Read La Bible en Malgache 2Tantara 17 Bible Online

2Tantara 17 - La Bible en Malgache bible

2Tantara 17

¹I Josafata, zanak’i Asa, no nanjaka nandimby azy, ary nitombo hery hifanandrina tamin’ny Israely izy.

²Namponina miaramila tamin’ny tanàna mimanda rehetra manerana ny tanin’i Joda izy sady nametraka miaramila tany amin’ny tanin’i Joda sy tany amin’izay tanànan’i Efraima efa azon’i Asa rainy.

³Ary NY TOMPO nomba an’i Josafata satria nandeha tamin’ny lalan’i Davida rainy tamin’ny voalohany izy fa tsy mba nitady ireo Baala*;

⁴fa NY TOMPO, Andriamanitry ny rainy, kosa no notadiaviny, ary araka ny didiny no nandehanany, fa tsy mba araka ny fanaon’ny Israely.

⁵Koa nampitoerin’NY TOMPO teo an-tanany ny fanjakana; ary nitondra fanomezana ho an’i Josafata ny Joda rehetra ka nanana harena sy voninahitra be izy.

⁶Ary nihanatoky tamin’ny lalan’NY TOMPO ny fony dia noravany tsy ho eo amin’ny Joda ny toerana fanaovana sorona sy ny tsangakazon-tsampy ho an’ny Aseraha*.

⁷Ary tamin’ny taona fahatelo nanjakany dia naniraka ny mpanapaka teo aminy izy, dia i Benaila, i Obadia, i Zakaria, i Netanela ary i Mikaia, hampianatra any amin’ny tanànan’i Joda.

⁸Ary nisy levita* koa niaraka tamin’ireo, dia i Semaia, i Netania, i Zebadia, i Asahela, i Semiramota, i Jonatana, i Adonia, i Tobia ary i Toba-Adonia, mbamin’i Elisama sy i Jorama, mpisorona.

⁹Ary nampianatra tany Joda izy ireo ka noentiny ny bokin’ny lalànan’NY TOMPO, dia nitety ny tanànan’ny Joda rehetra izy ka nampianatra teny amin’ny olona.

¹⁰Ary nahazo ny fanjakana rehetra tamin’ny tany manodidina an’i Joda ny tahotra NY TOMPO ka tsy nisy niady tamin’i Josafata ireo.

¹¹Ary ny Filistina sasany dia nitondra fanomezana sy vola hetra ho an’i Josafata; ny Arabo koa dia nitondra ondry aman’osy, dia ondrilahy fitonjato sy fito arivo sy osilahy fitonjato sy fito arivo.

¹²Ary nihanahery indrindra i Josafata ka nanao trano fiarovana sy tanàna fitahirizana tany Joda.

¹³Nanana fananana betsaka tao amin’ny tanànan’i Joda izy ary koa miaramila sy lehilahy mahery tany Jerosalema.

¹⁴Toy izao no nandaminana azy araka ny fianakaviany avy: Ny mpifehy arivo tamin’ny Joda dia i Adna mpitarika ary lehilahy mahery telo hetsy no niaraka taminy;

¹⁵teo anilany i Johanana mpitarika ary valo alina sy roa hetsy no niaraka taminy;

¹⁶teo anilany indray dia i Amasia, zanak’i Zikry, ilay nanolo-tena ho an’NY TOMPO ary lehilahy mahery roa hetsy no niaraka taminy.

¹⁷Tamin’ny Benjamina dia i Eliada, lehilahy mahery, ary lehilahy roa hetsy mitondra tsipìka sy ampinga no niaraka taminy;

¹⁸teo anilany dia i Jozabada ary valo alina sy iray hetsy efa voaomana hiady no niaraka taminy.

¹⁹Ireo no nanompo teo amin’ny mpanjaka, afa-tsy izay nampitoerin’ny mpanjaka tany amin’ny tanàna mimanda manerana ny tanin’i Joda rehetra.