Read La Bible en Malgache 2Tantara 14 Bible Online

2Tantara 14 - La Bible en Malgache bible

2Tantara 14

¹Nanao izay tsara sy mahitsy teo imason’NY TOMPO Andriamanitra i Asa

²fa nandrava ny alitaran’ny firenen-kafa sy ny toerana fanaovana sorona izy sady nanorotoro ny tsangambaton-tsampy ary nikapa ny tsangankazon-tsampy ho an’ny Aseraha*.

³Ary niteny tamin’ny Joda izy hitady NY TOMPO, Andriamanitry ny razany, ary hankatò ny lalàna sy ny didy.

⁴Nandrava ny toerana fanaovana sorona sy ny toerana fandoroana ditin-kazo manitra teny amin’ny tanànan’ny Joda rehetra koa izy, dia nandry fehizay ny fanjakana teo anatrehany.

⁵Nanorina tanàna mimanda tany Joda izy; dia nandry fehizay ny tany fa tsy nisy ady tamin’izany andro izany, satria NY TOMPO no nanome azy fiadanana.

⁶Fa hoy izy tamin’i Joda: Andeha hamboarintsika ireto tanàna ireto ka hasiantsika manda manodidina sy tilikambo ary vavahady misy hidiny raha mbola azontsika zakaina ny tany; fa efa nitady NY TOMPO Andriamanitsika isika; eny, nitady Azy isika ka nanome antsika fiadanana amin’ny manodidina Izy. Dia namboariny avokoa izany ka tontosa tsara.

⁷Nanana miaramila telo hetsy mpitana ampinga lehibe sy lefona avy tamin’i Joda i Asa, valo alina sy roa hetsy koa ny mpitana ampinga sy tsipìka avy amin’ny Benjamina; ireo rehetra ireo dia lehilahy mahery avokoa.

⁸Niainga hiady tamin’ireo i Zera kosita dia nitondra miaramila iray tapitrisa sy kalesy fitondra miady telonjato ka tonga tao Maresa.

⁹Nivoaka hiady taminy koa i Asa, dia samy nilahatra hiady teo an-dohasaha Zefata akaiky an’i Maresa izy.

¹⁰Ary nitaraina tamin’NY TOMPO Andriamaniny i Asa hoe: TOMPO ô, tsy misy afa-tsy Ianao no mahavonjy ny tsy manan-kery eo anoloan’ny maro ka vonjeo izahay, RY TOMPO Andriamanitray ô, fa Ianao no iankinanay, ary ny anaranao no andehananay hiady amin’ireto olona ireto. TOMPO ô, Ianao no Andriamanitray; aza avela hisy olona haharesy Anao.

¹¹Ary NY TOMPO namely ny Kosita teo anoloan’i Asa sy i Joda ka nandositra ireny.

¹²Nanenjika azy hatrany Gerara i Asa sy ny vahoaka niaraka taminy ka nahafatesana be ny Kosita ary tsy naharina intsony, fa voaringana teo anoloan’NY TOMPO sy ny miaramilany izy ka nahazoan’ny Joda babo betsaka.

¹³Namely ny tanàna rehetra manodidina an’i Gerara izy; voan’ny fahatahorana NY TOMPO ireo ka nobaboin-dry Asa ny tanàna rehetra, fa be ny babo tao.

¹⁴Ary namely ny vala izy ka nahazo babo betsaka, dia ondry aman’osy sy rameva, ary niverina ho any Jerosalema izy avy eo.