Read La Bible en Malgache 2Tantara 12 Bible Online

2Tantara 12 - La Bible en Malgache bible

2Tantara 12

¹Rehefa nampandry ny fanjakany sady efa nahery i Rehoboama dia nahafoy ny lalànan’NY TOMPO izy sy ny Israely rehetra.

²Ary tamin’ny taona fahadimy nanjakan’i Rehoboama mpanjaka dia niakatra hamely an’i Jerosalema i Sisaka, mpanjakan’i Ejipta, fa nivadika tamin’NY TOMPO ny mponina tany.

³Nitondra kalesy fitondra miady roanjato sy arivo sy mpitaingin-tsoavaly enina alina izy, ary tsy hita isa ny olona izay nanaraka azy avy tany Ejipta, dia ny Lobita sy ny Sokita ary ny Etiopiana.

⁴Dia nahazo ny tanàna mimanda izay any Joda izy ka tonga tany Jerosalema.

⁵Ary tonga tao amin’i Rehoboama sy ireo mpanapaka ny Joda, izay tafangona tany Jerosalema noho ny amin’i Sisaka, i Semaia mpaminany ka niteny taminy hoe: Izao no lazain’NY TOMPO: Efa nahafoy Ahy ianareo, koa Izaho kosa dia mba hahafoy anareo ho eo an-tanan’i Sisaka.

⁶Dia nanetry tena ireo mpanapaka ny Israely sy ny mpanjaka ka niteny hoe: Marina NY TOMPO.

⁷Nony hitan’NY TOMPO fa nanetry tena izy ireo dia tonga tao amin’i Semaia indray ny tenin’NY TOMPO hoe: Efa nanetry tena izy ka tsy handringana azy Aho fa hamonjy azy tsy ho ela; ary tsy haidiko amin’i Jerosalema avy amin’ny tanan’i Sisaka ny fahatezerako.

⁸Kanefa ho mpanompony ihany izy, mba hahafantarany ny fanompoana Ahy sy ny fanompoana any amin’ny fanjakana hafa.

⁹Dia niakatra hamely an’i Jerosalema i Sisaka, mpanjakan’i Ejipta, ka namabo ny harena tao amin’ny tranon’NY TOMPO sy ny harena tao amin’ny tranon’ny mpanjaka. Samy nobaboiny avokoa izy rehetra; nobaboiny koa ny ampinga volamena izay nataon’i Solomona.

¹⁰Nanao ampinga varahina ho solon’ireny i Rehoboama mpanjaka ka nanolotra azy ho eo an-tanan’ny lehiben’ny mpiambina, izay niambina ny varavaran’ny tranon’ny mpanjaka.

¹¹Ary na oviana na oviana no nidiran’ny mpanjaka tao amin’ny tranon’NY TOMPO dia noentin’ny mpiambina ireny, ary naveriny tao amin’ny efitranon’ny mpiambina indray avy eo.

¹²Rehefa nanetry tena izy dia niala taminy ny fahatezeran’NY TOMPO ka tsy nahalany ringana azy, sady nisy fahatsaram-panahy koa tao amin’ny Joda.

¹³Ary i Rehoboama mpanjaka dia nitombo hery tany Jerosalema ka nitondra ny fanjakany; iraika amby efapolo taona izy raha tonga mpanjaka, ary fito amby folo taona no nanjakany tany Jerosalema, ilay tanàna nofidin’NY TOMPO tamin’ny fokon’ny Israely hampitoerany ny anarany. Ary ny anaran’ny reniny dia Nama amonita.

¹⁴Ary nanao izay ratsy izy, satria tsy niezaka hitady NY TOMPO.

¹⁵Ny tantaran’i Rehoboama, hatramin’ny voalohany ka hatramin’ny farany, tsy voasoratra ao amin’ny bokin’i Semaia mpaminany sy Ido mpahita ny amin’ny firazanana va izany? Niady mandrakariva i Rehoboama sy i Jeroboama.

¹⁶Ary nodimandry any amin’ny razany i Rehoboama, dia nalevina tao an-Tanànan’i Davida izy; ary i Abia zanany no nanjaka nandimby azy.