taona satria nandeha tamin’ny lalan’i Davida sy i Solomona telo taona izy.

¹⁸Ary i Rehoboama dia naka an’i Mahalota, zanakavavin’i Jerimota, zanak’i Davida, sy i Abihaila, zanakavavin’i Eliaba, zanak’i Jese, ho vadiny;

¹⁹niterahany an’i Jeosy sy i Semaria ary i Zahama izy io.

²⁰Nanarakaraka azy dia nalainy koa Imaka, zanakavavin’i Absaloma, izay niterahany an’i Abia, i Atahy, i Ziza ary i Selomita.

²¹Ary tia an’Imaka, zanakavavin’i Absaloma, mihoatra noho ny vadiny sy ny vady tsindranony rehetra i Rehoboama, fa izy dia naka vady valo amby folo sy vady tsindrano enimpolo ka niteraka lahy valo amby roapolo sy vavy enimpolo.

²²Ary i Abia, zanakalahin’Imaka, no nataon’i Rehoboama lohany ho mpifehy ny rahalahiny; fa izy no efa nokasainy hampanjakaina.

²³Nahazo hevitra izy ka nampiely ny zanany manerana ny tanin’i Joda sy i Benjamina rehetra, dia tany amin’ny tanàna mimanda rehetra, ary nomeny hanina betsaka sady nitadiavany vady maro.