Read La Bible en Malgache 2Tantara 15 Bible Online

2Tantara 15 - La Bible en Malgache bible

2Tantara 15

¹Tonga tamin’i Azaria, zanak’i Odeda, ny Fanahin’Andriamanitra;

²nandeha hitsena an’i Asa izy ka niteny taminy hoe: Mihainoa ahy, ry Asa mbamin’ny Joda sy ny Benjamina rehetra: Momba anareo NY TOMPO raha momba Azy ianareo; ary raha mitady Azy ianareo dia hahita Azy; fa raha mahafoy Azy kosa ianareo dia hahafoy anareo Izy.

³Efa ela ny Israely no tsy nanana an’Andriamanitra marina, na mpisorona mba hampianatra, na lalàna.

⁴Fa rehefa niverina tamin’NY TOMPO, Andriamanitry ny Israely, nony azom-pahoriana izy ka nitady Azy, dia nahita Azy.

⁵Tamin’izany fotoana izany dia tsy nisy fiadanana ho an’izay nivoaka ny tanàna na izay niditra tao; fa horohoro be no nahazo ny mponina rehetra tamin’ny tany;

⁶ary nifandringana ny firenena sy ny tanàna, fa Andriamanitra nampangorohoro azy tamin’ny fahoriana rehetra.

⁷Koa mahereza ianareo fa aza miraviravy tanana, fa hisy valim-pitia tokoa ny ataonareo.

⁸Nony ren’i Asa izany teny izany sy ny faminanian’i Odeda mpaminany dia niezaka izy ka nanaisotra ny sampy fahavetavetana tamin’ny tanin’i Joda sy i Benjamina rehetra ary tamin’ny tanàna izay azony tany amin’ny tany be havoana any Efraima; nohavaoziny koa ny alitaran’NY TOMPO izay teo anoloan’ny lalantsara fidirana amin’ny tranon’NY TOMPO.

⁹Novoriny i Joda, i Benjamina rehetra, ny vahiny teo aminy izay avy tany amin’i Efraima, i Manase ary i Simeona; fa betsaka tamin’ny Israely no nanatona azy rehefa hitany fa NY TOMPO Andriamaniny no teo aminy.

¹⁰Ary nivory tany Jerosalema ireo tamin’ny volana fahatelo tamin’ny taona fahadimy amby folo nanjakan’i Asa.

¹¹Tamin’io andro io dia nanolotra fanatitra ho an’NY TOMPO tamin’ny babo izay noentiny izy, dia omby fitonjato sy ondry aman’osy fito arivo.

¹²Ary nanao fanekena hitady NY TOMPO, Andriamanitry ny razany, tamin’ny fony manontolo sy ny fanahiny manontolo izy;

¹³koa na iza na iza tsy mety mitady NY TOMPO Andriamanitry ny Israely dia hovonoina ho faty, na kely na lehibe, na lahy na vavy.

¹⁴Ary nianiana tamin’NY TOMPO tamin’ny feo mahery sy ny fihobiana ary tamin’ny trompetra sy ny anjomara izy.

¹⁵Dia nifaly ny Joda rehetra noho ny fianianana, satria efa nianiana tamin’ny fony manontolo izy sady nazoto nitady NY TOMPO indrindra ka nahita Azy; ary NY TOMPO dia nanome azy fiadanana tamin’ny manodidina rehetra.

¹⁶Ary na dia Imaka, renin’i Asa mpanjaka, aza dia naetriny tsy ho andriambavy satria nanangana sampy ho an’ny Aseraha* izy; ary nikapa ny sampiny i Asa dia nanorotoro izany ka nandoro azy tao amin’ny lohasahan-driaka Kidrona.

¹⁷Fa ny toerana fanaovana sorona tamin’ny Israely dia tsy mba noravana; nefa nahitsy ny fon’i Asa tamin’ny androny rehetra.

¹⁸Ary nampidiriny ho ao amin’ny tranon’NY TOMPO ny zavatra izay nohamasinin’ny rainy mbamin’izay nohamasinin’ny tenany, dia volafotsy sy volamena ary fanaka.

¹⁹Dia tsy nisy ady intsony hatramin’ny taona fahadimy amby telopolo nanjakan’i Asa.